ភ្នំពេញ ៖ ដោយអនុវត្តតាមអនុសាសន៍របស់សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោក ឃួង ស្រេង អភិបាល រាជធានីភ្នំពេញ បានរៀបចំទីតាំងផ្សាយបន្តផ្ទាល់ពីការប្រកួតកីឡាបាល់ទាត់ ក្នុងព្រឹត្តិ ការណ៍ស៊ីហ្គេម នៅទីតាំងចំនួន៧ផ្សេងគ្នា ដើម្បីបង្កលក្ខណៈ ងាយស្រួលដល់អ្នកគាំទ្រអាចទស្សនាបាននៅ ពេលមិនបានទៅទស្សនាដោយផ្ទាល់នាពហុកីឡដ្ឋាន។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី២៦ ខែមេសា ឆ្នាំ២០២៣ ស្តីពីការផ្សាយ បន្តផ្ទាល់ការប្រកួតបាល់ទាត់ របស់ក្រុមជម្រើសជាតិកម្ពុជា ក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ លើក ទី៣២ បានបញ្ជាក់ថា ទទួលបានប្រសាសន៍ណែនាំដ៏ខ្ពង់ខ្ពស់ របស់សម្តេចហ៊ុន សែន នាយករដ្ឋមន្ត្រីនៃព្រះ រាជាណាចក្រកម្ពុជា នាថ្ងៃទី២៥ ខែមេសា ឆ្នាំ២០២៣ និងដើម្បីចូលរួមអបអរសាទរព្រឹត្តិការណ៍ ប្រកួតកីឡា អាស៊ីអាគ្នេយ៍ លើកទី៣២ ក្នុងឱកាសដែលកម្ពុជា ធ្វើជាម្ចាស់ផ្ទះ រដ្ឋបាលរាជធានីភ្នំពេញ មានកិត្តិយស សូម ជម្រាបជូនសាធារណជន និងបងប្អូនប្រជាពលរដ្ឋដែលស្រឡាញ់វិស័យកីឡាទាំងអស់ មេត្តាជ្រាបថារដ្ឋបាល រាជធានីភ្នំពេញ នឹងសហការជាមួយសហភាពសហព័ន្ធយុវជនកម្ពុជា (ស.ស.យ.ក) រៀបចំផ្សាយ បន្តផ្ទាល់ ការប្រកួតបាល់ទាត់របស់ក្រុមជម្រើសជាតិកម្ពុជា ក្នុងព្រឹត្តិការណ៍ប្រកួតកីឡាអាស៊ីអាគ្នេយ៍ លើកទី៣២ ចាប់ពីថ្ងៃទី២៩ ខែមេសា ដល់ថ្ងៃទី១៦ ខែឧសភា ឆ្នាំ២០២៣ នៅតាមទីតាំងមួយចំនួន ដូចខាងក្រោម ៖
១- សួនច្បារមុខវត្តបទុមវតី ស្ថិតនៅក្នុងសង្កាត់ចតុមុខ ខណ្ឌដូនពេញ
២- សួនច្បារមាត់ទន្លេ ទល់មុខភោជនីយដ្ឋានមេត្រូ ស្ថិតនៅក្នុងសង្កាត់ផ្សារកណ្តាលទី១ ខណ្ឌដូនពេញ
៣- ក្នុងបុរីប៉េងហួត បឹងស្នោ ស្ថិតនៅក្នុងសង្កាត់និរោធ ខណ្ឌច្បារអំពៅ
៤- សួនច្បារមិត្តភាព ក្បែរក្រសួងការពារជាតិ ស្ថិតនៅក្នុងសង្កាត់មិត្តភាព ខណ្ឌ៧មករា
៥- សួនច្បារទល់មុខវិទ្យាស្ថានស្រាវជ្រាវនិងអភិវឌ្ឍន៍ព្រៃឈើ-សត្វព្រៃ ស្ថិតនៅក្នុងសង្កាត់ គោកឃ្លាង ខណ្ឌសែនសុខ
៦- សួនច្បារព្រះនាងប្រាជ្ញាបារមី ស្ថិតនៅក្នុងសង្កាត់ជ្រោយចង្វា ខណ្ឌជ្រោយចង្វា
៧- ទីលានប្រជាធិបតេយ្យ ក្បែរស្ពានអាកាសឫស្សីកែវ ស្ថិតនៅក្នុងសង្កាត់ឫស្សីកែវ ខណ្ឌឫស្សីកែវ។
រដ្ឋបាលរាជធានីភ្នំពេញ សង្ឃឹមជឿជាក់ថា សាធារណជន និងបងប្អូនប្រជាពលរដ្ឋ ដែលស្រឡាញ់វិស័យកីឡាទាំងអស់ នឹងចូលរួមគាំទ្រ និងទស្សនាការផ្សាយបន្តផ្ទាល់ តាមទីតាំងខាងលើ ឱ្យបានច្រើនកុះករ និងអធិកអធម…។
គួរបញ្ជាក់ថា សម្តេចហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៥ ខែមេសា ឆ្នាំ២០២៣ បាន ផ្ញើសារសំឡេង ណែនាំអភិបាលរាជធានី-ខេត្ត ឱ្យរៀបចំឲ្យបានឆាប់បំផុត ការបញ្ចាំងស្លាយផ្សាយបន្តផ្ទាល់ ការ ប្រកួតកីឡាស៊ីហ្គេម ជាពិសេសការប្រកួតកីឡាបាល់ទាត់ នៅឯហុកីឡដ្ឋានអូឡាំពិក ឬពហុកីឡាដ្ឋានមរតក តេជោ ។
សូមបញ្ជាក់ថា នៅវេលាម៉ោង ៤រសៀល ថ្ងៃទី២៩ ខែមេសា ឆ្នាំ២០២៣ ខាងមុខ ក្រុមបាល់ទាត់ជម្រើសជាតិ យុវជនអាយុក្រោម២២ឆ្នាំ ឥណ្ឌូនេស៊ី ត្រូវប៉ះហ្វីលីពីន ជាគូបើកឆាក ប្រភេទកីឡាបាល់ទាត់ផ្នែកបុរសក្នុងព្រឹត្តិ ការណ៍កីឡាប្រចាំតំបន់អាស៊ីអាគ្នេយ៍ ឬស៊ីហ្គេម (SEA Games) ឆ្នាំ២០២៣ នៅកម្ពុជា។ ក្រោយចប់ការប្រកួតរវាង ក្រុមឥណ្ឌនេស៊ី និងហ្វីលីពីន នៅវេលាម៉ោង ៧យប់ ក្រុមបាល់ទាត់ជម្រើសជាតិយុវជនអាយុក្រោម២២ឆ្នាំ (U22) របស់ម្ចាស់ផ្ទះកម្ពុជា នឹងត្រូវប៉ះទីម័រឡេស្ត ក្នុងពហុកីឡដ្ឋានជាតិអូឡាំពិក រាជធានីភ្នំពេញ៕