ភ្នំពេញ៖នៅថ្ងៃទី១ ខែធ្នូ ឆ្នាំ២០២៣ ខាងមុខនេះអ្នកនាងប៊ុន សុគន្ធា ហៅសុគន្ធ និសា និងលោកចៅ សម្បត្តិ នឹងប្រារពខួបអាពាហ៍ ពិពាហ៍ របស់ពួកគេគម្រប់៥ឆ្នាំ តែអាចជាការជួបជុំលក្ខណៈគ្រួសារដូចឆ្នាំមុនៗ មិនជប់លៀងធំដុំឡើយ ព្រោះទម្លាប់របស់អ្នកនាងនិសា អត់ចូលចិត្តបង្ហាញអ្វីដែលឲ្យគេឃើញទាំងអស់នោះទេ។ច្បាស់ណាស់ថាខួបអាពាហ៍ ពិពាហ៍ របស់និសា ឆ្នាំនេះក៍ដូចជាឆ្នាំមុនៗដែរ ពោលគឺទាំងមិត្តរួមអាជីព និងFan របស់នាងនឹងផ្ញើរសារជូនពរទៅនាងនូវសារសំខាន់តែ២យ៉ាងគត់គឺទី១សូមឲ្យនាងមានសម្រស់កាន់តែស្អាត និងទី២ ជាសារសំខាន់គឺឲ្យនិសា សម្រេចបំណងធំពពោះកូនទី១ បានដូចក្ដីប្រាថ្នា។ចំពោះការជូនពរសារទី២នេះ និសា ច្បាស់ជានិយាយមិនចេញឡើយ ព្រោះថានៅបាំងមិនដល់១ខែទៀតទេនឹងឈានចូលឆ្នាំថ្មី ២០២៤ តែផែនការណ៍ដែលនាងយកូននៅឆ្នាំ២០២៣ នេះត្រូវបរាជ័យម្ដងទៀតទៅហើយ បើទោះជាមុននេះនាងបាននាំស្វាមីទៅដើរលេងកម្សាន្ដនៅអាមេរិករយៈពេលជិត២ខែ ដើម្បីផ្លាស់ប្ដូរនៃការរស់នៅក្ដី តែលទ្ធផលនៅតែសូន្យដដែល ។ចំណែកតារាជិតដិតបារម្ភខ្លាចនិសា ជួបរឿងដូចមាស សុខសោភា ដែលមានស្វាមី១៦ឆ្នាំ តែអត់មានកូន បើទោះជាអ្នកនាងសុគន្ធា ធ្លាប់ប្រាប់អ្នកយកព័តមានយើងថាតាមពិតការដែលនាងមិនទាន់មានកូនព្រោះតែនាងជ្រើសវិធីពន្យាកំណើត ដោយសារតែចង់បានកូនទៅតាមគម្រោងការណ៍ច្បាស់លាស់ក្ដី តែបើពន្យាច្រើនឆ្នាំពេកនោះនៅពេលដែលចង់បានដូចពេលនេះគឺមិនដូចចិត្តឡើយ។
សូមរំលឹកថាសុគន្ធ និសា បានរៀបការជាមួយអាណិកជនខ្មែរមកពីរដ្ឋBoston សហរដ្ឋអាមេរិក កាលពីថ្ងៃទី១ ខែធ្នូ ឆ្នាំ២០១៧ ហើយជាទម្លាប់នាងនិងប្ដីតែងតែចេញទៅដើរកម្សាន្ដនៅទីនោះ១ទៅ២ដង ក្នុង១ឆ្នាំៗ បើទោះជាបច្ចុប្បន្នពួកគេរស់នៅស្រុកខ្មែរជាអចិនត្រេយ៍ទៅហើយក្ដី ។ចំណែកនៅលើហ្វេសបុករបស់និសា ថ្មីៗនេះគេឃើញនាងបង្ហោះពីការត្រៀមច្រៀងសម្ដែងតាមបណ្ដារកម្មវិធីផ្សេងៗនារដូវក្ដៅនេះដែលមានន័យថានាងបានឆាចោលការពពោះនៅឆ្នាំនេះម្ដងទៀតទៅហើយ តែងាកទៅត្រៀមខ្លួនចេញច្រៀងសម្ដែងតាមបណ្ដារកម្មវិធីទាំងឡាយនារដូវក្ដៅចាប់ពីខែ១១ ឆ្នាំ២០២៣ ដល់ខែ៤ ឆ្នាំ២០២៤ ។អតីតតារាថោន រូបនេះបានបង្ហើបពីគម្រោងយកកូនរបស់នាងតាំងពីឆ្នាំ២០២១ ,២០២២ និង២០២៣ តែ៣ឆ្នាំអត់បានទាំង៣ដងតែម្ដង