ភ្នំពេញ៖នៅ សុនិតា បានគ្រងឈុតដូនជីដោយស្លៀកសពាក់ស ហើយនាងសម្រួលអារម្មណ៍ដោយស្ងប់ស្ងាត់តាមរយៈការធ្វើសមាធិដល់ទៅ២យប់៣ថ្ងៃ ចាប់ផ្ដើមតាំងពីថ្ងៃទី២៨ សីហា នៅក្នុងវត្តពុទ្ធមណ្ឌុលវិប្សស្សនាធុរៈនៃព្រះរាជាណាចក្រកម្ពុជា ជាមួយដូនជីមួយចំនួនទៀតដែលខ្លះក៍ជាជំទាវដូចនាងដែរ។
នៅ សុនិតា ថ្លែងសារថា”រក្សាចិត្ត សន្សំកុសល(វិបស្សនា)ផ្ញើរចិត្តបរិសុទ្ធ នៅក្នុងវត្តពុទ្ធមណ្ឌុលវិប្សស្សនាធុរៈនៃព្រះរាជាណាចក្រកម្ពុជា ដោយបាយបាត និងស្នាក់អាស្រ័យនៅកុដិរយៈពេល២យប់៣ថ្ងៃ ដើម្បីធ្វើការហ្វិកហាត់ចម្រើន”អានាបាណសតិ”ការសមាធិ (អង្គុយចង្រ្កម) ចិត្តស្ងប់ប្រកបដោយកុសល លាងបាបអតីត និងបច្ចុប្បន្ន ដើម្បីប្រព្រឹត្តដំណើរជីវិតឲ្យបានល្អប្រសើរ ទាំងផ្លូវកាយ និងចិត្ត ករុណាសូមអរព្រះគុណ គុណម្ចាស់ដែលបានយកចិត្តចំពោះយើងខ្ញុំព្រះករុណាដោយជ្រះថ្លា”។
គេនៅមិនទាន់ដឹងថាមូលហេតុអីបានជានៅ សុនិតា ជ្រើសយកការសមាធិដោយមានរូបភាពខ្លះនាងអង្គុយនិងដើរបិតភ្នែកតែម្នាក់ឯងទៀតផង ហាក់ដូចជាចង់បំភ្លេចរឿងរ៉ាវមួយចំនួន តែតាមព័តមានថាជំទាវៗដែលស្និតនាងបបួលតារាកូន១រូបនេះទៅតាំងសមាធិដើម្បីឲ្យអារម្មណ៍ស្ងប់។ការផ្ញើរខ្លួននៅកុដិ២រាត្រីរបស់សុនិតា នាពេលនេះដែរបង្ហាញថានាងចង់ឲ្យជីវិតបានស្គាល់នូវអ្វីដែលជាទីស្ងប់ដែលកន្លងមកមិនមែនតែនាងម្នាក់ទេ ប៉ុន្ដែតារាចម្រៀងឱក សុគន្ធកញ្ញា ក៍ធ្លាប់ធ្វើសមាធិបែបនេះដោយខ្លួនឯងនៅផ្ទះផងដែរ ខណៈដែលតារាចម្រៀងអឿន ស្រីមុំ វិញនាងបានជ្រើសវិធីសមាធិនេះអស់រយៈពេលជាច្រើនឆ្នាំមកហើយនៅវត្តនិគ្រោធវ័ន ហៅវត្តគល់ទទឹង ហើយនាងប្រាប់អ្នកយកព័តមានយើងថាលែងយកប្ដីអស់១ជីវិតចាប់ពីពេលនេះតទៅ ក្រោយពេលនាងបានជួបរឿងស្នេហាមិនសមប្រកបជាច្រើនលើកច្រើនសារ។
គេកត់សម្គាល់ថាអំឡុងពេលដែលនៅ សុនិតា បានទៅតាំងសមាធិ៣ថ្ងៃនេះរឿងស្នេហារបស់នាងជាមួយឯកឧត្តមទឹត ថាវរិទ្ធ នៅតែមានភាពស្រពេចស្រពិលនៅឡើយ ព្រោះដំណឹងខ្លះថានិតា និងស្វាមីបានចែកផ្លូវគ្នាទៅហើយ ពោលគឺរស់នៅផ្ទះផ្សេងគ្នាខណៈដែលរូបនាងបានចុះចេញពីផ្ទះវីឡារធំស្កឹមស្កៃនៅបុរីប៉េង ហួត (បឹងស្នោរ)ទៅរស់នៅផ្ទះល្វែងយ៉ាងសាមញ្ញនៅម្ដុំស្ពានគីឡូលេខ៩ សង្កាត់ព្រែកលាភ តែលោកថាវរិទ្ធ នៅតែទៅជួបកូនបុ្រសរបស់លោកដែលនៅជាមួយនាងជាញឹកញាប់ ពោលគឺនៅមានទំនាក់ទំនងរាប់អានគ្នាជាធម្មតាមិនយកគ្នាជាសត្រូវឡើយ។ប៉ុន្ដែកាលពីខែឧសភា ឆ្នាំ២០២៣នៅថ្ងៃបើកស៊ីហ្គេម២០២៣ គេឃើញរូបភាពខ្លះបានបង្ហាញថាសុនិតា និងលោកថាវរិទ្ធ បានថតជាមួយគ្នាហាក់ដូចជាគ្មានរឿងអ្វីកើតឡើងទៅវិញ ហើយនិតា ថែមទាំងចេញសារលើកទឹកចិត្តដល់ឪពុកកូនប្រុសនាងពេលរាជរដ្ឋាភិបាលតំឡើងឋានៈឲ្យទៀតផង ដែលធ្វើឲ្យមានការលើកឡើងថាអ្នកទាំងពីរត្រូវរ៉ូវគ្នាវិញហើយ។
តែនៅលើហ្វេសបុករបស់នៅ សុនិតា និងលោកទឹត ថាវរិទ្ធ កាលពីថ្ងៃទី៣០ សីហា គេមិនឃើញអ្នកទាំងពីរបង្ហាញពីសកម្មភាពណាមួយស្និតស្នាលគ្នាបែបជាប្ដីប្រពន្ធគ្នាទៀតឡើយ ពោលគឺម្ខាងៗមានតែថតរូបជាមួយកូនប្រុសដូចគ្នាតែប៉ុណ្ណោះ។សកម្មភាពបែបនេះនាំឲ្យមានការសង្ស័យថាចំណងស្នេហាសុនិតា និងលោកថាវរិទ្ធ នៅតែអាថ័កំបាំងដែលធ្វើឲ្យតំណែងជំទាវរបស់សុនិតា គ្មានសុវត្ថិភាពនោះទេ បើទោះជាតារារួមអាជីពនៅតែហៅនាងថាជាជំទាវៗក្ដី។ ទាក់ទងរឿងស្នេហាសុនិតា និងលោកថាវរិទ្ធ នេះអ្នកយកព័តមានយើងធ្លាប់ទូរស័ព្ទទៅសួរស្វាមីនិតា តែត្រូវបានលោកនិយាយយ៉ាងខ្លីថាពាក់ព័ទ្ធរឿងគ្រួសារលោកមិនចង់បកស្រាយតាមសារព័តមានទេ។ប៉ុន្ដែមានភស្ដុតាងមួយចំនួនបញ្ជាក់ថាលោកថាវរិទ្ធ ហាក់ទទួលស្គាល់ថាចំណងស្នេហាលោកនិងសុនិតា ពិតជាប្រេះឆានោះគឺពេលខ្លះគេឃើញលោកចែកចាយ(Share)សារព័តមានតាមOnline ដែលផ្សព្វផ្សាយរឿងស្នេហាលោកប្រែប្រួលនេះនៅលើហ្វេសបុករបស់លោកទៅវិញ។ចំណែកសុនិតា អំឡុងពេលដែលមានដំណឹងថានាងចែកផ្លូវជាមួយប្ដីនេះគេឃើញនាងក៍បានវិលមកចាប់អាជីពចាស់ជាអ្នកបង្ហាញម៉ូដ ,ពិធីការិនី ជាដើម បើទោះជានាងបានផ្អាកពីការងារទាំងនេះតាំងពីក្លាយទៅជាភរិយារបស់លោកថាវរិទ្ធ ក្ដី។
គូររំលឹកថានៅ សុនិតា ធ្លាប់មានព័តមានថានាងបានភ្ជាប់ពាក្យជាមួយលោកទឹត ថាវរិទ្ធ កាលពីថ្ងៃទី៥ ខែកញ្ញា ឆ្នាំ២០១៨ តែនាងអត់ព្រមទទួលស្គាល់ទេ រហូតដល់ថ្ងៃសម្រាលកូនប្រុសថ្ងៃទី២០ ខែកក្កដា ឆ្នាំ២០១៩ ។គេជឿរថាក្រោយសុនិតា សមាធិ២យប់៣ថ្ងៃនេះរួចនឹងធ្វើឲ្យអារម្មណ៍នាងបានស្ងប់ជាងមុនជាមិនខានពិសេសទាក់ទងរឿងស្នេហា ព្រោះមុននេះនាងក៍ធ្លាប់ចេញសារឌឺដងផ្លែផ្កាឲ្យគូស្នេហ៍ដែរក្នុងន័យប្រចណ្ឌម្ចាស់ចិត្តសម្លឹងឃើញអ្នកថ្មីហើយ…៕
