ខ្មែរបំភ្លឺបួខាវ រឿងថៃ បោកប្រាស់កួយ

ភ្នំពេញ ៖ បន្ទាប់ពីកីឡាករប្រដាល់ថៃ ដើមកំណើតកួយ បានប្រកាសស្នើសុំឲ្យអ្នកគ្រប់​គ្រងសហព័ន្ធ​កីឡា​ប្រដាល់កម្ពុជា ជួយដោះស្រាយឲ្យគេ រឿងតម្លៃខ្លួនដែលរូបគេទៅចូលរួមប្រកួតលើកចុងក្រោយនៅកម្ពុជា  ក្នុងកម្មវិធី «សង្វៀនគុនខ្មែរពិភពលោក» (Worldfight tournament) ដែលនៅសល់ ២,២លានបាតទៀត មិនទាន់ទូទាត់ឲ្យនៅឡើយនោះមក ខាងភាគីកម្ពុជា បានបំភ្លឺថា ករណីនេះ មិនពាក់ព័ន្ធនឹងកម្ពុជាទេ គឺជា​ករណីជនជាតិថៃ បោកប្រាស់ជនជាតិថៃ គ្នាឯង ព្រោះអ្នករៀបចំកម្មវិធី ដែលជាអ្នកហៅបួខាវ មកប្រ​កួត​នៅកម្ពុជា នោះ គឺជាជនជាតិថៃ ។

យោងតាមទំព័រហ្វេសប៊ុក ឈ្មោះ «WORLD KUN KHMER Promotion» បានបញ្ជាក់ពីករណីនេះនៅថ្ងៃទី០៦ ខែ​កុម្ភ: ឆ្នាំ២០២៣ ថា «រឿងជនជាតិថៃ បោកប្រាស់ជនជាតិថៃ លើទឹកដីខ្មែរ! លោកសម្បត្តិ (សញ្ជាតិកួយថៃ) ទារ​លុយ ២.២លានបាត! រឿងលុយដែលលោកសម្បត្តិ ជនជាតិថៃ សញ្ជាតិកួយ ស្នើឲ្យខាងថ្នាក់ដឹកនាំសហព័ន្ធ ជួយរកអ្នកសង គឺជារឿង “ជនជាតិថៃ បោកជនជាតិថៃ លើទឹកដីកម្ពុជា”។ មិនមែនតែលោកសម្បត្តិ ទេដែល​មិនទាន់បានទទួលលុយ ខាងកីឡាករ Kun Khmer និងក្រុមការងារផ្សេងៗ ជាខ្មែរ ក៏ត្រូវជនជាតិថៃ ម្នាក់នេះ រត់ចោល មិនបានបើកលុយឲ្យដែរ។ ខ្ញុំគិតថា លោក Tony Anh ជាម្ចាស់កម្មវិធី World Fight គួរតែនៅថៃ មិន​នៅកម្ពុជា ទេ ព្រោះបើនៅកម្ពុជា ក៏នឹងត្រូវអ្នករងគ្រោះនៅកម្ពុជា ប្តឹងចាប់ខ្លួនមកដោះស្រាយបំណុល តាម​ច្បាប់របស់កម្ពុជា ផងដែរ»។

ចំណែកទំព័រហ្វេសប៊ុក ឈ្មោះ «MN-kun khmer Sport» បានបញ្ជាក់នៅថ្ងៃទី០៧ ខែកុម្ភ: ឆ្នាំ២០២៣ ថា «សេច​ក្តីប្រកាសជូនដំណឹងចំពោះលោក Tony Anh (ឈ្មោះក្រៅ) ឈ្មោះក្នុងលិខិតឆ្លងដែន  Srisud Tipaya  ជនជាតិថៃ កាន់លិខិតឆ្លងដែន លេខ AB 2468835 ថ្ងៃខែឆ្នាំកំណើត 27-Mar-1975 ដែលជាអ្នកបង្កើតកម្មវិធីប្រដាល់ World Fight Tournament ដើម្បីចូលខ្លួនមកដោះស្រាយ ទូទាត់លុយដែលនៅជំពាក់ក្រុមហ៊ុន R.dB Cambodia ថ្លៃជួល Sound system, Lighting, LED Screen and stage ក្នុងព្រឹត្តិការណ៍ប្រដាល់ World Fight Tournament ចំនួន 5000$

បញ្ជាក់ ៖ លោក Srisud Tipaya បានជួលឆាកភ្លើង ប្រព័ន្ធសំឡេង និងផ្ទាំងរូបភាព LED screen ពីក្រុមហ៊ុន R.dB Cambodia, Show ទីមួយ ថ្ងៃ27-July-22 ធ្វើឡើងនៅទីតាំងស្តាតថ្មី ជិតវិមានឈ្នះ-ឈ្នះ ចំនួនទឹកប្រាក់ 6,500$ ក្នុង 1Show។ Show ទីពីរ  ថ្ងៃទី 31-Aug-22 ធ្វើឡើងនៅស្តាតចាស់ ចំនួនទឹកប្រាក់  6,500$  ក្នុង 1Show សរុប​ទឹកប្រាក់ទាំងពីរកម្មវិធី ចំនួន 13,000$ ។ លុយដែលលោក Srisud Tipaya ទូទាត់ឲ្យតាម ABA transfer 5,400$ បូកនឹងលុយកក់ក្រៅ ចំនួន 2,600$ សរុបទឹកប្រាក់ លោក Srisud Tipaya បានទូទាត់ឲ្យបានចំនួន 8,000$ ដូច្នេះ លោក Srisud Tipaya នៅខ្វះលោក Thy Thearith ម្ចាស់ក្រហ៊ុន R.dB Cambodia 5,000$ ទៀត។

