យោងតាមប្រភពព័ត៌មានប៊ីប៊ីស៊ីចេញផ្សាយកាលពីថ្ងៃពុធទី២៨ខែមិថុនាឆ្នាំ ២០២៣ បានឲ្យដឹងថាក្លឹបMan City បានចុះហត្ថលេខាទិញខ្សែបម្រើសញ្ជាតិក្រូអាស៊ី Mateo Kovacic ពីក្លឹបChelsea ក្នុងតម្លៃជាង៣២លានដុល្លារ។កិច្ចព្រមព្រៀងសម្រាប់កីឡាករវ័យ២៩ ឆ្នាំរូបនេះក៏មានតម្លៃបន្ថែមចំនួនជាង៦លានដុល្លារផងដែរខណៈដែលោកលោកបានចុះហត្ថលេខាលើកិច្ចសន្យារយៈពេល ៤ ឆ្នាំ។
Kovacic គឺជាសមាជិកថ្មីដំបូងរបស់ Man City ក្នុងរដូវក្តៅនេះ បន្ទាប់ពីពួកគេបានឈ្នះពានរង្វាន់៣គឺឆេមពានលីក ប្រឺមីញេលីក និង FA Cup កាលពីរដូវកាលមុន។
Kovacic បាននិយាយថានេះគឺជាការផ្លាស់ប្តូរដ៏អស្ចារ្យសម្រាប់ខ្ញុំ ហើយខ្ញុំមិនអាចរង់ចាំក្នុងការចាប់ផ្តើមជាមួយ Man Cityនោះទេ។ការបានចូលរួមក្រុមនេះពិតជាសុបិនមួយសម្រាប់កីឡាករបាល់ទាត់គ្រប់រូប។ ខ្ញុំនៅតែមានការរៀនសូត្រ និងការអភិវឌ្ឍន៍ជាច្រើនដែលត្រូវធ្វើ ហើយខ្ញុំដឹងថាក្រោមការគ្រប់គ្រងរបស់ Pep ខ្ញុំអាចក្លាយជាកីឡាករល្អជាង ដែលវាពិតជារំភើបសម្រាប់ខ្ញុំ។
ការមកដល់របស់គាត់បន្ទាប់ពីក្លឹបបានប្រកាសពីផ្ទេរដោយឥតគិតថ្លៃរបស់កីឡាករ Ilkay Gundogan ទៅកាន់ក្លឹប Barcelona ខណៈពេលដែលMan City បានដេញថ្លៃ ជាង១១៤លានដុល្លាររួមបញ្ចូលការបង់ប្រាក់មុនជាង១០១លានដុល្លារសម្រាប់ខ្សែបម្រើអង់គ្លេស Declan Rice ដែលត្រូវបានច្រានចោលដោយក្លឹប West Ham ៕