ខណៈដែលតារារួមទ្រនុំមានឱក សុគន្ធកញ្ញា ,សួស វីសា និងពេជ្រ សូលីកា ជាដើម មានប្ដីក្រោយនាងតែពួកគេមានកូនរៀងៗខ្លួនអស់ទៅហើយ ។Fan របស់និសា មួយចំនួនព្រួយខ្លាចនាងអាចប្រឈមភាពរង្គើរស្នេហ៍ដូចតារាខ្លះរៀបការច្រើឆ្នាំអត់កូន រហូតដល់ចែកផ្លូវគ្នា ។ប៉ុន្ដែនិសា ធ្លាប់ប្រាប់ថានាងនិងស្វាមីបានព្រមព្រៀងគ្នាអស់ទៅហើយ គឺចង់បានកូនតាមផែនការណ៍កំណត់ មិនមែនយកកូនដោយចៃដន្យឡើយ។
គូរបញ្ជាក់ថាតារាវ័យ៤០ឆ្នាំ អ្នកនាងសុគន្ធ និសា ត្រូវបានថៅកែហង្សមាសផ្ដល់ទំនុកចិត្តខ្ពស់ដល់នាងវិញតាមរយៈការប្រគល់តំណែងជាគ្រូបង្វឹគThe Voice Kids Cambodia រដូវកាលទី៣ និងគណៈកម្មាការCambodian Idol Junior រដូវកាលទី២ និងអាចបន្ថែមកម្មវិធីផ្សេងៗទៀតដើម្បីចងជើងតារារហ្ស័សនាមស្រគត់ស្រគុំរូបនេះកុំឲ្យចាកចេញពីហង្សមាសជាលើកទី២ ។និសា ក៍មានសិទ្ធិថតភាពយន្ដរបស់ហង្សមាសតាមចិត្តចង់ផងដែរ ក្រោយនាងផ្អាកសម្ដែងមួយរយៈពេលចុងក្រោយ ដើម្បីផ្ដោតលើអាជីពចម្រៀងជាធំនេះ បន្ទាប់ពីនាងឆក់បានតំណែងតួឯកដល់ទៅ៤រឿងជាប់គ្នាគឺ”សិសិរដូវក្នុងបេះដូង “,រាជនីយភូមគ្រឹះ” ,”ព្រះវេស្សន្ដជាតក” និងរឿង”ចំណតថ្មីនៃសុភមង្គល “។
អ្នកជំនាញសិល្បៈបានលើកឡើងថាសុគន្ធ និសា ក៍ដូចជាតារាខ្លះទៀតដែរពោលគឺក្រោយមានស្វាមីរួចអាជីពចម្រៀងហាក់នៅទ្រឹងមិនសូវមានសន្ទុះខ្លាំងដូចកាលនៅលីវនោះទេ តែនាងសំណាងធំដោយសារតែស្វាមីបានអនុញ្ញាត្តិឲ្យនាងបន្ដលេងសិល្បៈទៅតាមចិត្តចង់ទាំងច្រៀងនិងសម្ដែងភាពយន្ដ ដោយលោកមិនចេះតែដើរតាមនាងគ្រប់ឆាកតន្រ្ដីដូចប្ដីតារាខ្លះឡើយ។ប្រភពបានឲ្យដឹងថានិសា ក៍អាចនឹងចេញទៅរស់នៅអាមេរិកដែរនាពេលខាងមុខ ប្រសិនបើប្រាក់ចំណូលពីសិល្បៈរបស់នាងក្នុងស្រុកថយចុះ ប៉ុន្ដែបច្ចុប្បន្ននាងនៅតែស្ថិតក្នុងចំណោមតារារកប្រាក់ចំណូលខ្ពស់នៅឡើយ ព្រោះតាមបណ្ដារConcerts ធំៗរបស់ហង្សមាស និងកម្មវិធីជាច្រើនរបស់ក្រុមAgency នាងនៅតែលេចមុខជាបន្ដបន្ទាប់ដែលគេអាចសន្និដ្ឋានបានថានារដូវក្ដៅអ្នកនាងសុគន្ធា រកប្រាក់ចំណូលពីសិល្បៈបានរាប់ម៉ឺនដុល្លារពីការច្រៀងសម្ដែងក្នុង១ខែៗ។បញ្ហានេះហើយដែលធ្វើឲ្យអ្នកខ្លះនៅតែលើកឡើងថានិសា ចង់កើបលុយពីសិល្បៈ ជាជាងផ្ដោតលើរឿងយកកូនឲ្យបានសម្រេច ៕
