ភ្នំពេញ៖រយៈពេលជាង២សប្ដាហ៍ហើយដែលស្រីស្អាតហ៊ិន ច័ន្ទនីរ័ត្ន បង្ហាញស្នេហ៍ថ្មីជាចំហជាមួយបុរសម្នាក់មានឈ្មោះតិកតុកដាយមិន ឌី ដែលសកម្មភាពភាគច្រើនគឺអ្នកទាំងពីរយល់ចិត្តគ្នាខ្លាំងណាស់ហើយក្នុងនោះរូបភាពខ្លះបង្ហាញហាក់ដូចជាអ្នកទាំងពីរបានភ្ជាប់ពាក្យជាមួយគ្នាទៀតផង បើទោះជាគ្មានភស្ដុងតាងដូចជាការបំពាក់ជញ្ជៀនឲ្យគ្នាទៅវិញទៅមកក្ដី។ប៉ុន្ដែអ្វីដែលបង្ហាញនៅលើបណ្ដាញសង្គមនោះគេសង្ស័យថាសង្សារថ្មីរបស់ច័ន្ទនីរ័ត្ន គឺជាពោះម៉ាយ ព្រោះសកម្មភាពជាច្រើនឃើញថាបុរសនោះមានកូនស្រីអាយុខ្ទង់ជាង៣ឆ្នាំដែលមានមុខមាត់ដូចលោកបេះបិត។តែគ្មានរូបភាពណាមួយដែលនីរ័ត្ន នៅជាមួយកូនស្រីលោកឌី ឬត្រូវបានក្មេងស្រីនោះហៅនាងថាជាម៉ាក់ៗ នោះទេ។ អ្វីដែលគេអាចឃើញច្បាស់ថែមទៀតនោះគឺម្ចាស់ចិត្តថ្មីរបស់ច័ន្ទនីរ័ត្ន ពិតជាបុរសមានទ្រព្យស្ដុករស់នៅផ្ទះវីឡារយ៉ាងប្រណិត និងមានរយន្ដទំនើបៗជាច្រើនគ្រឿង។
យ៉ាងណាជុំវិការបែកធ្លាយរឿងស្នេហាថ្មីរបស់ស្រីស្រស់ធ្មេញចំពើសហ៊ិន ច័ន្ទនីរ័ត្ន ជាង២អាទិត្យនេះគេមិនទាន់ឃើញនាងចេញមុខបកស្រាយរឿងនេះនៅឡើយ ខណៈដែលទូរស័ព្ទរបស់នាងវិញមិនអាចទាក់ទងបានទេ។មានមតិភាគច្រើនថាហ៊ិន ច័ន្ទនីរ័ត្ន និងបុរសនោះសាកសមគ្នា តែគេក៍មានចម្ងល់ដែរថាចុះលោកគ្រូពេទ្យសុវណ្ណារិទ្ធ ដែលនាងទើបតែបង្ហាញស្នេហ៍ជាចំហមុននេះ ហើយផ្អាកផ្អែមជាមួយគ្នារយៈពេលខ្លីសោះតើរឿងនោះនឹងទៅជាយ៉ាងណា ?ឬមួយច័ន្ទនីរ័ត្ន បែកចាស់ភ្លាម ភ្ជាប់ស្នេហ៍ថ្មីភ្លែត ?
