ភ្នំពេញ៖ក្រោយបាត់មុខជាច្រើនខែពីឆាកតន្រ្ដីនៅទីបំផុតស្រីស្រស់ជុំ រចនាពេជ្រ ហៅបេប៊ី បានវិលមកវិញហើយតាមរយៈការចេញMV បើកឆាកបទ”ថ្នម” ។ពិតណាស់ដូចជាការតាំងចិត្តរបស់បេប៊ី មែនថានាងមកលើកនេះត្រូវតែប្លែកបំផុតទើបធ្វើឲ្យFan របស់នាងចាប់អារម្មណ៍ឡើងវិញនោះព្រោះMV នោះមានការសម្រិតសម្រាំងជាពិសេសហើយនាងបង្ហាញក្បាច់រាំថ្មីគូរឲ្យទាក់ទាញដោយមានក្រុមរាំអមដល់ទៅចំនួន8 នាក់ឯណ្ណោះ ។បេប៊ី ក៍បានសម្រកគីឡូមកស្វែលវិញដែរ ហើយនាងប្រកាសថាទទួលការច្រៀងសម្ដែងដូចដើមឡើងវិញទៀតផងក្រោយបទ”ថ្នម”របស់នាងចេញMV ជាផ្លូវការកាលពីថ្ងៃទី២២ ខែតុលា ឆ្នាំ២០២៣ ។
អ្នកស្រីប៊ុន ណារី ម្ដាយបេប៊ី ដែលតែងតែផ្ដល់កំលាំងចិត្តនិងជូនកូនស្រីទៅច្រៀងសម្ដែងគ្រប់ឆាកតន្រ្ដីជាង១០ឆ្នាំមកហើយនោះបានប្រាប់អ្នកយកព័តមានយើងតាមទូរស័ព្ទថាក្រៅពីបទ”ថ្នម”បេប៊ី ក៍បានថតរួចរាល់២ទៅ៣បទហើយនឹងត្រៀមបញ្ចេញនាពេលខាងមុខនេះពោលគឺចេញទៅតាមគម្រោងការណ៍ដែលរៀបចំ ហើយលោកស្រីរីករាយដែលឃើញកូនស្រីធ្វើការងារសិល្បៈដែលខ្លួនស្រលាញ់តាមការសន្យា។ចំណែកបេប៊ី បានប្រាប់អ្នកយកព័តមានយើងមុនវិលវិញនេះថានាងមានក្រុមការងារនិពន្ធ និងផលិតMV និងក្រុមរំាំទៅតាមអ្វីដែលនាងចង់បាន ហើយការចំណាយផ្សេងៗគឺជាបន្ទុករបស់នាងទាំងស្រុងតែម្ដង ព្រោះថាពេលនេះនាងជាតារាចម្រៀងឯករាជ្យ មិនទាន់ចូលផលិតកម្មណាទេ បន្ទាប់ពីបានចប់កុងត្រានៅថោន ។ បេប៊ី និយាយដោយមានជំនឿរចិត្តថាការធ្វើបទចម្រៀងខ្លួនឯង មិនមែនជារឿងថ្មីទេ ព្រោះមុនចូលថោន នាងក៍ធ្លាប់ឆ្លងកាត់ដែរហើយទទួលបានការគាំទ្ររហូតមក។ប៉ុន្ដែនាងថាការវិលមកវិញលើកនេះរូបនាងគ្មានបំណងវិលទៅធ្វើជាពិធីការិនីនៅវិញឡើយ ពោលគឺផ្ដោតតែលើការចាប់អាជីពចម្រៀងតែមួយមុខប៉ុណ្ណោះ ព្រោះនាងស្រលាញ់ជាយូមកហើយ ហេតុនេះមិនអាចឈប់ពាក់កណ្ដាលទីបានទេ ។
