ភ្នំពេញ៖រយៈពេលជាង១ខែហើយដែលអ្នកនាងសុគន្ធ និសា បានផ្ញើរប្រាណលើទឹកដីអាមេរិក ហើយការទៅលើកនេះនាងនិងស្វាមីបានដើរកម្សាន្ដម៉ាអស់ដៃដោយមានសាច់ញាត្តិខាងប្ដីដឹកនាំងដើរលេងតាមបណ្ដារដ្ឋជាច្រើន។ដោយឡែកសម្រាប់តារារួមអាជីពនិងFan របស់នាងនៅក្នុងស្រុកវិញពួកគេបានខមិននៅលើរូបភាពថ្មីៗរបស់នាងដែលបង្ហាញពីភាពរីករាយលើទឹកដីអាមេរិកនោះដោយលើកនេះក៍ដូចមុនៗដែរពោលគឺភាគច្រើនអ្នកជូនពរនាងឲ្យសម្រេចបំណងការពពោះកូនដំបូងដូចក្ដីប្រាថ្នា ។ប៉ុន្ដែនិសា មិនបានប្រាប់លទ្ធផល ឬសន្យារឿងនេះទៅអ្នកគាំទ្ររបស់ខ្លួននោះទេ ហើយនាងត្រៀមមកខ្មែរវិញមុនដំណាច់ខែកញ្ញា នេះ ខណៈមុនចេញទៅលេងទឹកដីខាងប្ដីនេះនាងបានធ្វើរួចរាល់ការងារសិល្បៈដែលបានទទួល ហើយនៅនៅរដូវធ្លាក់ភ្លៀងនេះទាំងនិសា និងតារាទាំងឡាយក៍មិនសូវរវល់ច្រើនដូចរដូវក្ដៅដែរ។
គូររំលឹកថាសុគន្ធ និសា បានដឹកដៃប្ដីលោកចៅ សម្បត្តិ ហោះទៅអាមេរិកកាលពីថ្ងៃទី៧ ខែសីហា ដែលដំណើរជើងនេះលក្ខណៈកម្សាន្ដសុទ្ធសាធតែម្ដង ហើយកន្លងមកក៍មានតារាមួយចំនួនបានរៀបយុទ្ធសាស្រ្ដបែបនេះយកកូនដោយជោគជ័យផងដែរតាមរយៈការផ្លាស់ប្ដូរបរិយាកាសនៃការលំហែកាយទាំងគូរ មិននៅកន្លែងដដែល ខណៈដែលនិសា វិញក្រោយរៀបការហើយភ្លាមៗនាងថាក្រុមគ្រួសារទាំងសងខាងបានជម្រុញឲ្យយកកូនតាំងពីដំបូងម្លេះ តែនាងនិងស្វាមីបានពិភាក្សាគ្នាចង់បានកូនតាមគម្រោងទើបមិនទាន់មានដូចគេ។និសា ក៍ទទួលស្គាល់ដែរថានាងចង់បានកូនទី១កើតនៅអាមេរិកពោលគឺសម្រាលភ្លាមបានសញ្ជាតិអាមេរិកភ្លែត ប៉ុន្ដែដោយសារតែមិនអាចចោលអាជីពចម្រៀងក្នុងស្រុកបានទើបកាលពីឆ្នាំ២០២១ និង២០២២ នាងសម្រេចចិត្តពពោះកូនក្នុងស្រុក តែជាលទ្ធផលគឺបរាជ័យ បើទោះជាកាលពីចុងឆ្នាំ២០២២ នាងបានចេញចូលមន្ទីសម្ភពមួយជាញឹកញាប់ដែលទំនងជាទៅពិនិត្យមើលផ្ទៃពោះក្ដី តែចុងក្រោយនៅតែអត់ដដែល។ដោយឡែកនៅខែធ្នូ ឆ្នាំ២០២៣ ខាងមុខនេះនិសា នឹងប្រារពខួបអាពាហ៍ ពិពាហ៍ របស់ខ្លួនគម្រប់៦ឆ្នាំ ហើយពេលនោះនាងប្រាកដជាត្រូវបានFan ជូនពរនូវសារដូចឆ្នាំមុនដដែលទៀតជាមិនខាន នោះគឺការយកកូនទី១ឲ្យបានជោគជ័យ។
