ភ្នំពេញ៖មុននេះមានភាពស្រពិចស្រពិលថាស្រីស្អាតជុំ រចនាពេជ្រ ហៅនាងបេប៊ី អាចនឹងដើរតាមផ្លូវនាងសុខ ស្រីនាង ដែរពោលគឺនឹងបញ្ចប់អាជីពចម្រៀងកណ្ដាលទីក្រោយនាងខកខានឡើងឆាកតន្រ្ដីអស់រយៈពេលជិត៣ឆ្នាំ។ប្រភពខ្លះថាការដែលបេប៊ី មិនអាចបន្ដអាជីពចាស់នេះដោយសារតែនាងត្រូវរងសម្ពាធពីគូស្នេហ៍ហួងហែងលែងឲ្យនាងច្រៀងរាំ តទៅទៀត ខណៈដែលសាមីខ្លួនបានអះអាងម្ដងហើយម្ដងទៀតថានាងគ្មានប្រុសស្នេហ៍ណាដាក់សម្ពាធនោះទេ តែការផ្អាកពីអាជីពសិល្បៈជាច្រើនខែមកនេះដោយសារតែនាងជាប់ដៃក្នុងការបើកហាងកាហ្វេពង្រីកសាខាជាបន្ដបន្ទាប់ ទើបចេះតែពន្យាពេលជាបន្ដបន្ទាប់បែបនេះ។ប៉ុន្ដែការប្រាប់ហេតុផលរបស់នាងរចនាពេជ្រ នោះមិនសូវត្រូវបានគេជឿរជាក់ច្រើនឡើយ ព្រោះសម្អាងថាការគ្រប់គ្រងហាងកាហ្វេអាចជួលឲ្យគេធ្វើការជំនួសបានតើចុះម៉េចបាននាងទៅធ្វើកិច្ចការនោះដោយខ្លួនឯង សុខចិត្តចោលអាជីពចាស់?
យ៉ាងណាជុំវិញអាជីពចម្រៀងរបស់បេប៊ី នេះម្ដាយតារាថោន រូបនេះបានប្រាប់អ្នកយកព័តមានយើងតាមឆាតហ្វេសបុកកាលពីទី១៦ សីហា ថានាងរចនាពេជ្រ នឹងវិលមកវិញនៅចុងឆ្នាំ២០២៣ ខាងមុខនេះហើយ។លោកស្រីប៊ុន ណារី ដែលតែងតែជូនកូនទៅសម្ដែង ,ធ្វើពិធីការិនី និងច្រៀងតាមបណ្ដារឆាកតន្រ្ដីទាំងឡាយជាច្រើនឆ្នាំទៅហើយនោះបានប្រាប់ថាមូលហេតុដែលបេប៊ី ត្រូវវិលមកវិញនៅឆ្នាំនេះគឺដោយសារតែពេលនេះការរៀបចំហាង ឬធ្វើអាជីវកម្មដែលនាងស្រលាញ់នោះរួចរាល់អស់ហើយ ទើបកូនលោកស្រីត្រូវតែធ្វើតាមសន្យាមិនឲ្យលើសពីឆ្នាំនេះឡើយ។លោកស្រីណារី បន្ថែមថាបច្ចុប្បន្នបេប៊ី កំពុងតែរៀបចំហាត់សម និងការសម្ដែងឡើងវិញមុនពេលនាងឡើងឆាកជាថ្មីក្នុងពេលឆាប់ៗនេះ។
ការចេញមុខបញ្ជាក់ច្បាស់ៗរបស់លោកស្រីប៊ុន ណារី នាពេលនេះជាការចង់បន្ថែមទៅលើបេប៊ី ដែលកន្លងមកនាងថានឹងមិនបោះបង់អាជីពចម្រៀងចោលជាដាច់ខាតព្រោះថាការងារមួយនេះជាផ្នែកមួយនាងដែលនាងស្រលាញ់បំផុតនោះ តែគេមិនសូវជឿរជាក់លើនាងនោះទេ ព្រោះថានាងរចនាពេជ្រ តែងតែនិយាយបែបនេះច្រើនលើកច្រើនសារមកហើយ តែចុងក្រោយគេនៅតែមិនឃើញនាងវិលមកច្រៀងរាំតាមឆាកតន្រ្ដីដូចមុនដដែល។
