ភ្នំពេញ៖តារាលេងក្បាច់រាំនាងសេន យូរី នៅមិនទាន់បញ្ចេញមុខម្ចាស់ស្នេហាថ្មីទេ ក្រោយចែកផ្លូវពីលោកថៅកែជា នី ជាង២ឆ្នាំនេះ នាងសុខចិត្តជ្រើសផ្លូវទៅណាមកណា តែម្នាក់ឯង ពិសេសគឺកាន់ចង្កូតរថយន្ដខ្លួន ឯងទៀតផង ខណៈដែលពីមុនលោកនី ធ្វើជាតៃកុងបើកឡានជូននាងទៅគ្រប់ទិសទី ។មិត្តភក្ដនៅជុំវិញខ្លួនយូរី សុទ្ធតែជម្រុញកុំឲ្យនាងធ្វើបែបនេះតទៅទៀតអី ពោលគឺគួរតែបើកបេះដូងទទួលយកស្នេហាថ្មី ដើម្បីលុបដានចោលស្នេហាចាស់ ព្រោះថៅកែមានស្រីស្នេហ៍ថ្មី តាំងពីចែកផ្លូវពីនាងភ្លាមៗម្លេះ។ ប៉ុន្ដែយូរី ហាក់ដូចជាចង់បាក់ស្បាតនិងរឿងស្នេហា ព្រោះតែធ្លាប់លេចឭថានាងគ្រោងរៀបការជាមួយថៅកែទៀតផង អំឡុងស្រលាញ់គ្នាខ្លាំង តែនៅទីបំផុតមនុស្សប្រុសដែលនាងទុកចិត្ត បែជាមិនអាចធ្វើឲ្យនាងរំភើបនៅថ្ងៃពិសេសនោះទៅវិញ ។
បើតាមព័តមានថាយូរី ក្រោយប្រេះឆាស្នេហ៍ថៅកែនាងមានប្រុសទាំងក្នុងនិងក្រៅស្រុកចង់ចូលខ្លួនមកស្អំរបួសបេះដូង ប៉ុន្ដែស្រីស្រស់រូបនេះហាក់ប្រយ័ត្នប្រយ៉ែងក្នុងការទទួលយកគូស្នេហ៍ថ្មី ដែលបញ្ហានោះគ្មានអ្វីក្រៅពីនាងខ្លាចដើរជាន់ដានចាស់ជាថ្មីម្ដងទៀតនោះឡើយ ។យូរី បានយកការឈឺចាប់ពីការបរាជ័យព្រោះស្នេហាមកពង្រឹងអាជីពចម្រៀងរបស់ខ្លួនឲ្យទៅមុខថែមទៀត ហើយរយៈពេលចុងក្រោយនេះគេឃើញបទចម្រៀងនាងខ្លះចេញដោយខ្លួនឯងន្ថែមពីលើហង្សមាសទម្លាក់ឲ្យច្រៀងទៀតផង។តែយូរី មិនទាន់រកបានដៃគូដ៍សាកសមឡើយ ក្រោយនាងចែកផ្លូវជាមួយបុរសរូបសង្ហារលោកប៊ីម៉ូ ហេតុនេះហើយការច្រៀងសម្ដែងរបស់នាងមិនទាន់មានអ្វីថ្មីនិងប្លែកខ្លាំងទេ ក្រៅពីការលេងក្បាច់រាំ។
អ្នកយកព័តមានយើងបានទូរស័ព្ទទៅយូរី កាលពីពេលថ្មីៗនេះ តែលេខនាងតេមិនចូលឡើយ ។យ៉ាងណាយូរី ដែលគេថានាងចេញពីសាន់ដេ ចូលហង្សមាសដើម្បីជំនួសនាងទេព បូព្រឹក្ស នោះពេលនាងពិតជាក្លាយទៅជាតារាលេងក្បាច់រាំគូរឲ្យចាប់អារម្មណ៍ម្នាក់របស់ផលិតកម្មមួយនេះមែន បើទោះជាម្រាប់បទស្លូវយូរី មិនទាន់មាន១បទណាល្បីខ្លាំងក៍ដោយ តែនាងពង្រឹងទីផ្សារដោយផ្ដោតតែលើបទញាក់ ច្រើនជាងសង់ទីម៉ង់ ។ចំណែករឿងដែលយូរី ថានឹងឈានទៅថតភាពយន្ដបន្ថែមពីលើអាជីពចម្រៀងដើម្បីឲ្យទីផ្សារសិល្បៈរបស់នាងកាន់តែទូ លាយនោះពេលនេះ គឺនៅមិនទាន់ឃើញស្រីស្រស់ឆក់បានតួឯក១រឿងណាទេ ខណៈដែលតារាចម្រៀងភាគ ច្រើននៅហង្សមាសសុទ្ធតែឆ្លៀតថតរឿងដូចគ្នា ។
