ណាសា ដាក់ឈ្មោះស្ត្រីនិងបុរសស្បែកខ្មៅ លើកដំបូង ទៅឋានព្រះច័ន្ទ

ទីភ្នាក់ងារអវកាសអាមេរិកណាសា បានដាក់ឈ្មោះអវកាសយានិកបួននាក់ ដែលនឹងនាំមនុស្សជាតិ ត្រឡប់ទៅ ឋានព្រះច័ន្ទវិញ បន្ទាប់ពីផ្អាកអស់រយៈពេល ៥០ឆ្នាំ។ ពលរដ្ឋអាមេរិកបីនាក់ និងជនជាតិកាណាដាម្នាក់ត្រូវបាន បង្ហាញជាសាធារណៈក្នុងពិធីមួយក្នុងទីក្រុង Houston រដ្ឋ Texas។

Christina Koch នឹងក្លាយជាអវកាសយានិកស្ត្រីដំបូងគេដែលត្រូវបាន គេចាត់ឱ្យទៅបំពេញបេសកកម្ម នៅឋាន ព្រះច័ន្ទ ខណៈលោក Victor Glover ក៏ក្លាយជាអវកាសយានិកស្បែកខ្មៅដំបូងគេដែលត្រូវបំពេញបេសកកម្មរួម ជាមួយ អវកាសយានិកបីនាក់ផ្សេងទៀត។ពួកគេនឹងចូលរួមជាមួយ Reid Wiseman និង Jeremy Hansenដើម្បី ហោះហើរជុំវិញឋានព្រះច័ន្ទនៅចុងឆ្នាំក្រោយ ឬដើមឆ្នាំ ២០២៥។

អវកាសយានិកនឹងមិនចុះចតនៅលើឋានព្រះច័ន្ទទេ ប៉ុន្តែបេសកកម្មរបស់ពួកគេនឹងត្រួសត្រាយផ្លូវសម្រាប់ ការចុះចតដោយនាវិកជាបន្តបន្ទាប់។

បុរសជនជាតិស្បែកខ្មៅមានឈ្មោះថាVictor Gloverអាយុ៤៦ឆ្នាំគឺ អ្នកបើកយន្តហោះសាកល្បង របស់កងទ័ព ជើងទឹកអាមេរិក។ គាត់បានចូលរួមជាមួយណាសាក្នុងឆ្នាំ ២០១៣ ហើយបានធ្វើការហោះ ហើរទីអវកាសដំបូង របស់គាត់នៅឆ្នាំ ២០២០។គាត់គឺជាជនជាតិអាមេរិកដើមកំណើតអាហ្វ្រិកដំបូង គេដែលស្នាក់នៅលើស្ថានីយ៍ អវកាសសម្រាប់រយៈពេលបន្ថែម ៦ ខែ។ចំណែកឯលោកស្រីChristina Koch វ័យ៤៤ឆ្នាំគឺជាវិស្វករអគ្គិសនី។ លោកស្រីបានជាប់កំណត់ត្រាសម្រាប់រយៈពេលវែងបំផុតក្នុងលំហអាកាសគឺ ៣២៨ ថ្ងៃ។

ឥឡូវនេះអវកាសយានិកដែលទើបនឹងមានឈ្មោះថ្មីនឹងឡើងទៅកាន់ Orion សម្រាប់ Artemis-2 និងការធ្វើដំ ណើរទៅ -មកពីឋានព្រះច័ន្ទ ដែលទំនងជាចំណាយពេលប្រហែល ១០ថ្ងៃ។បេសកកម្មហោះហើរ អវកាសចុង ក្រោយរបស់មនុស្សទៅកាន់ឋានព្រះច័ន្ទគឺ Apollo 17 ក្នុងខែធ្នូ ឆ្នាំ ១៩៧២។ ការចុះចតលើកដំបូងគឺ Apollo 11 ក្នុងឆ្នាំ ១៩៦៩៕