ភ្នំពេញ៖តារាចម្រៀងឃីន ស្រីនាថ ហៅអ៊ីវ៉ា នៅតែចង់បណ្ដើរសង្សារលោកលី សេងហួរ បែបលឹបលៗតទៅទៀត ព្រោះខ្លាចរំខានដល់អាជីពចម្រៀងរបស់នាង ប៉ុន្ដែសកម្មភាពទាំងនេះត្រូវបានម្ចាស់ក្លឹបបាល់ទាត់សៀមរាប យូណាយធីត បដិសេធ ព្រោះតាមព័តមានថាលោកសេងហួរ មានចេតនាចង់បើកស្នេហាមួយនេះជាចំហ ក្រោយធុញទ្រាន់រឿងលាក់លៀមអស់រយៈពេលជាង៧ឆ្នាំកន្លងមក។ចំពោះការដែលម្ចាស់ក្លឹបបាល់ទាត់វ័យក្មេងរូបនេះមិនត្រូវការសាងស្នេហាដោយលាក់លៀមតទៅទៀតនោះដោយសារតែលោកមិនចង់ឲ្យប្រុសដ៍ទៃទៀតតាមញ៉ែស្រីនាថ ព្រោះថាពេលនេះនាងមានម្ចាស់ចិត្តទៅហើយមិនមែននៅទំនេរទេ។ប្រភពបានឲ្យដឹងថាចាប់ពីពេលនេះតទៅពេលអ៊ីវ៉ា ទៅចូលរួមកម្មវិធីអ្នកសិល្បៈរួមអាជីពលោកហួរ នឹងចេញមុខរួមគ្នាជាមួយតារាសាច់សខ្ចីរូបនេះឲ្យបានកាន់តែច្រើន តែស្រីនាថ បែជាហាក់នៅតែចង់រារែកចិត្តសំណើររបស់គូស្នេហ៍មួយនេះព្រោះមិនចង់ឲ្យគេថានាងត្រូវសង្សារតាមស្អិតពេកនោះទេ បើទោះជាលោកហួរ មិនមែនជាបុរសប្រចណ្ឌហួងហែងនាងក្ដី។
តាមព័តមានពីតារាដែលជិតស្និតអ៊ីវ៉ា បានបង្ហើបថាអ្នកចម្រៀងវ័យ៣១ឆ្នាំរូបនេះមានភាគរយខ្ពស់ក្នុងការរៀបការជាមួយលោកលី សេងហួត នៅឆ្នាំ២០២៤ ខាងមុខនេះ ដែលចំណុចសំខាន់នោះមិនមែនតែឪពុកស្រីនាថ លោកអ៊ូ វ៉ាវ ដែលចង់ឃើញកូនស្រីលោកក្រាបផ្ទឹមនៅពេលនោះទេ តែឪពុកម្ដាយខាងប្រុសដែលគេដឹងថាជាអ្នកមានទ្រព្យស្ដុកស្ដមនោះក៍ចង់ឲ្យលោកហួរ រៀបការនៅឆ្នាំក្រោយនេះដែរ ព្រោះថាកាលពីថ្ងៃទី២៥ ឧសភា ឆ្នាំ២០២៣ ប្អូនប្រុសម្ចាស់ក្លឹបបាល់ទាត់រូបនេះគឺលោកលី សេងថៃ ក៍បានការប្រពន្ធមុនបងប្រុសរបស់គេទៅហើយហេតុនេះនៅឆ្នាំ២០២៤ នេះគឺត្រូវដល់វេនលោកហួ វិញម្ដង បន្ទាប់មានព័តមានថាលោកនិងអ៊ីវ៉ា បានក្លាយទៅជាគូដណ្ដឹងនិងគ្នាទៅហើយតាំងពីមុនអ្នកទាំងពីរបណ្ដើរគ្នាឡើងសែនកួចចងដៃថ្ងៃមង្គលការប្អូនលោកហួរ ម្លេះ។ប្រសិនបើគ្មានអ្វីប្រែប្រួលទេអ៊ីវ៉ា នឹងក្លាយទៅជាភរិយាស្របច្បាប់របស់លោកសេងហួរ នៅឆ្នាំ២០២៤ ដែលដំណឹងនេះច្បាស់ណាស់ថានឹងធ្វើឲ្យលោកវ៉ាវ ពេញចិត្តស្ដូកតែម្ដង ព្រោះថាបំណងរបស់លោកគឺបានសម្រេច ខណៈដែលស្រីនាថ បានគេចវែសពីការចូលរោងការនៅដើមឆ្នាំ២០២៣ ធ្វើឲ្យឪពុកនាងមិនពេញចិត្តនោះទេ ព្រោះតែផែនការណ៍លោកចង់បានកូនប្រសារមកជំនួសដៃជើងលោកក្នុងការជូនស្រីនាថ ឲ្យទៅច្រៀងសម្ដែងនៅឆាកតន្រ្ដីទាំងឡាយនោះនៅតែជាបន្ទុកដល់លោកដដែល តែឆ្នាំក្រោយនេះស្រីនាថ អស់លែសក្នុងការដោះសារជាមួយឪពុកទៀតហើយ។