ប្រភពបានឲ្យដឹងថាយូរី ធ្លាប់បរាជ័យស្នេហា៣លើកមកហើយនោះគឺកាលពីឆ្នាំ២០១៨ នាងត្រូវអតីតប្រុស្នេហ៍ឈ្មោះរ៉េត រៀបការប្រពន្ធចោល ហើយក្រោយមកនាងនិងប៊ីម៉ូ ក៍មិនអាចកាន់ដៃគ្នាតទៅទៀត ខណៈប្រុសដែលធ្វើឲ្យនាងខកចិត្តខ្លាំងចុងក្រោយគឺលោកថៅកែជា នី ។យ៉ាងណាសម្រស់ស្អាតដូចយូរី ប្រាកដជាមិនខ្វះឡើយប្រុសៗចង់ធ្វើជាសង្សារនាង ហើយគេក៍មិនសូវជឿជាក់ថានាងទុកបេះដូងឲ្យនៅទំនេររហូតដល់ជាង២ឆ្នាំនេះដែរ តែគេសង្ស័យថានាងអាចជ្រើសផ្លូវលាក់គូស្នេហ៍ថ្មីច្រើនជាង។
មជ្ឈដ្ឋានមហាជនមើលឃើញថានៅឆ្នាំ២០២៤ នេះតារាចម្រៀងដែលជ្រើសផ្លូវលាក់មុខគូស្នេហាមានតិចជាងបង្ហាញស្នេហ៍ជាសាធារណៈ ព្រោះថាបច្ចុប្បន្នតារាភាគច្រើនរកស៊ីOnline ហេតុនេះហើយការចេញមុខព្រមគ្នាធ្វើឲ្យពួកគេកាន់តែមានភាពទាក់ទាញជាងលាក់មុខសង្សារ។ប៉ុន្ដែសម្រាប់យូរី វិញនាងហាក់ឈឺចាប់ស្នេហាចុងក្រោយនេះខ្លាំង ទើបរក្សារភាពស្ងៀមស្ងាត់ហើយក៍គ្មានចេតនាចង់បញ្ចេញមុខសង្សារថ្មី ដើម្បីបញ្ឈឺចិត្តដល់ថៅកែឡើយ។ប្រភពបានឲ្យដឹងថាយូរី នៅតែចង់សាកល្បងជ្រើសគូស្នេហ៍ថ្មីជាបុរសនៅក្រៅរង្វង់សិល្បៈម្ដងទៀត ព្រោះតែនាងបានដឹងច្បាស់ថាអាជីពសិល្បៈគ្មានអ្វីថិតថេទេ ហេតុនេះនាងចង់មានអាជីវកម្មមួយរឹងមាំក្រៅពីសិល្បៈ។ប៉ុន្ដែពេលនេះយូរី ហាក់ដូចជាបាត់ដៃស្ដាំទៅហើយ ព្រោះអំឡុងពេលដែលនៅផ្អែមល្ហែមស្នេហ៍ថៅកែនោះលោកនី តែងតែជួយផ្ដល់យោបល់ឲ្យនាងពីការរកស៊ី ធ្វើជំនួញដែលក្នុងនោះមានទាំងការគ្រោងសម្ពោធសាលាសម្ផស្សដ៍ធំមួយនៅក្បែផ្សារស្ទឹងមានជ័យថ្មីទៀតផង ។ប៉ុន្ដែក្រោយបាត់ថៅកែដំណឹងនេះក៍បានស្ងាត់ទៅវិញ ព្រោះយូរី ងាកមកពង្រឹងអាជីពចម្រៀងនៅហង្សមាសបន្ថែមទៀត បើទោះជាបច្ចុប្បន្ននាងមិនទាន់អាចប្រជែងជាមួយតារាស្រីផលិតកម្មធំនេះនៅលំដាប់ជូរមុខក្ដី ប៉ុន្ដែនាងនៅតែមានទីផ្សារល្អផ្នែកចម្រៀងយុវវ័យ ៕