កណ្តាល ៖ ក្មេងស្ទាវឈាមរាវម្នាក់ អាយុទើបនឹង១៧ឆ្នាំ តែធ្លាប់ជាប់ពន្ធនាគាររយៈពេល១៨ខែ ពាក់ព័ន្ធករណីឆក់កាបូប លុះចេញ មកវិញ មិនរាងចាលបែរជាចេញឆក់-ប្លន់ជាបន្តបន្ទាប់ លុះធ្វើសកម្មភាពលើកទី៥ គំរាមចាក់ស្ត្រីម្នាក់ប្លន់យកកាបូប ទើបអស់លក្ខណ៍ ត្រូវសមត្ថកិច្ចចាប់វាយខ្នោះនាំយកទៅចាត់ការតាមច្បាប់។ករណីឆក់កាបូបខាងលើនេះ បានកើតឡើង កាលពីវេលាម៉ោង៦ និង៣០នាទីព្រលប់ ថ្ងៃទី២៧ ខែមិថុនា ឆ្នាំ២០២៣ នៅចំណុច ភូមិមេបាន់ ឃុំស៊ីធរ ស្រុកខ្សាច់កណ្តាល។
ជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះហួរ មករា ហៅមាក់ ភេទប្រុស អាយុ១៧ឆ្នាំ មុខរបរមិនពិតប្រាកដ ធ្លាប់ជាប់ ពន្ធនាគារម្តងរយៈពេល១៨ខែ មានលំនៅភូមិបឹងជន្លេង ឃុំឬស្សីជ្រោយ ស្រុកមុខកំពូល (មានសារធាតុញៀន)។ ចំណែក សម្ភារៈដកហូតបាន រួមមាន ១-កាបូបចំនួន១ (ជារបស់ជនរងគ្រោះ) ក្នុងនោះមានទូរស័ព្ទ១គ្រឿង ម៉ាក Realme C12 ពណ៌ ក្រហម ប្រាក់រៀលចំនួន ៤៣០០០រៀល និងប័ណ្ណសំគាល់មួយចំនួន។ ២-ម៉ូតូ១គ្រឿង ម៉ាក SUZUKI Let’s ពណ៌ស ពាក់ស្លាកលេខ កណ្តាល 1U-5333។ ៣០ដែកកេះចំនួន១ បំពង់កែតូច សម្រាប់ប្រើប្រាស់គ្រឿងញៀនចំនួន១។ ៤-ទុលណឺលវីស ចំនួន៤ ដង្កៀបចំនួន១ (ជារបស់ជនសង្ស័យ)។ រីឯ ស្ត្រីរងគ្រោះ មានឈ្មោះញ៉ែម សាវិនី អាយុ៣៩ឆ្នាំ មុខរបរកម្មការិនីរោងចក្រ មានលំនៅ ភូមិព្រែកក្រូច ឃុំព្រែកតាសរ ស្រុកពោធិ៍រៀង ខេត្តព្រៃវែង។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ ជនសង្ស័យបានជិះម៉ូតូតែម្នាក់ឯង ចេញពីផ្ទះឆ្លងស្ពានព្រែកតាមាក់ មកស្រុកខ្សាច់កណ្តាល រកឆក់ទ្រព្យសម្បត្តិប្រជាពលរដ្ឋ។ លុះដល់ម៉ោង៦ និង៣០នាទីល្ងាចថ្ងៃដដែល ជនរងគ្រោះ ជិះម៉ូតូតែម្នាក់ឯង មានស្ពាយ កាបូបចំនួន១ ជិះតាមផ្លូវចំការស្វាយនៅភូមិឃុំកើតហេតុ ស្រាប់តែជនសង្ស័យជិះម៉ូតូតាមពីក្រោយ ស្ទាក់ម៉ូតូជនរងគ្រោះឱ្យឈប់ ហើយកាន់ ទុណឺវីល១ ជាប់នឹងដៃ និយាយគំរាមជនរងគ្រោះថា “ឱ្យកាបូបមកអញ បើមិនឱ្យអញចាក់ម៉ាដែកឆាប” និយាយរួច ជនសង្ស័យចាប់ទាញយក កាបូបជនរងគ្រោះបានជិះគេចខ្លួន ឯជនរងគ្រោះបានស្រែកឆោឡោថាចោរៗ ភ្លាមនោះអ្នកចាំចម្ការស្វាយនៅទីនោះបានចេញមកស្ទាក់ ចាប់ជន សង្ស័យបានប្រគល់ជូនសមត្ថកិច្ចនគរបាលប៉ុស្តិ៍ស៊ីធរ ហើយសមត្ថកិច្ចប៉ុស្តិ៍ បានបញ្ជូនជនសង្ស័យរួម ទាំងវត្ថុតាង មកអធិការដ្ឋាននគរបាលស្រុក ខ្សាច់កណ្តាល ចាត់ការបន្តតាមនីតិវិធី។
សមត្ថកិច្ចបានបញ្ផាក់ឱ្យដឹងផងដែរថា ជនសង្ស័យខាងលើនេះ ធ្លាប់ជាប់ពន្ធនាគារម្តងរួចមកហើយ កាលពីឆ្នាំ២០២០ ដោយជាប់ រយៈពេល១៨ខែ ពាក់ព័ន្ធករណីឆក់កាបូប។ លុះក្រោយពីចេញពន្ធនាគារមកវិញ ជនសង្ស័យបានធ្វើសកម្មភាពឆក់ទ្រព្យសម្បត្តិប្រជាពលរដ្ឋ បានសម្រេចជាបន្តបន្ទាប់ចំនួន៥លើក ក្នុងនោះមាននៅរាជធានីភ្នំពេញចំនួន២លើក ស្រុកមុខកំពូល១លើក និងស្រុកខ្សាច់កណ្តាល១លើក ហើយលើកចុងក្រោយ គំរាមចាក់ប្លន់នារីម្នាក់ទៀត តែត្រូវអស់លក្ខណ៍ ដោយសារម្ចាស់កាបូប និងពលរដ្ឋដេញតាមទាន់ឃាត់ខ្លួនប្រគល់ឱ្យ សមត្ថកិច្ចនាំយកទៅចាត់ការតាមច្បាប់ ៕