អ៊ីវ៉ា លើកទូរស័ព្ទហើយក៍ចុចផ្ដាច់វិញកាលពីពេលថ្មីៗនេះទើបមិនអាចសួរនាំនាងពីគម្រោងដឹកដៃលោកលី សេងហួរ ចូលរោងការនៅឆ្នាំ២០២៤ នេះបានឡើយ។តែលោកវ៉ាវ ធ្លាប់ប្រាប់អ្នកយកព័តមានយើងថានៅពេលដែលកូនស្រីរៀបការប្ដីហើយរូបលោកមិនខ្លាចថាកូនធ្លាក់កូដ គេលែងគាំទ្រអីនោះទេ ព្រោះតែលោកយល់ថាតារាល្បីឬមិនល្បីគឺនៅលើសម្ថភាព មិនមែនមានប្ដីឬនៅលីវឡើយ។លោកវ៉ាវ ហៅចន្ថា ធ្លាប់បង្ហើបថាលោកមិនប្រកាន់ថាប្ដីកូនស្រីទាល់តែជាបុរសអ្នកមាន ឬក្រនោះទេ ពោលគឺឲ្យតែបុរសនោះនៅលីវ គ្មានប្រពន្ធកូនហើយកូនស្រីលោកពេញចិត្តនោះលោកនឹងពិនឹត្យតាមក្រោយនាង។ប៉ុន្ដែពេលនេះអ្វីៗបានបញ្ជាក់ច្បាស់ថាអនាគតស្វាមីអ៊ីវ៉ា គឺជាកូនសេដ្ឋី ហេតុនេះថ្ងៃក្រោយបើស្រីនាថ មិនឡើងឆាកតន្រ្ដីសកម្មដូចពេលនេះក៍នាងរស់នៅដោយសុខសាន្ដនិងចាយលុយមិនចេះអស់ឡើយ។
ក្រៅពីអ៊ីវ៉ា តារាដែលលេចសញ្ញាមានស្នេហ៍ថ្មីនៅឆ្នាំ២០២៣ នេះមានដូចជានាងហ៊ិន ច័ន្ទនីរ័ត្ន ,សុខ សោម៉ាវត្តី និងណា សាឌី ជាដើមដែលមានខ្លះហ៊ានបង្ហាញចំហខ្លះទៀតខ្លាច។ប្រភពបានឲ្យដឹងថាក្រុមកីឡាករបាល់ទាត់សៀមរាប យូណាយធីត ភាគច្រើនបានគោរពអ៊ីវ៉ា ប្រៀបបានដូចជាម្ចាស់ក្លឹបបាល់ទាត់មួយនេះ ទៅហើយទោះជានាងមិនទាន់ក្លាយទៅជាភរិយារបស់លី សេងហួរ ក្ដី ប៉ុន្ដែជារៀងរាល់ការប្រកួតធំៗនិងព្រឹត្តិការណ៍ទាំងឡាយរបស់ក្លឹបបាល់ទាត់មួយនេះនាងតែងតែមានសកម្មភាពទៅច្រៀងសម្ដែងនិងជូនកាលទៅទស្សនាជាមួយម្ចាស់ក្លឹបដោយរីករាយ។ស្រីនាថ ធ្លាប់វាចាថាចិត្តនាងពីមុនចង់ក្លាយទៅជាកីឡាករប្រភេទកីឡាណាមួយ តែចុងក្រោយបែជាធ្វើតារាចម្រៀង ប៉ុន្ដែយ៉ាងណាគូស្នេហ៍របស់នាងគឺជាអ្នកធ្វើការពាក់ព័ន្ធវិស័យកីឡា តែពេលនោះទោះជាFan ឈ្លេចសួរនាងថាបុរសនោះជាអ្នកណាក៍នាងមិនប្រាប់ជាដាច់ខាត។ប៉ុន្ដែនៅពេលបែកធ្លាយរឿងស្នេហានៅពាក់កណ្ដាលឆ្នាំ២០២៣ ទើបគ្រប់គ្នាដឹងថាអនាគតស្វាមីអ៊ីវ៉ា គឺជាលោកលី សេងហួរ ម្ចាស់ក្លឹបបាល់ទាត់ដ៍ធំមួយនេះនៅសៀមរាបនេះឯង។នៅមិនទាន់ដឹងច្បាស់ថាមង្គលការរបស់អ៊ីវ៉ា បើរៀបចំនៅឆ្នាំ២០២៤ ខាងមុខនេះមែន ថានឹងធ្វើនៅស្រុកកំណើតនាងនៅខេត្តកំពង់ស្ពឺ ឬរៀបចំនៅខេត្តសៀមរៀបទឹកដីគូស្នេហ៍របស់នាងឡើយ៕
