ភ្នំពេញ៖លោកព្រាប សុវត្ថិ គម្រប់ខួបរយៈពេល៣ឆ្នាំគត់នៅខែសីហា ឆ្នាំ២០២៣ នេះនៃការដើរចេញពីហង្សមាសចូលGalaxy បន្ទាប់ពីលោកបានរួមរស់ជាមួយហង្សមាសរយៈពេល២៣ ឆ្នាំ(១៩៩៧-២០២០)។អ្នកគាំទ្រព្រាប សុវត្ថិ មានការលើកឡើងខុសៗគ្នាជុំវិញការទៅដល់ទ្រនុំថ្មីរបស់ព្រាប សុវត្ថិ ដោយខ្លះយល់ថាលោកសុវត្ថិ មិនមានបទចម្រៀងល្បីៗខ្លាំងដូចកាលនៅហង្សមាសនោះទេ ខណៈដែលខ្លះទៀតថាជាជម្រើសល្អរបស់តារាវ័យ៤៨ឆ្នាំ រូបនេះដែលតាំងពីមកដល់ផលិតកម្មថ្មីលោកឈប់ច្រៀងចម្រៀងចម្លងពីចិន និងថៃ ដូចមុនទៀតហើយ។ប៉ុន្ដែសំណួរដែលមហាជនចង់ដឹងថាតើរយៈពេល៣ឆ្នាំរបស់លោកព្រាប សុវត្ថិ ដែលជ្រកនៅGalaxy នេះលោកចុះខ្សោយជាងកាលច្រៀងនៅហង្សមាស ,នៅទ្រឹង ឬមួយខ្លាំងជាងមុន?
អតីតតារាចម្រៀងហង្សមាសលោកនូ ស៊ឹប បានប្រាប់អ្នកយកព័តមានយើងតាមទូរស័ព្ទកាលពីរសៀលថ្ងៃទី១៥ សីហា ថាទីផ្សារចម្រៀងព្រាប សុវត្ថិ គ្មានការប្រែប្រួលច្រើនទេតាំងពីចេញពីហង្សមាសមកGalaxy ៣ឆ្នាំនេះ។តែលោកថាអ្វីដែលព្រាប សុវត្ថិ ប្រែប្រួលតាំងពីទៅផលិតកម្មថ្មីនោះគឺលោកគិតតែពីរឿងរកស៊ីច្រើនជាងមុន ហើយមិនសូវមានទំនាក់ទំនងជាមួយសិល្បករជាទូទៅច្រើនដូចកាលច្រៀងនៅហង្សមាសឡើយ។លោកនូ ស៊ឹប ថាដោយសារតែព្រាប សុវត្ថិ លែងបុកទីផ្សារចម្រៀងដូចមុន ឬបញ្ចេញសម្ថភាពមិនអស់បែបនេះ ហើយទើបលោកមិនអាចនិយាយបានថាព្រាប សុវត្ថិ ខ្លាំង ឬខ្សោយជាងមុនបានទេ តែអាចនិយាយបានថាគ្មានការប្រែប្រួល។
ព្រាប សុវត្ថិ នៅសល់ពេល២ឆ្នាំទៀតជាមួយGalaxy ពោលគឺនៅឆ្នាំ២០២៥ ទើបលោកចប់កុងត្រាតំណាក់កាលទី១ជាមួយផលិតកម្មមួយនេះក្នុងរយៈពេល៥ឆ្នាំ ខណៈដែលតាមព័តមានថាផលិតកម្មថ្មីតែហ៊ានចាយលុយធំនេះចង់បន្ដចំនួនកុងត្រាថ្មីដល់លោកសុវត្ថិ ១០ឆ្នាំថែមទៀតពោលគឺដល់ឆ្នាំ ២០៣៥ ឯណ្ណោះ ដែលពេលនោះលោកសុវត្ថិ មានអាយុ៥៨ឆ្នាំ ។មតិខ្លះបានលើកឡើងថាបើព្រាប សុវត្ថិ នៅតែរយាលៗពីការចេញបទចម្រៀងបែបនេះទៀតនោះនឹងត្រូវ”រលកក្រោយ ច្រានរលកមុន”ជាមិនខាន” តែខ្លះទៀតយល់ថាពេលនេះលោកសុវត្ថិ ក្លាយទៅជាឧកញ៉ាទៅហើយ ហេតុនេះ មិនអាចផ្ដោតតែលើអាជីពចម្រៀងតែមួយច្រកដូចមុនបានទេ គឺត្រូតែពង្រឹងលើការធ្វើជំនួញទើបអាចពង្រីកទ្រព្យបានថែមទៀត។
