ភ្នំពេញ៖នៅក្នុងពិភពសិល្បៈតារាស្រីស្អាតៗជាមុខសញ្ញានៃប្រុសមានទ្រព្យសម្បត្តិស្ដុកស្ដម្ភ ឬសេដ្ឋី ហេតុនេះតារាខ្លះកំពុងឡើងកូដ ស្រាប់តែបាត់ខ្លួនទៅវិញភ្លាមមួយរំពេចក៍មានដោយសារតែរងសម្ពាធពីគូស្នេហ៍ និងមួយចំនួនទៀតចេញទៅរស់នៅបរទេសតាមម្ចាស់ចិត្ត។
សម្រាប់រយៈពេល៣ឆ្នាំចុងក្រោយនេះគេឃើញមានតារាស្រី៥ដួង បានដកខ្លួនពីសិល្បៈ ព្រោះសង្ស័យថាដើម្បីផ្គាប់ចិត្តគូស្នេហ៍ ទើបធ្វើឲ្យតារាស្រីផ្សេងៗទៀតចាប់ផ្ដើមដើរតាមផ្លូវពួកគេកាន់តែច្រើន ព្រោះសម្អាងថាសិល្បៈមិនថិតថេឡើយ ពិសេសឱកាសស្រវាចាប់ទ្រព្យមកដល់មិនឲ្យរហូតពីកណ្ដាប់ដៃ ។
១៖សុខ ស្រីនាងៈអតីតតារាKH និងសាន់ដេរូបនេះបានបាត់មុខទាំងស្រុងពីការច្រៀងសម្ដែងConcerts ទាំងឡាយឆ្នាំ២០២២ -២០២៣ ដោយផ្ដោតលើការចេញទៅដើរកម្សាន្ដនៅក្រៅស្រុកជាបន្ដបន្ទាប់។ប្រភពបានឲ្យដឹងថាស្រីនាង បានជួបម្ចាស់ស្នេហ៍ថ្មីហើយបុរសនោះបានស្នើសុំឲ្យនាងបោះបង់អាជីពចម្រៀងទើបពេលនេះនាងមិនអាចវិលមករកអាជីពចាស់ដែលប្រឹងតស៊ូរយៈពេលជាង១០ឆ្នាំមកហើយនោះទេ។ចំណែកអ្នកដឹកនាំប្រគុំតន្រ្ដីប៉ុស្ដិ៍CNC លោកសេត គឹមសឿន បានឲ្យដឹងថាលោកបានទាក់ទងទៅសុខ ស្រីនាង តាំងពីអំឡុងផ្ទុះកូវីដដំបូងម្លេះ តែចម្លើយនាងថាចង់សម្រាកពីសិល្បៈ ហេតុនេះតាំងពីពេលនោះមកលោកមិនរំពឹងថានាងអាចបន្ដអាជីពចម្រៀងវិញទេ ទើបផ្ដាច់ការទាក់ទងហៅនាងឡើងឆាកជាង២ឆ្នាំទៅហើយ។ដោយឡែកអ្នកដឹកនាំសម្ដែងMV និងភាពយន្ដរបស់ហង្សមាសមួយចំនួនដែលធ្លាប់ជាDirector របស់ស្រីនាង នោះក៍ពួកគេនិយាយស្របគ្នាថាអត់ដែលជួបស្រីនាង ជាច្រើនខែដែរហើយ។
២៖បេប៊ីៈមិនខុសពីស្រីនាង ទេតារាចម្រៀងថោន នាងជុំ រចនាពេជ្រ ហៅបេប៊ី បានផ្អាកអាជីពចម្រៀងតាំងពីផ្ទុះកូវីដម្លេះ ហើយគេក៍សង្ស័យថាបញ្ហានេះដោយសារតែនាងមិនត្រូវបានគូស្នេហ៍អនុញ្ញាត្តិឲ្យលេងសិល្បៈតទៅទៀត ខណៈពេលនេះនាងគ្មានផែនការណ៍ជាក់លាក់នៃការឡើងឆាកសារជាថ្មីឲ្យពិតប្រាកដនោះទេ បើទោះជាវាចាថានៅតែស្រលាញ់អាជីពចម្រៀងដោយគ្មានការប្រែប្រួលចិត្តក្ដី។យ៉ាងណាកាលពីដើមខែឧសភា