ភ្នំពេញ៖រូបភាពជាច្រើនដែលយូរី បានបង្ហាញនាពេលថ្មីៗនេះបញ្ជាក់ថានាងនៅតែមានទីផ្សារសិល្បៈ ព្រោះចេញច្រៀងតាមបណ្ដារConcerts ជាបន្ដបន្ទាប់គ្នា បើទោះជារយៈពេលចុងក្រោយនេះគេមិននទាន់ឃើញនាងមានបទថ្មីល្បីៗចេញទៀត ក្រៅពីគេបានស្គាល់បទនាងច្បាស់នៅហង្សមាសតែបទ”រាំតោង”ក្ដី។ការបន្ដមានយីអ៊ុនល្អរបស់យូរី នាពេលនេះក្រោយពីនាងនៅរក្សាររូបសម្រស់បានស្រស់ស្អាត ហាក់គ្មានទុក្ខសោកព្រោះស្នេហានោះទេ បន្ទាប់ពីស្រីស្រស់ចែកផ្លូវជាមួយលោកថៅកែជា នី ជាង២ឆ្នាំមកនេះ បើទោះជាពេលខ្លះនាងមើលទៅហាក់ស្រងូតស្រងាត់និងឯកោបន្ដិចក្ដី ។ដោយឡែកហង្សមាសវិញនៅតែដាក់យូរី ឲ្យចេញច្រៀងតាមបណ្ដារConcerts របស់ខ្លួនទាំងនៅស្ទូឌីយោ និងឆាកខាងក្រៅធ្វើឲ្យស្រីស្រស់បន្ដសកម្មភាពសិល្បៈមិនដាច់ ជាមួយការការតុបតែងខ្លួន និងលេងក្បាច់រាំកាន់តែប្លែកពីមួយថ្ងៃទៅមួយថ្ងៃ ។តែបំណងដែលយូរី មិនទាន់អាចធ្វើបាននោះគឺនាងចង់វិវត្តន៍ខ្លួនទៅជាអ្នកថតភាពយន្ដដូចមិត្តរួមក្រុម ប៉ុន្ដែពេលនេះ បែជាស្ទះផ្លូវមិនទាន់អាចរកច្រកចេញរួចទៅវិញ ។
គូរកត់សម្គាល់ថាយូរី ស្ថិតក្នុងចំណោមតារាផ្នែកយុវវ័យមានដូចជានាងរ៉េត ស៊ូហ្សាណា និងតន់ ច័ន្ទសីម៉ា ជាដើមដែលពួកគេមានអ្នកគាំទ្រភាគច្រើនជាវ័យក្មេងៗ ។ប្រភពបានឲ្យដឹងថាហង្សមាសក៍បានបើកដៃឲ្យយូរី ផលិតបទចម្រៀងដោយខ្លួនឯងទៅតាមចិត្តចង់ដែរ ក្រៅពីបទផលិតកម្មទម្លាក់ឲ្យ។ប៉ុន្ដែយូរី មិនសូវចេញបទសម្រុកនោះទេ គឺយូៗទើបគេឃើញនាងមានបទថ្មី១ចេញ ហេតុនេះហើយបានជាភាគច្រើនតាមរយៈការបង្ហាញខ្លួននៅឆាកតន្រ្ដីទាំងឡាយយូរី ច្រើនតែច្រៀងបទល្បីចាស់ៗរបស់នាងពីមុនមក។ចំណែកអ្វីដែលយូរី ប្រឈមនារយៈពេលចុងក្រោយ បន្ទាប់ពីអត់ថៅកែនោះគឺនាងមិនទាន់អាចរកតៃកុងឡានថ្មីបើកបរឲ្យនាងទៅគ្រប់ទិសទីដូចមុនបានទៀតឡើយ ។តែអ្នកខ្លះនៅតែមិនជឿរថាយូរី ស្រស់ស្អាតប៉ុណ្ណឹងដែរ ទុកបេះដូងឲ្យនៅទំនេរនោះទេ ព្រោះពួកគេយល់ថាស្រីស្រស់មានទាំងបុរសនៅក្នុងនិងក្រៅស្រុកចង់ប្រជែងគ្នាចូលខ្លួនមកស្អំបេះដូងនាងតែម្ដង ហេតុនេះគេសង្ស័យស្រីស្អាតអាចនឹងព្យាយាមបឹទបាំងគូស្នេហ៍ថ្មីច្រើនជាង ទុកបេះដូងឲ្យអត់ម្ចាស់នោះ។
