ភ្នំពេញ៖កាលពី៦ឆ្នាំមុនមាស សុខសោភា ធ្លាប់បានចេញបទចម្រៀងដែលមានចំណងជើងថា”ឧត្តមស្វាមី” ដែលអត្ថន័យទាំងមូលនាងចង់លើកពីគុណសម្បត្តិរបស់ស្វាមីនាងលោកអ៊ឹត រ៉ាដា ជាបុរសល្អក្នុងដួងចិត្ត និងហ៊ានលះបង់គ្រប់យ៉ាងដើម្បីនាង…ហើយបទនោះក៍ត្រូវសាច់រឿងទូទៅចំពោះស្តី្រទាំងឡាយដែលមានស្វាមីល្អផងដែរ។ដោយឡែកនៅសល់តែជិត៤ខែទៀតនឹងដល់ថ្ងៃខួបអាពាហ៍ ពិពាហ៍ គម្រប់១៤ឆ្នាំ នោះសុខ សោភា បានចេញបទថ្មីមួយទៀតនៅផលិតកម្មផ្ទាល់ខ្លួនCamtraxmusic នោះគឺបទ”អរគុណប្ដីសម្លាញ់” ដែលលើកនេះក៍មិនខុសពីមុនដែរគឺនាងច្រៀងលើកសរសើរនូវភក្ដីភាពរបស់ប្ដីមានចំពោះនាងដូចគ្នា ប៉ុន្ដែម្ដងនេះសុខសោភា បានយកស្វាមីនាងលោកអ៊ឹត រ៉ាដា ស្លៀកឈុតប្រពៃណីខ្មែរថតសម្ដែងជាមួយនាងតែម្ដងដើម្បីឲ្យត្រូវទៅនិងសាច់រឿងពិតរបស់នាង មិនចាំបាច់ហៅតារាសម្ដែងប្រុសមកថតនាំតែពិបាកបញ្ចូលអារម្មណ៍។មនុស្សជាច្រើនបានសរសើរមាស សុខសោភា ថានាងជាតារាម្នាក់ដែលស្រលាញ់ស្វាមីខ្លាំងណាស់ ហើយទំហ៊ុំចិត្ត បេះដូងរបស់នាងបង្ហាញទាំងនៅលើបទចម្រៀងផងនិងសកម្មភាពជាក់ស្ដែងតែម្ដង។ប៉ុន្ដែជុំវិញការដែលសុខសោភា ដឹកដៃប្ដីថតឈុតកូនក្រមុំកំលោះក្នុងMV នោះអ្នកខ្លះយល់ថាវាមិនមែនជារឿងចៃដន្យនោះទេ តែវាការតេស្ដឬសមឲ្យហើយនូវឈុតប្រពៃណីដ៍ស្រស់ស្អាតនោះមុនពេលដែលអ្នកទាំងពីរប្រថុយរៀបការជាលើកទី៣ ជាចំហជាមួយគ្នានោះ។
គូរបញ្ជាក់ថាមាស សុខសោភា បានចាប់ដៃអាណិកជនខ្មែរមកពីកាណាដាលោកអ៊ឹត រ៉ាដា រយៈពេល១៦ឆ្នាំ(២០០៧-២០២៣)មកហើយដែលអ្នកទាំងពីរធ្លាប់បានរៀបការ២លើកគឺធ្វើដោយលួចលាក់ដូចគ្នានោះគឺលើកទី១នៅឆ្នាំ២០០៨ ដែលរៀបការតាមបែបគ្រីស្ទាននៅព្រះវិហារមួយនៅកាណាដា និងលើកទី២ឆ្នាំ២០០៩ រៀបការបង្រ្គប់កិច្ចស្រដៀងសែនព្រេនតាមប្រពៃណីខ្មែរនៅថ្ងៃទី២៨ ធ្នូ ឆ្នាំ២០០៩ ។ជារៀងរាល់ឆ្នាំនៅថ្ងៃខួបអាពាហ៍ ពិពាហ៍ របស់ខ្លួនមាស សុខសោភា តែងតែចេញសារលើកពីគុណសម្បត្តិដល់ប្ដីថាជាបុរសល្អ ហ៊ានធ្វើអ្វីៗគ្រប់បែបយ៉ាងទាំងអស់ដើម្បីរូបនាងហើយនាងសែនកក់ក្ដៅខ្លាំងណាស់។តែសុខសោភា មិនបញ្ជាក់ថាប្ដីនាងហ៊ានលះបង់យ៉ាងណាខ្លះចំពោះនាងឡើយ តែតាមព័តមានថាលោករ៉ាដា នេះបានបោះបង់អាជីពជាគ្រូពេទ្យម្នាក់នៅកាណាដាដើម្បីមករស់នៅតាមនាងនៅខ្មែររហូតមកដល់បច្ចុប្បន្ន