ភ្នំពេញ៖បន្ទាប់ពីបាត់មុខពីការសម្ដែងមួយរយៈតារាសម្ដែងស៊ីណាវ៉ាត់ត្រា បានលេចមុខមកវិញជាមួយឈុតចំណេញដូចមុនដដែលនោះគឺDirector ឲ្យលោកលេងឈុតពិសេសរំលោភទៅលើប្រពន្ធកីឡាករប្រដាល់លោកបឺត សង្ឃឹម តាមរយៈMV បទ”យើងត្រូវតែឈ្នះ”របស់ផលិតកម្មថោន ដែលច្រៀងដោយលោកហង្ស សុវណ្ណារិទ្ធ ទើបចេញថ្មីៗនេះ។ក្នុងឈុតរោលរាលនោះលោកស៊ីណាវ៉ាត់ត្រា អាងទឹកលុយជះយកប្រពន្ធបឺត សង្ឃឹម បានស្រីស្អាតគឹម ស៊ីឡាម ដោយអោបថើបឡើងវក់វីតែម្ដងមិនខ្ចីរវល់ពេលកីឡាករលោកសង្ឃឹម ពកូនមកតាមទាន់នោះទេ…។
លោកស៊ីណាវ៉ាត់ត្រា បានឲ្យដឹងថានេះជាលើកទី១ហើយដែលលោកបានប៉ៈជាមួយនាងស៊ីវឡាម ហេតុនេះដល់ឈុតចាប់រំលោភលោកហាក់ភ័យតិចៗដែរ ក្រោយពីមមាញឹកការងារខាងក្រៅសិល្បៈខានថតMV ជាង២ឆ្នាំ ។ប៉ុន្ដែលោកថាសម្រាប់ឈុតអោបថើបយ៉ាងរោលរាលនោះលោកធ្លាប់សម្ដែងបែបនេះ២ដងរួចមកហើយ តែលោកក៍មិនដឹងថាហេតុអីបានជាអ្នកដឹកនាំតម្រូវឲ្យលោកលេងតែឈុតដែលប្រុសៗគិតថាចំណេញនេះដែរ។តារាសម្ដែងមានស្រុកកំណើតមកពីខេត្តបាត់ដំបងរូបនេះថាទាំងថតជាមួយនាងស៊ីវឡាម និងតារាស្រីផ្សេងទៀតលោកមិនដែលកេងចំណេញលើពួកគេហួសពីអ្នកដឹកនាំសម្ដែងចង់បានឡើយ ពោលគឺបើDirector បញ្ជារឲ្យធ្វើម៉េចលោកធ្វើហ្នឹងមិនហ៊ានល្មើសនោះទេ។លោកថាសម្រាប់ការជួបជាមួយស្រីស្រស់ស៊ីវឡាម នេះលោកមានអារម្មណ៍ថាចាប់ដៃនាងហើយយ៊ីអ៊ុនឡើងជាងមុន ព្រោះតួស្រីរូបនេះអត់ចេះប្រកាន់ខ្លួនស្រួលលេងជាមួយ ហើយលោកបានថតប្លង់រំលោភនោះខុសដល់ទៅ៥ដង ទើបស៊ីវឡាម បង្រៀនលោកវិញម្ដងថាធ្វើចេះៗ….សើច។លោកថាបទ”យើងត្រូវតែឈ្នះ”នេះតភាគពីបទ”ប្រពន្ធក្បត់”ដែលលោកបានថត២បទជាប់គ្នាតែម្ដងនៅថោន ។
ក្រៅពីត្រូវប៉ាន់ក្នុងឈុតពិសេសជាបន្ដបន្ទាប់នោះលោកស៊ីណាវ៉ាត់ត្រា ក៍ធ្លាប់សម្ដែងភាពយន្ដអប់រំ និងរឿងភាគមួយចំនួនទៀតដែរ។តារាសម្ដែងដែលរៀនចប់ផ្នែកធនាគាររូបនេះថាទោះជាលោកមមាញឹកការងារខ្លះនៅខាងក្រៅយ៉ាងណា ប៉ុន្ដែលោកមិនចោលសិល្បៈនោះទេ ព្រោះថាអាជីពមួយនេះជាផ្នែកមួយនូវអ្វីដែលលោកបានស្រលាញ់បំផុត។លោកបន្ថែមថាទាំងស្រីស្រស់ស៊ីវឡាម និងតារាស្រីស្អាតមួយចំនួនទៀតដែលលោកធ្លាប់លេងឈុតក្ដៅសាច់ជាមួយនោះថតចប់ អារម្មណ៍ធម្មតា រាប់អានគ្នាជាបងប្អូន អត់ដែលចង់អូសក្រឡាស្រីស្អាតណាឲ្យលេងឈុបបែបនេះនៅក្រៅឆាកម្ដងណាឡើយ៕
