ភ្នំពេញ៖ស្រីស្អាតហ៊ិន ច័ន្ទនីរ័ត្ន បានបិទបញ្ចប់ការដែលគេហៅនាងថាជាតារាអភ័ព្វស្នេហ៍ក្រោយនាងក្លាយទៅជាគូដណ្ដឹងលោកឌី ពេជ្រ ជាផ្លូវការកាលពីថ្ងៃទី២៧ ខែតុលា ឆ្នាំ២០២៣ ដោយតារារួមអាជីព និងFan របស់នាងជាច្រើនបានហៅពិធីការិនីរូបស្រស់នេះថាជា”តារាមានសំណាង” ព្រោះអនាគតស្វាមីរបស់នាងជាក្មួយសម្ដេចតេជោធ្វើឲ្យវាសនាអតីតFreshie ឆ្នាំ២០០៧ រូបនេះនឹងក្លាយទៅជាជំទាវនាពេលដ៍ខ្លីខាងមុខនេះហើយ។ប្រភពបានឲ្យដឹងថាមង្គលការរបស់ហ៊ិន ច័ន្ទនីរ័ត្ន នឹងត្រូវបានរៀបចំយ៉ាងប្រណិតបំផុតទៅតាមអ្វីដែលនាងនិងគូដណ្ដឹងចង់បាន ហើយអាចជាការរៀបអាពាហ៍ ពិពាហ៍ របស់តារាដែលមានទ្រង់ទ្រាយធំជាងគេប្រចាំឆ្នាំ២០២៣ តែម្ដង ព្រោះភ្ញៀវខាងកូនស្រីគឺសុទ្ធតែជាតារាល្បីៗស្ទើតែទាំងអស់ ចំណែកខាងកូនប្រុសវិញភាគច្រើនជាមន្រ្ដីរាជការ និងអ្នកជំនួញធំៗ។មង្គលការរបស់ពិធីការិនីបាយ័នរូបនេះក៍នឹងមានការអញ្ជើញចូលរួមពីប្រមុខថ្នាក់ដឹកនាំ និងមន្រ្ដីជាន់ខ្ពស់ជាច្រើនរូបផងដែរ។
អ្នកយកព័តមានយើងបានទូរស័ព្ទទៅហ៊ិន ច័ន្ទនីរ័ត្ន កាលពីរសៀលថ្ងៃទី១ វិច្ឆិកា តែតេមិនចូលឡើយ ទើបមិនអាចសុំការបញ្ជាក់ពីនាងថាគ្រោងចំណាយថវិការប៉ុន្មានសម្រាប់ថ្ងៃពិសេសរបស់នាងហើយធ្វើនៅអគារមួយណាឡើយ។ដោយឡែកនៅលើហ្វេសបុកច័ន្ទនីរ័ត្ន នៅតែបង្ហាញសកម្មភាពសិល្បៈរបស់នាងជាពិធីការិនីបាយ័នជាធម្មតា មិនទាន់សម្រាកដើម្បីបន្ទំស្បែកឲ្យកាន់តែសខ្ចីជាងនេះទៀតឡើយ ខណៈដែលនៅលើTik Tok របស់លោកឌី ពេជ្រ វិញលោកបានផុសពីរូបអនុស្សាវរីយ៍ចាស់ៗជាមួយនីរ័ត្ន ភ្ជាប់ដោយសំណេរថា”ពេលវេលាមិនរងចាំយើងទេ ហើយពេលវេលាក៍មិនអាចត្រឡប់ថយក្រោយវិញដែរ តែសំណាងល្អ ពេលវេលាធ្វើឲ្យបានជួបគ្នាវិញ “។
គូររំលឹកថាសម្រាប់តារាល្បីៗដែលធ្លាប់រៀបមង្គលការធំចំណាយលុយអស់ជាច្រើនម៉ឺនដុល្លារមានដូចជាឱក សុគន្ធកញ្ញា ,សុគន្ធ និសា ,សួស វីសា ,កែវ សីហា និងឆោម ឆពុំ ជាដើម ។ប៉ុន្ដែសម្រាប់មង្គលការរបស់ច័ន្ទនីរ័ត្ន តាមប្រភពខ្លះថានឹងពិសេសហើយចំណាយលើសតារាល្បីៗខាងលើទៅទៀត ។
