ភ្នំពេញ៖អ្នកនាងខាត់ សុឃីម បានធ្វើការដាស់តឿនដល់ក្រុមជនឆបោកទាំងឡាយថាពេលនេះឆ្នាំ២០២៤ ហើយអីចឹងល្មមប្ដូរស្ទីលបោកខ្លះទៅ កុំបោកដដែលៗពេកអី អ្នកនាងធុញទ្រាន់ខ្លាំងណាស់…។ប៉ុន្ដែសុឃីម ហាក់សម្ដែងការហួសចិត្តថាស្ទីលបោកដដែលៗរបស់ក្រុមទាំងនោះកោតតែនៅមានអ្នកជឿទៀត ?
ប្រតិកម្មរបស់អ្នកនាងខាត់ សុឃីម បែបនេះកើតមានឡើងបន្ទាប់ពីរូបនាងផ្ទាល់បានឆ្លងកាត់បទពិសោធន៍ត្រូវឧកញ៉ាម្នាក់បោកលុយពីនាងជិត១លានដុល្លារបានសម្រេចកាលពីចុងឆ្នាំ២០២១ ទើបធ្វើឲ្យពេលនោះមានអ្នកខ្លះបានដៀមដាមឲ្យសុឃីម ថានាងជាមនុស្សឆ្លាតប៉ុណ្ណឹងដែរ នៅតែគេបោកបានចុះទម្រាំមនុស្សល្ងង់ទៀតនឹងមានវាសនាទៅជាយ៉ាងណា?កាលនោះសុឃីម ងើបមុខលែងរួចតែម្ដងព្រោះទៅណាមកណាមានតែគេពេប ជ្រាយ ឌឺដងឲ្យថាធ្លាក់ខ្លួន ពិសេសគឺនៅពេលដែលនាងបានចែករំលែកបទពិសោធន៍ផ្ទាល់ខ្លួនបណ្ដាលឲ្យគេបោកនាងបានដើម្បីកុំឲ្យជនផ្សេងទៀតរងគ្រោះដូចនាងនាពេលបន្ទាប់នោះសុឃីម បែជារងនៅការសើចចំអកទៅវិញថា”បើនាងខ្លាំងមែន ម៉េចបានគេបោកបាន ?”។ដោយសារតែមានការឈឺចាប់ព្រោះបំណងល្អរបស់ខ្លួនមិនត្រូវបានគេយកភ្នែកមើល និងត្រចៀកស្ដាប់នោះទើបកាលពីឆ្នាំ២០២២ សុឃីម ដែលគ្រប់គ្នាសង្ស័យថាក្ស័យធន ឬធ្លាក់ខ្លួន ព្រោះតែប្រកាសលក់សម្អាងការផង ផ្ទះផង ជាបន្ទាន់នោះនាងឆ្លើយតបទៅអ្នកមើលស្រាលលើខ្លួននោះតាមរយៈការទិញរថយន្ដLexus Lx 570 និងពាក់គ្រឿងអលង្ការមាស ពេជ្រ ជ្រែកខ្លួននាំឲ្យអ្នកធ្លាប់ពេបជ្រាយលើនាងស្រឡាំងកាំង។នៅឆ្នាំ២០២៣ សុឃីម បានលេង១ក្បាច់ទៀតនោះគឺទិញរថយន្ដបន្ថែមLexus Lx600 ដែលគ្រាន់តែសរុបរថយន្ដទាំង២គ្រឿងនេះគឺមានតម្លៃជាងកន្លះលានដុល្លារបាត់ទៅហើយ នោះមិនគិតពីតម្លៃនាងបើកហាងCosmetic និងទិញរថយន្ដឲ្យកូនប្រុសជិះកម្សាន្ដឡើយ ។គ្រប់គ្នាឆ្ងល់ថាហេតុអីត្រឹមតែជាង២ឆ្នាំសោះសុឃីម សល់លុយច្រើនម្លេះ អ្នកខ្លះសង្ស័យថានាងបានលក់ដីកេរ្ដិ៍នៅជិតវត្តប្រាសាទ ខណៈមានពេលខ្លះសុឃីម និយាយលេងបន្លំមែនផងថាក៍ជំពាក់ធនាគារដូចគេដែរ …។ដោយឡែកការចេញសារឲ្យក្រុមជនបោកប្រាស់គួរតែប្ដូរស្ទីលថ្មីរបស់សុឃីម នាពេលនេះដែរគឺចំពេលដែលពលរដ្ឋនៅខេត្តសៀមរាបខ្ទង់៦ពាក់គ្រួសារបានចាញ់បោកឧកញ៉ាឡេង