ភ្នំពេញ ៖ បុរសជនជាតិចិនចំនួន៣នាក់ ស្ថិតក្នុងសភាពស្រវឹងស្រា បានបើករថយន្តទំនើប១គ្រឿង ក្នុងល្បឿនលឿន រួចក៏ជ្រុលចង្កូតទៅ បុករថយន្តកូរ៉េ១គ្រឿង ដែលបើកបរដោយស្ត្រីម្នាក់ដឹកបង្អែមលក់ បណ្តាលឱ្យរថយន្តដឹក បង្អែមក្រឡាប់ផ្ងារជើងម្ខាង និងចាក់បង្អែម ព្រមទាំង សម្ភារៈលក់ដូរខ្ទាតរាយប៉ាយពេញផ្លូវ បន្ទាប់មក ដោយដឹងពីកំហុសរបស់ខ្លួនក្រុមជនជាតិចិន បានសម្រេចសងសំណងជូនភាគីរងគ្រោះចំនួន ៧០០ដុល្លារ ដើម្បីបញ្ចប់រឿងនៅនឹងកន្លែងតែម្តង។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើង កាលពីវេលាម៉ោង២ និង១៥នាទីរំលងអធ្រាត្រ ឈានចូលថ្ងៃទី០៩ ខែធ្នូ ឆ្នាំ២០២២ នៅចំណុចមុខផ្សារដីហុយ តាមបណ្តោយផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនកើតហេតុគេឃើញស្ត្រីម្នាក់ បើករថយន្តកូរ៉េដឹកបង្អែម ពណ៌ស ពាក់ស្លាកលេខ ស៊េរីចាស់ ច-១៩៦៨ ភព២ ធ្វើដំណើរតាម បណ្តោយផ្លូវហាណូយក្នុងទិសដៅពីជើងទៅត្បូង លុះបើកមកដល់ចំណុចកើតហេតុខាងលើក៏បាន បត់ត្រឡប់ក្រោយឆ្ពោះ ទៅទិសខាងជើងវិញ តែពេលបត់បានបន្តិច ក៏មានរថយន្តទំនើប១គ្រឿង ម៉ាក ALPHARD ពណ៌ស ពាក់ស្លាកលេខ ភ្នំពេញ 2BH-0277 បើកបរដោយបុរសជនជាតិចិនម្នាក់ និងមាន បុរសជនជាតិចិន២នាក់ទៀត រួមដំណើរជាមួយ ធ្វើដំណើរតាមបណ្តោយ ផ្លូវហាណូយក្នុងទិសដៅពីត្បូងទៅ ជើងក្នុងល្បឿនលឿន រួចក៏ជ្រុលទៅបុករថយន្តដឹកបង្អែមពីក្រោយពេញ ទំហឹងបណ្តាលឱ្យរថយន្តដឹក បង្អែមក្រឡាប់ផ្ងារជើងម្ខាងខ្ទាតបង្អែមនិងសម្ភារលក់ដូររាយប៉ាយពេញផ្លូវ តែសំណាងល្អ ស្ត្រីអ្នកបើករថយន្តដឹកបង្អែមគ្រាន់តែរងរបួសស្រាល ប៉ុណ្ណោះ។
ក្រោយកើតហេតុ ភាគីទាំងពីរបានធ្វើការសម្របសម្រួលគ្នាអស់មួយសន្ទុះធំ បន្ទាប់មកភាគីជនជាតិចិន បានដឹងពីកំហុស ក៏ព្រមចេញ សំណងនៃការខូចខាតទៅស្ត្រីរងគ្រោះចំនួន៧០០ដុល្លារ ដើម្បីបញ្ចប់រឿងនៅនឹង កន្លែងកើតហេតុម្តង។/