អ្នកជំនាញសិល្បៈបានលើកឡើងថាយូរី អាចនឹងត្រូវបានគេចាប់អារម្មណ៍ឡើងវិញប្រសិនបើនាងងាកទៅចាប់ដៃគូជាមួយលោកប៊ីម៉ូ សារជាថ្មីម្ដងទៀត ព្រោះពួកគេសម្ដែងយល់ចិត្តគ្នាល្អ ។តែយូរី ធ្លាប់ប្រាប់ថាប៊ីម៉ូ មានជំនាញផ្សេងក្រៅពីសិល្បៈ ហេតុនេះមិនអាចផ្ដោតតែលើការច្រៀងមួយមុខទេ អីចឹងបានជានាងផ្អាកច្រៀងជាដៃគូគ្នា ។ប៉ុន្ដែប្រភពខ្លះថាមូលហេតុដែលប៊ីម៉ូ លែងច្រៀងឆ្លងឆ្លើយជាមួយយូរី ព្រោះតែលោកអាកអន់ស្រពោនចិត្តជាមួយនាងដែលងាកទៅស្នេហ៍លោកថៅកែជា នី អំឡុងពេលដែលពួកគេនៅជាដៃគូដ៍យល់ចិត្តគ្នានោះ ហេតុនេះកែវដែលធ្លាប់ប្រេះស្រាំមិនអាចដូចដើមបានទេ …។
គូររំលឹកថាយូរី ធ្លាប់ប្រេះឆាស្នេហ៍៣លើកមកហើយ តែនាងមិនដែលទទួលស្គាល់ម្ដងណាទេ ទាំងដំណឹងជាមួយលោករ៉េត ,ប៊ីម៉ូ និងថៅកែនី ។អ្នកខ្លះបានហៅយូរី ថាអភ័ព្វស្នេហ៍ទៀតផង តែនៅពេលដែលគេបានដឹងច្បាស់ថាតាមពិតយូរី មានជម្រើសស្នេហ៍ច្រើនណាស់ ហើយបុរសដែលនាងមិនយកភ្នែកមើលនោះមានខ្លះសុំនាងរៀបការទៀតផង ។តែយូរី អាចនឹងត្រូវការពេលវេលាក្នុងការសាងស្នេហាថ្មី ឬពិនិត្យឲ្យបានច្បាស់ថាប្រុសនោះច្បាស់លាស់ជាមួយនាងទើបតារាស៊ិចស៊ីព្រមបញ្ចេញគូស្នេហ៍ជាថ្មីម្ដងទៀត ជៀសវាងការដើរជាន់ដានចាស់នាំឲ្យតែដំបៅកាន់តែឈឺពើតផ្សារលើសដើម ។
ក្រៅពីយូរី តារាដែលមិនជ្រើសផ្លូវសាងស្នេហ៍ថ្មីដោយចំហ មានដូចជានាងសុខ សោម៉ាវត្តី ,សុខ ពិសី ,រ៉េត ស៊ូហ្សាណា និងតន់ ច័ន្ទសីម៉ា ជាដើម ។ដោយឡែកនាងហ៊ិន ច័ន្ទនីរ័ត្ន និងអ៊ីវ៉ា ផ្ទុះរឿងសង្សារថ្មីព្រមគ្នាតែម្ដងនៅឆ្នាំ២០២៣ ។អ្នកជំនាញសិល្បៈថាយូរី អាចនឹងពិបាកប្រជែងទីផ្សារចម្រៀងនារយៈពេលចុងក្រោយនេះ ព្រោះតែនាងតន់ ច័ន្ទសីម៉ា វាយលុកខ្លាំងពេក ប៉ុន្ដែស្រីស្រស់អាចមានសង្ឃឹមលើផ្លូវផ្សេងទៀតដូចជាការផលិតបទដោយខ្លួនឯង បន្ថែមពីលើក្រុមហ៊ុន ,ការថតភាពយន្ដ និងការចាប់ដៃគូថ្មីដែលសាកសមនាង ៕
