ភ្នំពេញ ៖ តារាចម្រៀងជើងចាស់ល្បីឈ្មោះ លោកណូយ វណ្ណា បានបើករថយន្ត ១គ្រឿង ក្នុងល្បឿនលឿន រួចជ្រុលទៅបុករបាំងថ្មគល់ស្ពានអាកាសក្បាលថ្នល់ បណ្តាលឱ្យខ្ទេចរថយន្តមួយកំណាត់មុខ បង្កការភ្ញាក់ផ្អើលទាំងកណ្តាលអធ្រាត្រ។
ហេតុការណ៍គ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង ១២និង២០នាទីរំលងអធ្រាត្រ ឈានចូលថ្ងៃទី០២ ខែមីនា ឆ្នាំ២០២៣ នៅត្រង់ចំណុចមុខអគ្គស្នងការដ្ឋាននគរបាលជាតិ តាមមហាវិថីព្រះនរោត្តម ស្ថិតក្នុងសង្កាត់ទន្លេបាសាក់ ខណ្ឌចម្ការមន។
តាមប្រភពព័ត៌មានពីប្រជាពលរដ្ឋដែលឃើញហេតុការណ៍ បានរៀបរាប់ប្រាប់ថា មុនកើតហេតុ គេឃើញរថយន្ត ១គ្រឿង ម៉ាក Lexus RX-330 ពណ៌ស្ករ ពាក់ស្លាកលេខ ភ្នំពេញ 2BF-7616 បើកបរដោយតារាចម្រៀងជើងចាស់ ណូយ វណ្ណា បានបើកបរតាមបណ្តោយមហាវិថីព្រះនរោត្តម ក្នុងទិសដៅពីជើង មកត្បូង ក្នុងល្បឿនយ៉ាងលឿន លុះមកដល់ចំណុចកើតហេតុ ស្រាប់តែរេចង្កូតមកខាងស្តាំដៃ ជ្រុលទៅបុករបាំងថ្មគល់ស្ពានអាកាសក្បាលថ្នល់ ពេញទំហឹង បណ្តាលឱ្យរថយន្តខ្ទេចមួយកំណត់មុខ សំណាងមិនបង្កគ្រោះថ្នាក់ដល់អ្នកបើកបរនោះឡើយ ។
ក្រោយកើតហេតុ តារាចម្រៀង លោកណូយ វណ្ណា ដែលជួបគ្រោះថ្នាក់ចរាចរណ៍ខាងលើ ត្រូវបានកូនក្មួយដឹកយកទៅផ្ទះ។ ចំណែករថយន្ត ត្រូវបានសមត្ថកិច្ចមូលដ្ឋាន សហការជាមួយមន្ត្រីជំនាញ ធ្វើការវាស់វែង រួចអូសយកទៅរក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយបន្តនៅពេលក្រោយ៕
