ភ្នំពេញ៖អ្នកចម្រៀងកូន១ទេព បូព្រឹក្ស បានប្រារពខួបស្នេហ៍ជាមួយងួន ចាន់ដេវីត គម្រប់៧ឆ្នាំកាលពីថ្ងៃទី៧ កញ្ញា ហើយឆ្នាំនេះក៍ដូចជារាល់ឆ្នាំដែរដែលFan របស់នាងនិងដេវីត បានជូនពរស្នេហាពួកគេឲ្យកាន់តែរឹងមាំថែមទៀត ក្រោយទទួលបានកូន១អាយុជាង៧ខែ ។បូព្រឹក្ស ហៅស្រីនិច្ច បានបង្ហាញសកម្មភាពជាមួយដេវីត ចាប់ដៃគ្នាឡើងឆាកតន្រ្ដីជាថ្មីហើយគេឃើញការស្លៀកពាក់របស់នាងមិនចាញ់កាលនៅមិនទាន់មានកូនឡើយពោលគឺនៅតែស៊ិចស៊ី និងលេងក្បាច់រាំសាហាវដូចដើមពិសេសការលេចមុខលើឆាកតន្រ្ដីដ៍ធំមួយកាលពីថ្ងៃទី១៦ កញ្ញា ។បូព្រឹក្ស ព្យាយាមបង្ហាញឲ្យគេឃើញថានាងអាចរក្សារទីផ្សារចម្រៀងបានដូចមុនតាមរយៈការចេញច្រៀងមានការគាំទ្រមិនប្រែប្រួល ពិសេសនាងនៅតែត្រូវបានផលិតផលមួយចំនួនជ្រើសជាBA តទៅទៀត។ចំណែកFan របស់ស្រីនិច្ច បានលើកឡើងថាបើនាងហ៊ានលេងក្បាច់រាំសាហាវៗបែបនេះពួកគេបារម្ភជំនួសខ្លាចតែនាងទាស់សសៃទេ ព្រោះកូននៅតូចនៅឡើយតែនាងអត់បន្ធូដៃសោះ ។
សូមរំលឹកថាទេព បូព្រឹក្ស បានផ្អាកច្រៀងសម្ដែងជិត១០ខែដើម្បីថែគ័តនិងសម្រាល កូនប្រុសAlbert កាលពីថ្ងៃទី១៦ កុម្ភៈ ខណៈនាងបានសារភាពប្រាប់អ្នកកាសែតថាទទួលបានអារម្ភភ្ញាក់ផ្អើលតាំងពីមានផ្ទៃពោះម្លេះ ព្រោះដេវីត ស្រលាញ់និងថ្នាក់ថ្នមនាងទ្វេដង ក្នុងនោះសូម្បីតែស្បែកជើងក៍ពាក់ឲ្យនាងដែរ។អតីតតារាចម្រៀងTv Production ,ហង្សមាស និងរស្មីស្ទឹងសង្កែរ រូបនេះបានវិលមករកឆាកតន្រ្ដីសារជាថ្មីកាលពីថ្ងៃទី១២ សីហា ហើយនាងបានប្រាប់ថាព្យាយាមសម្រកទម្ងន់ឲ្យចុះថែមទៀត ព្រោះពេលនេះទម្ងន់នៅជាង៥០គ.ក្រ ស្របពេលដែលអំឡុងមានផ្ទៃពោះនាងមានទម្ងន់ឡើងដល់ជាង៧០ គ.ក្រ ហើយគីឡូហ្សីនដែលនាងស្រលាញ់គឺជាង៤០ គ.ក្រ។គូស្នេហ៍តារាចម្រៀងបូព្រឹក្ស-ដេវីត មានការតុបតែងខ្លួនប្លែកៗសឹងគ្រប់ពេលហើយពួកគេធ្វើឲ្យតារាផ្សេងៗទៀតពិបាកធ្វើតាមខ្លួនពិសេសគឺការលេងខ្លួនជាមួយសម្លៀកបំពាក់ម៉ាកប្រេន ប្រេន ដែលក្នុង១ឆ្នាំៗអ្នកទាំងពីរបានចាយលុយអស់រាប់ម៉ឺនដុល្លារទៅលើខោអាវ។