បេប៊ី ធ្លាប់ប្រាប់អ្នកយកព័តមានយើងថាដោយសារតែនាងបាត់មុខពីអាជីពចម្រៀងជាច្រើនខែពេកហេតុនេះនាងយល់ថាបើចេញមកគ្រាន់តែធម្មតាៗនោះគឺមិនអាចទៅរួចឡើយ ពោលគឺទាល់តែមានអ្វីដែលថ្មីនិងប្លែកបំផុតទើបគេចាប់អារម្មណ៍។ស្រីស្រស់ថាចំពោះកិច្ចសន្យារបស់នាងនៅថោនវិញគឺនៅមិនទាន់ផុតកំណត់នោះទេ ហេតុនេះនាងនៅតែជាតារាថោន ហើយចេញបទចម្រៀងនៅផលិតកម្មនេះតទៅទៀត។
គូររំលឹកថាបេប៊ី បានបោះបង់អាជីពសម្ដែងនិងពិធីការិនីដែលនាងបានតស៊ូរយៈពេលជាង១០ឆ្នាំ ដើម្បីមកផ្ដោតតែការធ្វើជាអ្នកចម្រៀងនៅថោនមួយមុខប៉ុណ្ណោះ តែមិនទាន់ឈជើងស៊ប់ និងវាយលុកទីផ្សារបានរឹងមាំនៅឡើយនាងក៍ដកថយទៅវិញអស់៣ឆ្នាំ ទើបពេលនេះត្រៀមចេញស្ដារមុខជាថ្មី តែនាងមិនប្រាប់ថានឹងត្រៀមបញ្ចេញបទចម្រៀងប៉ុន្មានបទដើម្បីឲ្យងាកមកចាប់អារម្មណ៍លើខ្លួនវិញឡើយ។ចំណុចសំខាន់មួយទៀតដែលនាងរចនាពេជ្រ ត្រូវធ្វើនោះគឺការសម្រកទម្ងន់ជាបន្ទាន់ផងដែរ ព្រោះពេលនេះគេឃើញនាងហាក់ដូចជាមានព្រលឹងជាងមុន។
បេប៊ី ជាតារាចម្រៀងម្នាក់ដែលវិត្តន៍ខ្លួនពីអាជីពតារាចម្ដែងដូចគ្នាទៅនិងនាងពេជ្រ សូលីកា ,ទេព បូព្រឹក្ស និងអេន ជី ជាដើម ហើយមុនវិលមកកាន់ក្បាលមីក្រូម្ដងទៀតនេះនាងរចនាពេជ្រ ក៍ទើបតែទិញបានផ្ទះវីឡារទោលយ៉ាងប្រណិត១តម្លៃខ្ទង់ជាង៣០ម៉ឺនដុល្លារ នៅបុរីជីពម៉ុង៥៩៨ សង្កាត់ច្រាំងចម្រេះ២ ខណ្ឌឬស្សីកែវ រាជធានីភ្នំពេញ និងបើកហាងកាហ្វេសាខាទី៥ នៅផ្លូវជាតិលេខ២ (កួរស្រូវ)ផងដែរ។
អ្នកស្រីណារី បន្ថែមថាថ្មីៗនេះបេប៊ី ក៍ត្រូវបានសម្អាងការមួយចំនួនហៅថតស្ពតជាបន្ដបន្ទាប់ផងដែរ មុនឡើងឆាកមកវិញនេះ ចំណែកអាជីវកម្មហាងកាហ្វេជាច្រើនសាខានោះកាក់កបគូរសម។ម្ដាយបេប៊ី មិនទាន់បង្ហាញដំណឹងល្អថាបេប៊ី នឹងត្រៀមចូលរោងការនៅពេលណាឡើយ ខណៈដែលមុនបាត់ជាច្រើនខែនេះមានព័តមានថានាងរចនាពេជ្រ ត្រូវលោកឧកញ៉ាម្នាក់ និងអភិបាលខណ្ឌមួយ តាមស្នេហានាងព្រមគ្នាតែម្ដង តែដំណឹងនោះត្រូវបានបេប៊ី និងម្ដាយថាអត់ស្គាល់បុរសទាំងពីរនាក់នោះថាជាអ្នកណាទេ៕