សូមបញ្ជាក់ថាសុគន្ធ និសា មិនមានដណឹងនាងចង់ដើរចេញពីហង្សមាសជាលើកទី២ឡើយ ក្រោយនាងត្រូវបានថៅកែផ្ដល់តំណែងជាគ្រូបង្វឹកThe Voice Kids Cambodia រដូវកាលទី៣ និងCambodian Idol Junior រដូវកាលទី២ ហើយផលិតកម្មនេះនឹងផ្ដល់តំណែងពិសេសនេះទៅនាងថែមទៀតដើម្បីចងជើងនាងកុំឲ្យទៅតាមព្រាប សុវត្ថិ និងខេមរៈ សីរមន្ដ ។ប្រភពថានិសា ចង់បានកូនមុនគម្រោងការណ៍បែបនេះដោយសារតែនាងខ្លាចអាយុកាន់តែច្រើន ពិបាករឿងយកកូនដូចមាស សុខសោភា ហេតុនេះហើយបើសិនជាវិលត្រឡប់មកពីអាមេរិកមានកូនដូចក្ដីប្រាថ្នានោះនាងបានត្រៀមបាត់មុខពីឆាកតន្រ្ដីទាំងឡាយ រួមទាំង Coach និងJudge នៅហង្សមាសជាស្រេច ខណៈដែលហង្សមាសនៅតែបើកផ្លូវឲ្យនាងវិលមកថតសម្ដែងភាពយន្ដតាមចិត្តចង់ក្រោយពេលនាងឆក់បានតួឯក៤រឿងនាពេលកន្លងមកគឺ”សិសិរដូវក្នុងបេះដូង”,”រាជនីយភូមិគ្រិះ” ,”ព្រះវេស្សន្ដជាតក” និងរឿង”ចំណតថ្មីនៃសុភមង្គល”។
ក្រៅពីសុគន្ធ និសា តារាដែលយកស្វាមីជាអាណិកជនខ្មែរនៅអាមេរិកតែមិនបញ្ចប់អាជីពចាស់មានដូចជាអ្នកនាងអម្ពរ ទេវី,នារី រ័ត្នគន្ធា និងសារ៉ាយ សក្ខណា ជាដើម ខណៈដែលគឹម លក្ខិណា ,វ៉េត រតនា បានលាឈប់ពីការសម្ដែងតាំងពីក្រោយរៀបការប្ដីភ្លាមៗម្លេះ។ចំពោះនិសា វិញនាងធ្លាប់បានប្រាប់អ្នកយកព័តមានយើងថាស្វាមីនាងក៍ធ្លាប់សុំឲ្យនាងឈប់ដាច់ពីការច្រៀងសម្ដែងមួយនេះដែរ ប៉ុន្ដែនាងលើកហេតុផលពីការប្រឹងតស៊ូដល់ទៅជាង១០ឆ្នាំ មិនអាចបោះបង់ត្រឹមនេះបានទើបក្រោយមកប្ដីបានអនុញ្ញាត្តិឲ្យនាងបន្ដសិល្បៈតាមចិត្តចង់រហូតមកដល់បច្ចុបប្បន្នតែម្ដង។និសា ដែលមានបញ្ហាសុខភាពដោយសារតែជំងឺក្រពះធ្ងន់ធ្ង ព្រោះតែញាំអាហារមិនទៀងទាត់នោះពេលនេះក៍មានសុខភាពល្អប្រសើរវិញដែរហើយនាងជាតារាម្នាក់ដែលពូកែថែរាងពោលគឺទោះជាមានស្វាមីជាច្រើនឆ្នាំក្ដី ប៉ុន្ដែមិនបណ្ដោយឲ្យឡើងគីឡូជ្រុល ឬបែកសាច់ដូចតារាមួយចំនួនទេ ដែលចំណុចនេះហើយធ្វើឲ្យអ្នកនាងប៊ុន សុគន្ធា នៅតែត្រូវប៉ាន់ស្ពតធំៗ ខណៈដែលអ្នកដឹកនាំភាពយន្ដក៍មិនទាន់ហ៊ានទម្លាក់នាងឲ្យធ្វើជាតួរងឡើយ ៕
