ភ្នំពេញ៖ ចម្រៀងកញ្ញាសុខ ស្រីម៉ុច បានចេញមុខអំពាវនាវដល់មហាជនក៏ដូចជាយុវជនខ្មែរគួរតែចូលរួមការគាំទ្រចំពោះវិស័យភាពយន្តជាតិឲ្យបានផុសផុល ខណ:បច្ចុប្បន្នលំហូរនៃភាពយន្តបរទេសកំពុងមានការប្រកួតប្រជែងកាន់តែខ្ពស់ សម្រាប់ទីផ្សារកុននៅខ្មែរ។
កញ្ញាសុខ ស្រីម៉ុច បានថ្លែងថានាងសូមស្នើរដល់បងប្អូនមហាជនខ្មែរត្រូវចូលរួមគាំទ្រលើកស្ទួយវិស័យភាពយន្តខ្មែរយើងឲ្យបានគ្រប់គ្នា ប្រសើជាងការគាំទ្រភាពយន្តបរទេសដែលជាប្រទេសជិតខាងហើយម្យ៉ាងទៀតនាងក៏អំពាវនាវឲ្យមានការកាត់បន្ថយការនាំចូលឬដាក់ចាក់បញ្ចាំងភាពយន្តបរទេសដើម្បីឲ្យភាពយន្តរបស់ខ្មែរកាន់តែមានទីផ្សារទូលាយ និងការគាំទ្រពីពលរដ្ឋខ្មែរច្រើនថែមទៀត។
កញ្ញាសុខ ស្រីម៉ុច បាននិយាយទៀតថាអ្វីដែលជាការព្រួយបារម្ភនោះគឺយុវជនខ្មែរមួយចំនួនហាក់មិនសូវជាមើលឃើញពីតម្លៃភាពយន្តក្នុងស្រុកទេដោយបងប្អូនខ្លះងាកទៅគាំទ្រតែភាពយន្តរបស់ប្រទេសជិតខាងដូច្នេះទើបនាងបានចេញមកស្នើរដោយទទូចឲ្យបងប្អូនចូលរួមលើកស្ទួយវិស័យភាពយន្តរបស់ខ្មែរដែលផលិតករខិតខំផលិតកន្លងមក ដើម្បីជាកំលាំងចិត្តដល់ពួកគាត់ប្រឹងប្រែងពង្រឹងគុណភាពតទៅទៀត ។
សូមបញ្ជាក់ថាតារាសម្ដែងនិងចម្រៀងកញ្ញា សុខស្រីម៉ុច ឬ ទេព ស្រីម៉ុច បច្ចុប្បន្នត្រូវគេមើលឃើញថាថ្វីត្បិតនាងមានភាពមមាញឹកការងារច្រើនទាំងអាជីពសិល្ប:និងផ្ទាល់ខ្លួនបន្តិចក្តី តែបើនិយាយពីរូបសម្រស់ស្រស់កាន់តែស្អាតក្មេងជាងវ័យផងដែរ ។តារារូបនេះធ្លាប់បានសាងស្នាដៃតាមរយៈភាពយន្ដជាច្រើនរឿងមកហើយ ខណៈដែលទសស្សនិកជនក៍បានឃើញពីទេពកោសល្យរបស់នាងផងដែរថាពិតជាមិនធម្មតា ព្រោះទាំងច្រៀងក៍ពិរោះសម្ដែងជាតួអ្វីក៍សាកសមខ្លាំង ៕