បេប៊ី បានផ្អាកឡើងឆាកតន្រ្ដីតាំងពីផ្ទុះកូវីដ ១៩ ដែលពេលនោះនាងបានងាកទៅបើកហាងកាហ្វេ ហើយពង្រីកសាខាជាបន្ដបន្ទាប់ តែនាងអាចដកឃ្លាហើយវិលមកច្រៀងសម្ដែងជាធម្មតាដូចមុនវិញបានដោយបងប្រុសរបស់នាងជាអ្នកមើលខុសត្រូវលើអាជីវកម្មរបស់នាង។ការចេញមុខមកវិញនៅចុងខែ១០ នេះច្បាស់ណាស់ថាបេប៊ីអាច នឹងបង្ហាញខ្លួនតាមបណ្ដារឆាកតន្រ្ដីទាំងឡាយនៅចុងខែ១១ ចំពិធីបុណ្យអុំទូកនាពេលខាងមុខវិញនេះជាមិនខាន ដែលពេលនោះបទថ្មីៗរបស់នាងដែលថតរួចជាស្រេចនឹងបញ្ចេញព្រមគ្នាផងដែរ។តែបេប៊ី អះអាងមុននេះថានាងមិនទាន់គិតគូរចង់ចូលផលិតកម្មថ្មីទៀតទេ គឺពង្រឹងបទចម្រៀងដោយចេញបទអ្វីដែលខ្លួនស្រលាញ់ហើយនឹងពិចារណាថានឹងចូលផលិតកម្មថ្មីឬនៅច្រៀងជាឯករាជ្យរហូតគឺធ្វើទៅតាមពេលវេលា ។
គូររំលឹកថាបេប៊ី បានចាប់ផ្ដើមពីអាជីពសម្ដែងនិងពិធីការិនីជាច្រើនឆ្នាំទើបឈានទៅជាតារាចម្រៀងអាជីពហើយជុំវិញការវិលត្រឡប់ជាថ្មីនេះតារារួមអាជីពជាច្រើនបានសម្ដែងការសាទរព្រោះគេចាប់អារម្មណ៍ទៅលើការលេងខ្លួន និងក្បាច់រាំនាងកាន់តែមានភាពរស់រវើកជាងមុន។ប៉ុន្ដែការបើកឆាកទើបតែបាន១បទ គេនៅមិនទាន់អាចវាយតម្លៃថាកញ្ញារចនាពេជ្រ នឹងដណ្ដើមបានទីផ្សារយុវវ័យកម្រិតណានោះទេ ។តែFan ដែលរងចាំនាងបញ្ចេញរបស់ថ្មី ហើយអ្នកខ្លះចង់ដឹងថានាងប្រាកដជាវិលមករកអាជីពចម្រៀងវិញដូចការសន្យាមែន ឬអត់នោះពេលនេះគ្រប់គ្នាបានឃើញថាបេប៊ី សម្ងំម៉ារយៈគឺដើម្បីរិះរកអ្វីដែលថ្មីមកបង្ហាញអ្នកគាំទ្ររបស់ខ្លួនមែន។
ក្រៅពីបេប៊ី តារាដែលផ្ដើមពីអាជីពសម្ដែងវិវត្តន៍មកជាអ្នកចម្រៀងអាជីពមានដូចជាអេន ជី ,ពេជ្រ សូលីកា ,ទេព បូព្រឹក្ស និងផាន វីរ៉ាទី ជាដើម។សម្រាប់បេប៊ី នៅតែមានរូបសម្រស់ស្អាតហេតុនេះគ្រាន់តែនាងមានអ្វីមកបញ្ចេញ Fan ទាំងឡាយរបស់នាងប្រាកដជានៅតែគាំទ្រនាងដូចដើមជាមិនខាន។ប៉ុន្ដែទាក់ទងរឿងបេះដូងវិញតារាវ័យ២៥ឆ្នាំ ម្ចាស់បទ”ថ្នម”រូបនេះធ្លាប់អះអាងថានាងមិនអាចកំណត់ពីពេលវេលារៀបការនៅពេលណាឡើយ ព្រោះចិត្តនៅតែស្រលាញ់សិល្បៈ ហើយចង់ឲ្យអាជីពចម្រៀងរលូនទៅមុខថែមទៀត ៕