ហ៊ិន ច័ន្ទនីរ័ត្ន ត្រូវបានអ្នកសិល្បៈរួមអាជីពចាត់ទុកថានាងជានារីបេះដូងដែក ព្រោះបុរសដែលតាមស្រលាញ់នាងនាពេលកន្លងមកបើនាងមិនបេតីទេ ក៍មិនអាចធ្វើជាម្ចាស់ចិត្តនាងបានឡើយ ទោះជាបុរសនោះមានទ្រព្យយ៉ាងណាក៍ដោយ។តែនីរ័ត្ន ធ្លាប់ប្រេះឆាស្នេហ៍ជាច្រើនលើកច្រើនសារ ប៉ុន្ដែនាងមិនដែលបង្ហាញទុក្ខសោកស្នេហ៍ម្ដងណាឡើយ ក្រៅពីធ្លាប់និយាយបែបលេងសើចថានាងចង់តែទៅលោតទឹកសម្លាប់ខ្លួននៅស្ពានជ្រោយចង្វា បន្ទាប់ពីដៃគូរបស់នាងលោកសេង មង្គល ងាកទៅស្និតស្នេហ៍អ្នកមេម៉ាយទ្រព្យស្ដុកម្នាក់នោះ។ប្រភពបានឲ្យដឹងថានាងច័ន្ទនីរ័ត្ន មានជម្រើសស្នេហ៍ច្រើន ហេតុនេះនាងមិនដែលគាំគ្រា ឬខូចចិត្តដោយសារតែបុរសណាម្នាក់ដែលធ្វើឲ្យនាងខកបំណងឡើយ។ចំណែកបុរសខ្លះជាមន្រ្ដីធំដែលតាមស្នេហានីរ័ត្ន ជាច្រើនឆ្នាំមកហើយតែបរាជ័យព្រោះនាងមិនចាប់អារម្មណ៍តំណែងជំទាវនោះពេលនេះលែងហ៊ានតាមប្រម៉ាញ់ស្រីស្អាតរូបនេះតទៅទៀតហើយ ក្រោយពីពិធីការិនីរូបនេះបែកធ្លាយរូបកៀកកើយគ្នាជាមួយលោកឌី ជាច្រើនលើទឹកដីអាមេរិកដែលពួកគេទៅសាសងស្នេហ៍កាលពីពេលថ្មីៗនេះ ។
ក្រៅពីហ៊ិន ច័ន្ទនីរ័ត្ន តារាដែលប៉ៈស្នេហាមិនសូវសមប្រកបមានដូចជានាងពេជ្រ សូលីកា ,កែវ និសា និងសុខ សោម៉ាវត្តី ជាដើម ។ប៉ុន្ដែសម្រាប់តារាដែលបែកធ្លាយរឿងមានប្រុសស្នេហ៍នៅឆ្នាំ២០២៣ នេះមានតែច័ន្ទនីរ័ត្ន និងអ៊ីវ៉ា ប៉ុណ្ណោះ ដែលស្រីស្អាតទាំងពីរត្រូវFan ជម្រុញឲ្យពួកគេឆាប់ចូលរោងការដូចគ្នា ជៀសវាងការដើរជាន់ដានចាស់។
ប្រភពបានឲ្យដឹងថាប្រសិនបើហ៊ិន ច័ន្ទនីរ័ត្ន នឹងគូស្នេហ៍ហ៊ានដឹកដៃគ្នាចូលរោងការនៅចុងឆ្នាំនេះ ឬដើមឆ្នាំក្រោយមែន នោះច្បាស់ជាអាជីពសិល្បៈរបស់នាងកាន់តែខើចទៅៗជាមិនខាន ព្រោះបច្ចុប្បន្ននាងរយាលៗពីសិល្បៈស្រាប់ដោយថតតែភាពយន្ដនិងខារ៉ាអូខេណាដែលនាងពេញចិត្តប៉ុណ្ណោះ ហេតុនេះម្ចាស់ចិត្តនឹងមិនបណ្ដោយឲ្យនាងត្រូវបានតារាប្រុសផ្សេងអោបរឹតនាងទៀតនោះទេ ។ទោះជាយ៉ាងណាគេនៅមិនទាន់ច្បាស់ទេថាតើច័ន្ទនីរ័ត្ន ពិតជាចោលស្នេហ៍គ្រូពេទ្យកំលោះកណ្ដាលទីដើម្បីស្រវ៉ាបុរសពោះម៉ាយទ្រព្យស្ដុកមែន ឬយ៉ាងណានោះ ព្រោះពេលនេះស្រីស្រស់រក្សារភាពស្ងៀមស្ងាត់ ខណៈដែលដៃគូរបស់នាងមានចេតនាចង់ឲ្យរឿងស្នេហ៍មួយនេះត្រូវបានគេដឹងឭ ដើម្បីកុំឲ្យប្រុសផ្សេងតាមចែចង់នីរ័ត្ន តទៅទៀត ។ចំណែកនីរ័ត្ន វិញក្រៅពីហ៊ានហៅបុរសនោះថាជា”Huni “នៅលើបណ្ដាញសង្គមរបស់នាងនៅមិនទាន់ហ៊ានបង្ហាញស្នេហ៍មួយនេះជាសាធារណៈដូចដៃគូបេះដូងបានបានធ្វើនោះឡើយ៕