ក្រោយពីដំណឹងសុខសោភា ចង់ចេញទៅរស់នៅកាណាដាតាមលោកកាលពីឆ្នាំ២០១០ ត្រូវបានលុបចោលទៅវិញ។ក្រៅពីនេះនៅតាមបណ្ដារឆាកតន្រ្ដីទាំងឡាយលោករ៉ាដា តែងតែយូសម្លៀកបំពាក់របស់សុខសោភា ចេញពីក្នុងរថយន្ដយកទៅបន្ទប់សម្លៀកបំពាក់ភរិយា ហើយលោកក៍ជាអ្នកចាក់ភ្លេងឲ្យសោភា ច្រៀងនិងថតរូបពីសកម្មភាពរបស់នាងសម្ដែងគ្រប់ឆាកតន្រ្ដីតែម្ដង។រឿងដែលកាន់តែពិសេសនោះលោករ៉ាដា សម្របខ្លួនតាមប្រពន្ធរបស់លោកជានិច្ចក្នុងនោះមានដូចជានៅពេលដែលនាងស្លៀកពាក់ស៊ិចស៊ីខ្លាំងរងការរិះគន់ថានាងលេងខ្លួនមិនសាកសមជាតារាល្បីលំដាប់ជូរមុខដូចជាហ៊ានស្លៀកឈុតប៊ីគីនីថតMV និងពាក់អាវវែនតា គ្របតែស្បៃស្ដើងៗច្រៀងនៅតាមក្លឹបរហូតធ្វើឲ្យតារាកំពូលទើបម៉ៃ សុគន្ធ នៅមិនសុខនោះតែសម្រាប់លោករ៉ាដា វិញបានលើកទឹកចិត្តភរិយាកាន់តែខ្លាំងទៅវិញ។
មានរឿងសំខាន់មួយទៀតដែលគេសឹងតែមិនជឿរនោះគឺពេលខ្លះសុខសោភា ត្រូវបានលោកឆន សុវណ្ណរាជ អោបថើប ហើយតារាហង្សមាសបានដឹកដៃនាងទៅអោបរឹតគ្នាយ៉ាងរ៉ូមែនទិកនៅមាត់ឆ្នេរទៀតផង តែលោកគ្រូពេទ្យរូបនេះមិនត្រឹមតែអត់ឆេះដុំនោះទេ តែលោកថែមទាំងជាអ្នកថតរូបឲ្យទៀតផង។សកម្មភាពរបស់ស្វាមីមាស សុខសោភា បែបនេះគេជឿរថាគ្មានបុរសច្រើនប៉ុន្មានទេដែលអាចធ្វើចិត្តបានដូចលោកអ៊ឹត រ៉ាដា ហេតុនេះហើយបានជាសោភា ចេញសារលើកមុខមាត់ប្ដីជារៀងរាល់ឆ្នាំហើយមិនអស់ចិត្តថែមទាំងបញ្ចេញបទចម្រៀងលើកពីគុណសម្បត្តិរបស់ប្ដីឲ្យមនុស្សទាំងនគរបានស្ដាប់ទាំងអស់គ្នាតែម្ដង។ចំណុចទាំងនេះបញ្ជាក់ថាសុខសោភា មានស្វាមីជាទីគាប់ចិត្តដូចបំណងរបស់នាងចង់បាន ពោលគឺលោករ៉ាដា យល់ពីអាជីពរបស់នាងច្បាស់ណាស់មិនចេះតែប្រចណ្ឌផ្ដែសផ្ដាសនោះទេ។
ថ្វីត្បិតតែមាស សុខសោភា សរសើរស្វាមីពេញៗមាត់ក្ដី ប៉ុន្ដែមជ្ឈដ្ឋានមហាជនខ្លះបានលើកឡើងថាសោភា ក៍លះបង់សម្រាប់អាណិកជនឆ្លងទ្វីពរូបនេះមិនធម្មតាដែរ ព្រោះនាងបានផាត់ចោលមន្រ្ដីធំមួយចំនួនតាមស្នហា មិនចាប់អារម្មណ៍ងារជំទាវ ដើម្បីប្រគល់បេះដូងជូនលោករ៉ាដា តែម្នាក់នេះ…។យ៉ាងណាទស្សនិកជនរងចាំមើលថាតើសុខសោភា នឹងស្វាមីហ៊ានគ្រងឈុតអាពាហ៍ ពិពាហ៍ នៅក្រៅឆាកដូចក្នុងMV ដែរឬទេនៅចុងឆ្នាំ២០២៣ ឬដើមឆ្នាំ២០២៤ ?