ចាន់ណា នូវទឹកប្រាក់សរុបដល់ទៅរាប់រយលានដុល្លារ ហើយឧកញ៉ារូបនេះត្រូវបានសម្ថកិច្ចចាប់ខ្លួនកាលពីថ្ងៃទី១២ មីនា ហើយស្ទីលបោកនោះគឺដូចគ្នាទៅនិងសុឃីម ចាញ់បោកឧកញ៉ាម្នាក់ដែរពោលគឺដាក់លុយចូលវិនិយោគជាមួយក្រុមហ៊ុនទទួលបានការប្រាក់ខ្ពស់…។គេជឿរថាសុឃីម មានការខកចិត្តខ្លាំងណាស់ដែលក្រោយនាងចាញ់បោកគេអស់ពីខ្លួន ហើយខំនិយាយរឿងនោះប្រាប់គេដើម្បីកុំឲ្យមានអ្នករងគ្រោះបន្ទាប់ពីនាងនោះតែគ្មានអ្នកជឿរ ហើយស្រាប់តែឥឡូវពលរដ្ឋកាន់តែច្រើនឡើងៗ ត្រូវឧកញ៉ាបោកបានសម្រេចជាបន្ដបន្ទាប់បែបនេះ ។
គួរបញ្ជាក់ថាខាត់ សុឃីម ត្រូវបានគេចាត់ទុកថាជាតារាពហុជំនាញព្រោះដុងសិល្បៈរបស់នាងពីធម្មជាតិអាចឲ្យនាងសម្ដែងសិល្បៈបានជាច្រើនទម្រង់។ប៉ុន្ដែសុឃីម ហាក់ចុះខ្សោយបន្ដិចក្នុងការចេញបទចម្រៀងក្រោយ នាងចាកចេញពីហង្សមាស ខណៈដែលរយៈពេលចុងក្រោយនេះតារាវ័យក្មេងនាងតន់ ច័ន្ទសីម៉ា មានស្ទីល ច្រៀងស្រដៀងនាងទៀតទើបបទថ្មីរបស់នាងមិនសូវផ្ទុះដូចមុន។តែតាំងពីកូវីដស្ងាត់ទៅវិញនេះសុឃីម បានចេញច្រៀងភ្លេងការ កាត់សក់ ស្ទើរាល់ថ្ងៃនារដូវក្ដៅ ហេតុនេះហើយនាងនៅតែរកប្រាក់ចំណូលបានខ្ពស់ពីសិ ល្បៈដដែល ។ប៉ុន្ដែរឿងដែលគួរឲ្យស្ដាយអ្នកនាងបានលុបចោលគម្រោងយកកូនទី៣ ទៅហើយ ព្រោះយល់ថាសម័យនេះបើមានកូនហើយ ឪពុកម្ដាយគ្មានពេលវេលាអប់រំមើលកូនទេ ពិបាកធ្វើឲ្យក្មេងដើរផ្លូវល្អ។ចំណែកការជម្រុញពីសិល្បករនិងមហាជនដែលចង់ឃើញនាងឈរឈ្មោះជាប្រធានសមាគមសិល្បករខ្មែរ នៅអាណត្តិថ្មីនេះត្រូវបានសុឃីម បដិសេធថានាងមិនបានត្រៀមឈរជាបេក្ខភាពនោះឡើយ ។
ចំណងស្នេហាខាត់ សុឃីម និងលោកអ៊ិន សុបញ្ញា ហៅផាណូ រយៈពេល១២ឆ្នាំមកនេះទទួលបានចំណងដៃកូនស្រីម្នាក់ឈ្មោះបញ្ញា ហ្វូតូស្អាត អាយុជិត១០ឆ្នាំ ខណៈកូនប្រុសច្បងរបស់នាងឈ្មោះស្កាយ មានអាយុជិត២០ឆ្នាំទៅហើយ ។អ្នកនាងសុឃីម ធ្លាប់ថាមានកូន២នាក់គ្រប់គ្រាន់សម្រាប់ក្រុមគ្រួសារនាង។
មហាជនរងចាំមើលថាតើខាត់ សុឃីម ដែលដាស់តឿនដល់ជនបោកប្រាស់គួរតែផ្លាស់ប្ដូរវិធីបោក កុំដដែលៗ ទៀត ព្រោះនាងធុញ នោះសុឃីម ខ្លួនឯង អាចគេចផុតពីគេបោកជាលើកទី២ បានដែរឬទេ ?