ហ៊ិន ច័ន្ទនីរ័ត្ន បានប្រឡូកអាជីពសិល្បៈរយៈពេល១៦ឆ្នាំមកហើយ ដែលមុនប៉ៈស្នេហ៍លោកឌី ពេជ្រ នាងត្រូវបានគេចាត់ទុកថាជាតារាដែលមិនសូវសមប្រកបទៅនិងរឿងស្នេហា ប៉ុន្ដែក្រោយរៀបការនីរ័ត្ន នឹងក្លាយទៅជាតារាដែលមានទ្រព្យមហាសាលជាមិនខាន ព្រោះគូស្នេហ៍របស់នាងមានទ្រព្យស្ដុកស្ដម និងជិះរថយន្ដទំនើបៗ សឹងគ្រប់ម៉ាកគ្រប់ម៉ូដ។ប្រភពបានឲ្យដឹងថាច័ន្ទនីរ័ត្ន អាចនឹងបញ្ចប់អាជីពសម្ដែងភាពយន្ដ និងMV នាពេលខាងមុខ តែនៅបន្ដអាជីពពិធីការិនីនៅបាយ័ន ដដែល ព្រោះស្វាមីនាងគាំទ្រ ។យ៉ាងណាគេនៅមិនទាន់ឃើញច័ន្ទនីរ័ត្ន ទម្លាយពីប្រវត្តិសេ្នហាជាមួយលោកពេជ្រ នោះទេ គឺមានតែគូណ្ដឹងនាងប៉ុណ្ណោះដែលព្យាយាមបង្ហាញឲ្យគេឃើញពីប្រវត្តិស្នេហាលោកជាមួយនីរ័ត្ន ជាមួយរូបភាពចាស់ៗដែលបញ្ជាក់ថាពួកគេស្គាល់គ្នាជាច្រើនឆ្នាំមកហើយទើបដឹកដៃគ្នាចូលរោងការនាចុងខែ១២ នេះតែម្ដង។
ក្រៅពីហ៊ិន ច័ន្ទនីរ័ត្ន តារាដែលគ្រោងនឹងចូលរោងការបន្ទាប់ពីនាងមានដូចជាពេជ្រ សោភា ,ប៉ាច គីមមួយ និងអ៊ីវ៉ា ជាដើម ខណៈដែលចំរើន សុភ័ក្រ វិញនាងនឹងដឹកដៃគូស្នេហ៍រៀបការនៅដើមខែវិច្ឆិកា ឆ្នាំ២០២៣ នេះតែម្ដង ពោលគឺការមុននីរ័ត្ន ។អ្នកជំនាញសិល្បៈខ្លះបានលើកឡើងថាតារាស្រីស្អាតៗមួយចំនួនចូលសិល្បៈគឺប្រាថ្នាយកប្ដីជាមន្រ្ដីធំ ឬប្រុសអ្នកមាន ប៉ុន្ដែការដែលពួកគេមានភ័ព្វវាសនាត្រូវបានប្រមុខរដ្ឋាភិបាលប្រកាសគាំទ្រ និងទទួលស្គាល់ចំណងស្នេហារបស់ពួកគេពេញទំហ៊ឹងដូចហ៊ិន ច័ន្ទនីរ័ត្ន បែបនេះគឺជារឿងកម្រ ហេតុនេះគេហៅនាងថាជាតារាមានសំណាងគឺមិនខុសនោះទេ។ចំណែកតារាដែលស្និតនីរ័ត្ន បង្ហើបថាពិធីការិនីវ័យ៣២ឆ្នាំ រូបនេះមានជម្រើសស្នេហ៍ច្រើន ប៉ុន្ដែនាងជាស្រីស្អាតម្នាក់ដែលមិនជ្រួលជ្រើមនិងអំណាចលុយឡើយ ពោលគឺបុរសដែលអាចយកបានបេះដូងនាងគឺទាល់តែនាងមានអារម្មណ៍ស្រលាញ់ដែរទើបអាចទៅរួច ៕