ឆ្នាំ២០២៣ នៅក្នុងពិធីខួបកំណើតគម្រប់អាយុ២៤ឆ្នាំ នោះបេប៊ី បានប្រាប់អ្នកយកព័តមានយើងថានាងនឹងវិលមកច្រៀងសម្ដែងសារជាថ្មីនៅពេលវេលាសមស្របមួយនាពេលដ៍ខ្លីខាងមុខនេះ។នាងថាការដកឃ្លាពីចម្រៀងមួយរយៈនេះដោយសារតែនាងជាប់ដៃបើកហាងកាហ្វេដែលមានដល់ទៅ៤សាខាផ្សេងគ្នា ហើយនាងជាអ្នកគ្រប់គ្រង អត់មានគូស្នេហ៍ហួងហែងដូចគេម៉ៃនោះទេ។
៣៖សន ផល្លីកាៈអតីតសង្សារVj រតនា រូបនេះបានបាត់ខ្លួនពីហង្សមាសកាលពីដើមខែមករា ឆ្នាំ២០២០ ដែលពេលនោះនាងហោះទៅច្រៀងសម្ដែងនៅអូស្រា្ដលីហើយក៍លែងវិលវិញ ក្រោយមានដំណឹងថានាងបានជួបម្ចាស់ចិត្តស្នេហ៍ថ្មីនៅទីនោះ។មិនមានដំណឹងថានាងផល្លីកា អាចវិលមករកអាជីពចាស់វិញទេ ខណៈដែលមុនដើរចេញពីហង្សមាសនោះនាងបានបែកធ្លាយរឿងជំពាក់បំណុលគេវ័នក ទើបមានការលេចឭថាការទៅសម្ងំនៅអូស្រ្ដាលីរបស់អ្នកចម្រៀងតូចច្រឡឹងមកពីខេត្តសៀមរាបរូបនេះ ព្រោះតែនាងគេចចេញពីម្ចាស់បំណុល និងត្រូវគូស្នេហ៍ថ្មីឃាត់នាងមិនឲ្យចាប់អាជីពចម្រៀងតទៅទៀត។
៤៖គីម ហួរៈអតីតFreshie រូបនេះកំពុងតែលេចធ្លោក្នុងអាជីពសម្ដែងតាមរយៈរឿងភាគធំៗ តែជាង១ឆ្នាំមកនេះនាងបានដកខ្លួនថយពីការងារសិល្បៈទៅវិញ ព្រោះមានដំណឹងថាគូស្នេហ៍របស់នាងមិនពេញចិត្តនាងថតសម្ដែងទៀត។គីម ហួរ ជាស្រីស្អាតផូផង់និងមានត្រេមុខស្រដៀងទៅនិងតារាសម្ដែងល្បីរបស់ថៃនាងKob Suvanant Kongying ហៅនាងផ្កាយព្រឹក តែមិនទាន់មានការបញ្ជាក់ពីនាងផ្ទាល់ថាតើឈប់ពីសិល្បៈជារៀងរហូត ឬគ្រាន់តែផ្អាកមួយអន្លឺនោះទេ។
៥៖គឹម ច័ន្ទបរមីៈអតីតFreshie រូបនេះបានផ្ដាច់ខ្លួនពីសិល្បៈ ក្រោយនាងភ្ជាប់ស្នេហ៍ជាមួយលោកហ៊ុន បញ្ញាបុត្រ ចៅរបស់លោកនាយករដ្ឋមន្រ្ដី ហើយពេលនេះនាងហ៊ឺហាមិនចាញ់តារាបរទេសឡើយ ព្រោះជិះរថយន្ដទំនើបៗសឹងគ្រប់ម៉ាកដូចជាMercedes ,Bentley ,Porsche ជាដើមនិងមានទាំងយន្ដហោះផ្ទាល់ខ្លួនម៉ាកអែប៊ើស ៧២ (Air Bus 72) ទៀតផង។មិនមានដំណឹងថានាងច័ន្ទបរមី អាចនឹងវិលមករកអាជីពចាស់ឡើយ ព្រោះថាពេលនេះនាងសោយសុខលើគំនរទ្រព្យទាំងវ័យក្មេងទៅហើយ៕