អស់រយ:ពេលច្រើនខែរហើយដែលខ្ញុំមិនផុស ព្រោះទុកពេលឲ្យដោះស្រាយ តែការរង់ចាំ គ្មានដំណោះស្រាយ ហើយមានការយល់ច្រឡំថា គាត់បាននិយាយថាគាត់បានចាញ់បោកខ្មែរ អស់លុយជាច្រើន តាមពិតទៅ គាត់​បាននិយាយកុហក អ្នកដែលត្រូវចាញ់បោកគេ គឺខ្មែរទេ ដែលត្រូវរងគ្រោះ ដូចជាខ្ញុំអ៊ីចឹង ខ្ញុំឲ្យបងប្អូនប្រុងប្រយ័ត្ន ជនម្នាក់នេះ Mr Srisud Tipaya អ្នកធ្វើកម្មវិធី World Fight Tournament»។

ចំណែកគណនីហ្វេសប៊ុក ឈ្មោះ «Doctor Sem Ratana» បានផ្តាំផ្ញើទៅកីឡាករថៃ ដើមកំណើតកួយ លោកបួខាវ បាន់ឆាមេឃ ថា តាមពិតជនជាតិថៃ ខ្លួនឯងខិលខូច បែរជាប្រកាសចោទជាតិគេជាសាធារណៈ ដែលជារឿងមិន​យុត្តិធម៌សម្រាប់កម្ពុជា។

គណនីហ្វេសប៊ុក ខាងលើបានសរសេរនៅថ្ងៃទី០៨ ខែកុម្ភ: ឆ្នាំ២០២៣ ថា «តាមពិតជនជាតិខ្លួនឯងខិលខូច បែរជា​ប្រកាសចោទជាតិគេជាសាធារណៈ!!!

ខ្មែរទូទាំងប្រទេស កំពុងត្រូវបានគេចោទប្រកាន់ ទាំងដែលខ្លួនមិនបានធ្វើ តើរឿងមួយនេះ គួរទាមទារឲ្យ​មានការ​ខមោទោសជាសាធារណៈដែរទេ ឬយ៉ាងណា? ដើម្បីកុំឲ្យកើតមានការយល់ច្រទ្បំ ព្រោះប្រជាជនខាងគេ ជឿ ១០០០% ទាំងដែលគ្មានភ័ស្តុតាងច្បាស់លាស់ នាំគ្នាឌឺដងដាក់ខ្មែរ ដូចទឹកបាក់ទំនប់ ដោយសារ​តែសម្តីបុគ្គល​ម្នាក់នោះ។

មិនមែនខ្ញុំចង់ដុតកំហឹង ពន្យុះឲ្យប្រទេសទាំងពីរឈ្លោះគ្នានោះទេ អ្វីដែលជារបស់ពិត សាងចេញពីដៃអ្នក ខ្ញុំនៅ​តែកោតសរសើរ ខ្ញុំដឹងថា ប្រទេសណាក៏មានមនុស្សល្អ និងមនុស្សមិនល្អដែរ តែលើកនេះ គឺវាប៉ះដល់កិត្តិយស​ខ្មែរ ទូទាំងប្រទេស ព្រោះអ្នកគឺជាបុគ្គលដែលគេស្គាល់លំដាប់អន្តរជាតិ  មិនមែនចេះតែផុសតាម​ចិត្តខឹងសម្បារ​បស់ខ្លួននោះទេ?

ពេលនេះ ភាគីកម្ពុជា បានស្រាយបំភ្លឺហើយ តែបុគ្គលម្នាក់នោះ ដូចជាមិនទាន់ឃើញតបតអ្វីនោះទេ នៅលើផេក​ជាសាធារណៈរបស់ខ្លួន តើពេលនេះមានសារព័ត៌មានទាំងនៅក្នុងស្រុករបស់អ្នក និងអន្តរជាតិ ប៉ុន្មានដែលបាន​ចុះផ្សាយពីរឿងនេះ? តើកិត្តិយសរបស់សហព័ន្ធកីទ្បាគុនខ្មែរ និងជនជាតិខ្មែរ ទូទាំងប្រទេសអ្នកណា​ទទួល​ខុស​ត្រូវ?»។

គួរបញ្ជាក់ថា ប្រតិកម្ម និងការបកស្រាយបំភ្លឺខាងលើនេះ បានធ្វើឡើង ក្រោយពេលដែលកីឡាករថៃ បួខាវ បាន់​ឆាមេឃ បានប្រកាសតាមទំព័រហ្វេសប៊ុក ផ្ទាល់ខ្លួន នៅថ្ងៃទី០៣ ខែកុម្ភ: ឆ្នាំ២០២៣ ថា រូបគេមិនមានបញ្ហាអ្វី​ជា​មួយ​​គុនខ្មែរ ឬជនជាតិកម្ពុជា នោះទេ។ ប៉ុន្តែរូបគេមានបញ្ហាមួយ ចង់ស្នើសុំឲ្យអ្នកគ្រប់គ្រងសហព័ន្ធ​កីឡាប្រ​ដាល់កម្ពុជា ជួយដោះស្រាយឲ្យគេផង រឿងតម្លៃខ្លួន ដែលរូបគេទៅចូលរួមប្រកួតលើកចុងក្រោយនៅកម្ពុជា ក្នុង​កម្មវិធី «សង្វៀនគុនខ្មែរពិភពលោក» (Worldfight tournament) ដែលនៅសល់ ២,២លានបាតទៀត មិនទាន់ទូ​ទាត់ឲ្យគេនៅឡើយ៕ ខៀវទុំ