លោកនូ ស៊ឹប បន្ថែមថាធម្មតាទេកាលណាមានលុយគេត្រូវតែធ្វើជំនួញអីចឹងហើយ ព្រោះអាជីពចម្រៀងទោះជាល្បីដូចព្រាប សុវត្ថិ បានតម្លៃខ្លួនខ្ពស់មែន តែមិនមែនបានលុយនោះមកទាំងដុលទេ គឺពេលខ្លះផលិតកម្មក៍គេដកខ្លះដែរ ។លោកថាថ្មីៗនេះឃើញព្រាប សុវត្ថិ ធ្វើពិធីមួយប្រគល់ប្លង់ដីធ្លីទៅអតិថនគាត់ អីចឹងបញ្ជាក់ថាគេគិតគូរឿងរកស៊ីហ្នឹងច្រើនជាងបទចម្រៀង ស្របពេលដែលរូបលោកតាំងពីលោកសុវត្ថិ ឡើងជាឧកញ៉ាមកមិនដែលបានជួបគ្នាផ្ទាល់ដូចមុននោះទេ។
ថ្វីត្បិតតែលោកនូ ស៊ឹប ថាលោកព្រាប សុវត្ថិ តាំងពីទៅច្រៀងនៅGalaxy មកងាកមកវាយលុកធ្វើជំនួញច្រើនជាងកាលនៅហង្សមាសក្ដី ប៉ុន្ដែក្នុងជំនួបកន្លងមកលោកសុវត្ថិ បានអះអាងថាក្រោយទទួលបានគោរម្យងារជាឧកញ៉ានេះមកលោកគិតទៅលើការរកស៊ី និងអាជីពចម្រៀងស្មើគ្នា មិនអាចព្រលែងមួយណាបានទេ។លោកសុវត្ថិ ថែមទាំងថាបើមិនរកស៊ី ឬធ្វើជំនួញទេ អត់ទៅមុខឡើយ។
សូមបញ្ជាក់ថាព្រាប សុវត្ថិ នៅតែជាតួឯករបស់Galaxy បើទោះជាគូប្រជែងចាស់របស់លោកគឺលោកខែម ប៊ុនថៃ ទៅរួមទ្រនុំប៉ៈគ្នាជាលើកទី២ក្ដី តែថៅកែមិនហ៊ានមើលរំលងលោកឡើយ។មជ្ឈដ្ឋានមហាជនលើកឡើងថាទោះជាពេលនេះព្រាប សុវត្ថិ លែងច្រៀងក៍លោកមិនប្រឈមហានិភ័យដែរ ព្រោះកាលពីខែកញ្ញា ឆ្នាំ២០២០ ទីប្រឹក្សាររបស់លោកធ្លាប់ទម្លាយប្រាប់អ្នកកាសែតថាលោកសុវត្ថិ សល់ទ្រព្យខ្ទង់៣០លានដុល្លារ ពីការចាប់អាជីពចម្រៀងរយៈពេលជាង២០ឆ្នាំ។ក្រៅពីត្រូវបានគេចាត់ទុកថាជាតារាចម្រៀងដែលល្បីល្បាញបានយូឆ្នាំជាងគេនោះលោកសុវត្ថិ ក៍ជាមន្រ្ដីក្នុងជូររាជការមានក្របខណ្ឌនៅក្រសួងការពារជាតិដែលបច្ចុប្បន្នលោកមានឋានន្ដរស័ក្កជាជាវីរៈសេនីឯក និងជានាយរងការិយាល័យទី៥នៃកងទ័ព្ទជើងគោក។Fan របស់លោកព្រាប សុវត្ថិ ចង់ឃើញលោកឧកញ៉ារូបនេះចេញបទខ្លាំងៗដូចមុន និងមានដៃគូដ៍សាកសមជាមួយលោក ព្រោះពេលនេះលោកឆ្លងឆ្លើយតែជាមួយនាងតន់ ច័ន្ទសីម៉ា ម្នាក់ ហើយអ្នកនិយមចម្រៀងលោកនៅតែស្ដាប់បទចាស់ៗជាងបទថ្មីៗ៕