ថ្វីត្បិតតែនាងទេព បូព្រឹក្ស មិនបន្ធូដៃក្នុងការវាយលុកទីផ្សារចម្រៀងសារជាថ្មីមែន តែគេមិនដឹងថានាងនៅតែក្ដាប់ទីផ្សារផ្នែកយុវវ័យបានដូចមុនពេលមានស្វាមីនិងកូន១នោះទេ ព្រោះថាតារាចម្រៀងដែលមានទីផ្សារប្រែប្រួលក្រោយបញ្ចប់ភាពនៅលីវនោះមុននេះឱក សុគន្ធកញ្ញា ,សួស វីសា និងពេជ្រ សូលីកា ជាដើមពួកគេសុទ្ធតែចុះខ្សោយជាងមុនបន្ដិច។ប៉ុន្ដែសម្រាប់បូព្រឹក្ស វិញនាងល្បីថែមទៀត ឬធ្លាក់ចុះគឺនៅលើលោកងួន ចាន់ដេវីត ដែលជាអ្នកធ្វើភ្លេងនិងនិពន្ធបទឲ្យនាងច្រៀងជាអ្នកកំណត់ ហើយដើម្បីឲ្យនាងស្ទុះឡើងវិញនោះពេលនេះអ្នកទាំងពីរចាប់ដៃគ្នាតែម្ដង។អ្វីដែលគូរឲ្យកត់សម្គាល់ដែរបូព្រឹក្ស មានឈ្មោះល្បីដល់ពេលនេះមិនមែននៅលើទឹកសមសម្លេងទាំងស្រុងទេ ប៉ុន្ដែការតុបតែងខ្លួននិងលេងក្បាច់រាំប្លែកៗនោះហើយដែលជាចំណុចខ្លាំងរបស់នាង។
អ្នកជំនាញសិល្បៈបានលើកឡើងថាទេព បូព្រឹក្ស បើការពារមិនឲ្យឡើងគីឡូបាននោះនាងអាចនឹងនៅតែមានហាងឆេងតទៅទៀត ព្រោះថាSponsor ខ្លះដែលចង់បានដេវីត ពួកគេក៍ត្រូវតែគិតគូដល់បូព្រឹក្ស ផងដែរហើយប្រសិនបើដេវីត ហ៊ានដាក់ល័ក្ខខណ្ឌថាចង់បានរូបគេទៅច្រៀងត្រូវតែភ្ជាប់ជាមួយគូស្នេហ៍នោះគឺរឹតតែធ្វើឲ្យស្រីនិច្ច ចេញមុខមាត់កាន់តែច្រើនជាមិនខាន។
គូរបញ្ជាក់ថាទេព បូព្រឹក្ស -ងួន ចាន់ដេវីត មិនទាន់ដែលបង្ហាញជាចំហថាពួកគេបានភ្ជាប់ពាក្យ ឬចុះអេតាស៊ីវិលហើយមុនយកកូននេះទេ ដោយសារតែស្រីនិច្ច ថារឿងខ្លះអាចនិយាយបាន រឿងខ្លះមិនអាចនិយាយបានទេ។បូព្រឹក្ស និងដេវីត បានរស់នៅផ្ទះវីឡារធំស្កឹមស្កៃ និងជិះរថយន្ដទំនើបៗផ្លាស់ប្ដូរជាបន្ដបន្ទាប់ដូចជា Rolls Royce ,Lamborghini និងEscalade ជាដើម។បូព្រឹក្ស គ្មានដំណឹងរៀបការទេ ក្រោយពីនាងនិងគូស្នេហ៍បានដឹកដៃគ្នាទៅថតPre-Wedding កាលពីឆ្នាំ២០១៩ នៅកោះម៉ាល់ឌីវ ។ប្រភពដែលស្និតស្រីនិច្ច បង្ហើបថាតារាកូន១រូបនេះនិងគូស្នេហ៍អាចរៀបគម្រោងយកកូនថែម ទើបគិតគូររឿងក្រាបផ្ទឹមនាពេលក្រោយ ៕
