កណ្ដាល៖ លោកព្រីកា ដែលទស្សនិកជនស្គាល់ថាជាអតីតក្មេងរើសសំរាមនិងត្រូវកូនធម៌លោកScott Neeson ប្រធានអង្គការ Cambodian Children Fun ដែលបានរើសយកលោកទៅចិញ្ចឹមនោះបានរៀបចំក្រុងពាលីថតភាពយន្ដថ្មីប្រភេទបែបមន្តអាគម រឿង« រង់ចាំ»ដែលផលិតទ្រង់ទ្រាយធំមានលក្ខ ណៈស្តង់ដារអន្តជាតិ ។
លោកព្រីកា អតីតក្មេងសំរាមនៅគំនរសំរាមស្ទឹងមានជ័យ និងបច្ចុប្បន្នក្លាយជាផលិតករដឹកនាំរឿងដ៏លេចធ្លោម្នាក់បានឲ្យដឹងថារឿង”រង់ចាំ”ជាសាច់រឿងមួយមានគុណភាពលក្ខណៈស្តង់ដារអន្តរជាតិ ហើយការផលិតយកគុណភាពជាចម្បង ព្រោះរឿងនេះលោកក៍ត្រៀមយកទៅបញ្ចាំងនៅក្រៅប្រទសផងដែរ។ផលិតកម្ម Partner Picture បានដឹកនាំតារាសម្ដែងជាច្រើនដួងដើម្បីរៀបចំពិធីក្រុងពាលីសុំម្ចាស់ ទឹកម្ចាស់ដីដល់ទីតាំងថតផ្ទាល់តែម្ដងដែលស្ថិតនៅទូលលោកលតាម៉ៅក្នុងស្រុកល្វាឯម ខេត្តកណ្ដាល ជាទីតាំងមួយត្រូវបានបងប្អូនប្រជាពលរដ្ឋគោរពបូជាទៅតាមទំនៀមទំលាប់ជាប្រចាំច្រើនឆ្នាំមកហើយ។លោកចាងហ្វាងផលិតកម្មបន្ថែមថាមូលហេតុដែលផលិតកម្មសម្រេចចិត្តជ្រើសរើសទីតាំងនេះសម្រាប់ថតរឿង« រង់ចាំ »ដោយសារតែភាពយន្តនេះគឺផ្ដោតសំខាន់ទៅលើជំនឿមន្តអាគមអូមអាម ភ័យរន្ធត់តក់ស្លុត ព្រឺព្រួចនិងឈុតឆាកខ្មោចលងជាច្រើនដូច្នេះហើយទើបក្រុមការងារនិងតារាសម្ដែងទាំងអស់ត្រវទៅអុជធូបគោរពសុំម្ចាស់ទឹកម្ចាស់ដីដោយផ្ទាល់ ។
លោកព្រីកា គឺជាអ្នកនិពន្ធនិងដឹកនាំរឿង«រង់ចាំ »ដោយផ្ទាល់ហើយលោកបានបញ្ជាក់ប្រាប់ថា«រង់ចាំ » ជាភាពយន្តថ្មីមួយដែលលោកនិពន្ធឡើងដោយខ្លួនឯងផ្ទាល់ជាយូមកហើយគ្រាន់តែកន្លងមកលោកមិនទាន់មានលទ្ធភាពផលិតតែពេលនេះឱកាសល្អបានមកដល់លោកក៍ធ្វើឲ្យចេញជារូបរាងតាមផែនការណ៍តែម្ដង។
លោក ព្រីកា បានបន្ថែមទៀតថានៅក្នុងរឿង«រង់ចាំ » មានឈុតឆាកភ័យរន្ធត់ជាច្រើនជាពិសេសក្នុងរឿងនេះលោកចង់ឱ្យមានការវិនិឆ័យ អបិយជំនឿក៏ត្រូវតែជឿ វិទ្យាសាស្រ្តក៏មិនត្រូវមើលរំលងដែរ ពោលគឺដើរទន្ទឹមគ្នា ។
សម្រាប់តួអង្គសំខាន់ៗនៅក្នុងរឿង « រង់ចាំ » រួមមានលោក នូ ឧសភា , លោក សារី , កញ្ញា ពេជ្រ ចរណៃ និងកញ្ញា យូមិ ជាដើម…។ បើតាមការបង្ហើបប្រាប់ពីថ្នាក់ដឹកនាំផលិតកម្ម Partner Picture រឿងនេះនឹងដាក់បញ្ចាំងនៅដើមឆ្នាំ ២០២៤ ខាងមុខនៅតាមរោងភាពយន្ត ព្រមទាំងអាចនឹងនាំទៅដាក់បញ្ចាំងនៅក្រៅប្រទេសផងដែរ ។ តារាសម្ដែងក្នុងភាពយន្ដនេះម្នាក់ៗបានប្តេជ្ញាចិត្តខ្ពស់ថា នឹងពួតដៃគ្នាសម្តែងឱ្យបានល្អបំផុតទៅតាមអ្នកដឹកនាំរឿងចង់បាន ។
សូមបញ្ជាក់ផងដែរថា លោក ព្រីកា គឺជាអតីតក្មេងរើសសំរាមមួយរួបដែលត្រូវបាន លោក Scott Neeson ដែលជាប្រធានអង្គការCambodian Children Fu n ហៅកាត់ ថា CCF រើសយកទៅចិញ្ចឹមឱ្យរៀនសូត្របានខ្ពង់ខ្ពស់ និង មានចំណេះដឹងលើផ្នែកជំនាញជាច្រើនហើយលោកក៍មិនដែលភ្លេចកំណើតរបស់ខ្លួនឡើយ ៕
