ភ្នំពេញ៖”វិសាល ហេង សុវិសុទ្ធ”ជាឈ្មោះកូនប្រុសរបស់លោកគង់ វិសាល ដែលប្រារពខួប៦ឆ្នាំ នៅថ្ងៃទី៩ វិច្ឆិកា ឆ្នាំ២០២៣ ត្រូវនិងថ្ងៃដែលកម្ពុជាប្រារពខួប៧០ឆ្នាំ នៃបុណ្យឯករាជ្យជាតិ។នៅលើហ្វេសបុកអ្នកដឹកនាំកម្មវិធីសិល្បៈល្បីល្បាញឈ្មោះរបស់ប៉ុស្ដិ៍បាយ័នលោកគង់ វិសាល បានសរសេរថា ខ្លីថា”រីករាយថ្ងៃខួបកំណើតកូនប្រុសGolden Boy “ ភ្ជាប់ដោយរូបភាពកូនលោកជាច្រើនសន្លឹក។
ក្រុមសិល្បករជាច្រើនបានសរសើរលោកគង់ វិសាល ថាទោះជាលោកមមាញឹកក្នុងការងារសិល្បៈយ៉ាងណាក្ដី ប៉ុន្ដែលោកតែងតែផ្ដល់ភាពកក់ក្ដៅដល់ក្រុមគ្រួសារលោកជានិច្ច ពិសេសគឺនៅថ្ងៃខួបកំណើតកូនប្រុសស្រី លោកតែងតែជួបជុំពួកគេដោយការធ្វើខួបនិងញាំអាហារជាលក្ខណៈគ្រួសារជាដើម ទើបធ្វើឲ្យសុភមង្គល ក្នុងគ្រួសារលោកបានរក្សារនូវភាពរីករាយជាប្រចាំ បើទោះជាពេលខ្លះលោកមិនដែលបង្ហោះឲ្យឃើញពីសកម្ម ភាពនៃការជួបជុំនោះគ្រប់ពេលវេលាក៍ដោយ ប៉ុន្ដែតារាសិល្បៈដែលស្និតលោកភាគច្រើនបាន ដឹងថាលោក វិសាល ជាមនុស្សដែលស្រលាញ់ប្រពន្ធកូនខ្លាំងណាស់ ហើយទោះជាទៅដល់ណាក៍លោកមិនដែលភ្លេចគ្រួសារលោកដែរ។
សូមបញ្ជាក់ថាក្នុងបទពិសោធន៍ជាអ្នកដឹកនាំការក្នុងវិស័យសិល្បៈរយៈពេល២៣ឆ្នាំមកនេះលោកគង់ វិសាល ដែលជ្រក ក្រោមដំបូលទូរទស្សន៍បាយ័ននោះបានជួយជ្រោមជ្រែងនិងលើកស្ទួយដល់សិល្បករជាច្រើនដួងមក ហើយទាំង ពិធីករ តារាចម្រៀង និងផ្នែកបវរកញ្ញា ទើបពេលខ្លះតារាល្បីៗទាំងនោះតែងតែនិយាយសរសើរពីគុណសម្បត្តិ របស់លោកដែលជាបុគ្គលម្នាក់ដឹកនាំដោយមនោសញ្ចេតនាយោគយល់ច្រើនដល់ក្រុមសិល្បករ ពោលគឺលោកមិនដែលមានបញ្ហាវិវាទណាជាមួយតារាណាម្នាក់ឡើយ ទើបឈជើងជាច្រើនឆ្នាំនៅប៉ុស្ដិ៍បាយ័នដល់បច្ចុប្បន្ន។
លោកជាអ្នកបណ្ដុះបណ្ដាលធនធានសិល្បករនិងផ្ដល់ការងារឲ្យពួកគេមានប្រាក់ចំណូលតាមរយៈការរៀបចំ Concerts រាប់រយឆាកនាពេលកន្លងមក។ក្រឡេកមកមើលជីវិតស្នេហារបស់លោកក៍ជោគជ័យដូចការងារ សិល្បៈដែរ ក្រោយលោកបានចាប់ដៃអ្នកនាងហេង ហៀង រៀបការកាលពីថ្ងៃទី១៧ខែមករាឆ្នាំ២០១១ ដែលចំ ណងស្នេហារយៈពេល១២ឆ្នាំ មកនេះទទួលបានចំណងដៃកូន២នាក់គឺកូនទី១ស្រីឈ្មោះវិសាល ហេង សុម៉ារីយ៉ា ដែលបានធ្វើខួបកំណើតគម្រប់អាយុ១១ឆ្នាំកាលពីថ្ងៃទី២៩ ខែតុលា ឆ្នាំ២០២៣ និងកូនទី២ប្រុសឈ្មោះ វិសាល ហេង សុវិសុទ្ធ ដែលលោកហៅកូនប្រុសថាGolden Boy (ក្មេងមាស ,ក្មេងឆ្លាត…)អាយុ៦ឆ្នាំ ។ប៉ុន្ដែនៅថ្ងៃខួបកូនប្រុសនេះលោកវិសាល មិនបានធ្វើកម្មវិធីជប់លៀងទ្រង់ទ្រាយធំនោះទេ គឺមានតែការជួបជុំជាលក្ខណៈគ្រួសារប៉ុណ្ណោះ ដែលនេះជាទម្លាប់របស់លោកផងដែរ បើទោះជាលោកតែងតែចូលរួមកម្មវិធីអ្នក សិល្បៈជាញឹកញាប់ក្ដី ៕
