បើទោះបីនាពេលថ្មីៗនេះ កីឡាករ Gareth Baleបានបញ្ជាក់យ៉ាងច្បាស់ថា ខ្លួនមិនទៅណាឆ្ងាយពីក្លឹបយក្ស Real Madrid ក្តី ប៉ុន្តែក្លឹបធំៗចំនួនពីរមកពីក្របខ័ណ្ឌអង់គ្លេសប្រឺមីញេលីកកំពុងចិញ្ចឹមចិត្តចង់បានខ្សែប្រយុទ្ធសញ្ជាតិវេលរូបនេះលេងឱ្យខ្លួន ។ Chelsea និង Man Utd ត្រូវគេមើលឃើញថា ហាក់កំពុងត្រៀមខ្លួនបំបែកឯតទគ្គកម្មតម្លៃខ្លួនដោះដូរកីឡាករពិភពលោកសម្រាប់ខ្សែប្រយុទ្ធ Gareth Bale ។
យោងតាមព្រឹត្តិប័ត្រប្រចាំសប្តាហ៍របស់អេស្ប៉ាញ Don Balon ឱ្យដឹងថា ក្លឹបខាងដើមទាំង២កំពុងថ្លឹងថ្លែងលៃលកថវិកាដេញថ្លៃយក Gareth Baleដែលមានតម្លៃដល់២១៦លានដុល្លារអាមេរិក ។
កាលឆ្នាំ២០១៣ Bale បានបំបែកឯតទគ្គកម្មតម្លៃខ្លួនដោះដូរក្លាយជាកីឡាករដែលមានតម្លៃថ្លៃបំផុតក្នុងលោកពេលផ្លាស់ពីមាន់ខ្នាយមាស Tottenham ទៅ Real ក្នុងតម្លៃ១០៤,៣លានដុល្លារអាមេរិក ។ ទោះជាយ៉ាងណា ឯតទគ្គកម្មនោះត្រូវបានបំបែកដោយកីឡាករPaul Pogba ដែលផ្លាស់ទៅ Man Utd ក្នុងតម្លៃខ្លួន ១១១លានដុល្លារ ៕
ដោយ៖ ហេង ដេត