ខេត្តកំពង់ស្ពឺ ៖ រថយន្តធុនធំ ១គ្រឿង បើកបរក្នុងល្បឿនលឿន រួចជ្រុលបុករថយន្ត ១គ្រឿងទៀត និងបន្តបុករះម៉ូតូ ចំនួន៣គ្រឿង បណ្តាលឱ្យមនុស្សប្រុសស្រី ចំនួន៥នាក់ បានរងរបួសធ្ងន់-ស្រាល និងត្រូវបានដឹកបញ្ជូនទៅសង្គ្រោះនៅមន្ទីរពេទ្យភ្លាមៗ។
ហេតុការណ៍គ្រោះថ្នាក់ចរាចរណ៍បុករះនេះ បានកើតឡើង កាលពីវេលាម៉ោង៦ព្រឹក ថ្ងៃទី១៣ ខែឧសភា ឆ្នាំ២០២៤ នៅតាមបណ្តោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៥៥-៥៦ ត្រង់ចំណុចភូមិឡ ឃុំកាហែង ស្រុកសំរោងទង។
តាមប្រភពពីកន្លែងកើតហេតុ បានឱ្យដឹងថា មុនពេលកើតហេតុ គេឃើញរថយន្ត ១គ្រឿង ម៉ាក SHACMAN ពណ៌សលាយបៃតង ពាក់ស្លាកលេខ ភ្នំពេញ 3E-4447 មានសណ្តោងសឺមីរ៉ឺម៉ក ពាក់ស្លាកលេខ ភ្នំពេញ 4A-4633 អ្នកបើកបរមិនស្គាល់អត្តសញ្ញាណ (គេចខ្លួនក្រោយពេលកើតហេតុ) បើកបរពីទិសខាងកើត ទៅលិច លុះមកដល់ចំណុចខាងលើ បានប៉ះរថយន្តមួយគ្រឿង មិនស្គាល់ម៉ាក និងអត្តសញ្ញាណអ្នកបើកបរ (បើកគេចក្រោយពេលកើតហេតុ) ដែលកំពុងបើកបរបញ្ច្រាសទិសគ្នា បន្ទាប់មករថយន្តម៉ាក SHACMAN ខាងលើ បានជ្រុលទៅបុករះម៉ូតូ ចំនួន៣គ្រឿងទៀត រួមមាន ទី១-ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ កំពង់ស្ពឺ 1N-1528 អ្នកបើកបរឈ្មោះសុត ចាន់ចាវ ភេទប្រុស អាយុ២៦ឆ្នាំ រួមដំណើរដោយឈ្មោះសុត សុខណា ភេទស្រី អាយុ៣៣ឆ្នាំ ទាំង២នាក់ មានលំនៅ ភូមិមាត់សាយ ឃុំតាំងស្យា ស្រុកភ្នំស្រួច។ ទី២-ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ កំពង់ស្ពឺ 1V-4842 អ្នកបើកបរឈ្មោះ កឹង លន់ ភេទស្រី អាយ២៤ឆ្នាំ (មានផ្ទៃពោះ) មានលំនៅ ភូមិក្រាំងពន្លៃ ឃុំគិរីវ័ន ស្រុកភ្នំស្រួច ខេត្តកំពង់ស្ពឺ និងទី៣-ម៉ូតូម៉ាក HONDA BEAT ពណ៌ក្រហម-ស ពាក់ស្លាកលេខ កំពង់ស្ពឺ 1V-3645 អ្នកបើកបរឈ្មោះសាវុធ សុថេន ភេទប្រុស អាយុ២២ឆ្នាំ មានលំនៅ ភូមិអូររំចារ ឃុំតាំងសំរោង ស្រុកភ្នំស្រួច រួមដំណើដោយឈ្មោះយូ សារ៉េន ភេទស្រី អាយុ២១ឆ្នាំ មានលំនៅ ភូមិគងរកា ឃុំព្រៃរំដួល ស្រុកភ្នំស្រួច។
ប្រភពដដែល បន្តថា រថយន្តបង្កហេតុ បានបុករះម៉ូតូ ទាំង៣គ្រឿងខាងលើ ដែលកំពុងបើកបរបញ្ច្រាសទិសគ្នា ពីលិច ទៅកើត បណ្តាលឱ្យមនុស្សសរុប៥នាក់ (ស្រី៣) រងរបួសធ្ងន់-ស្រាល ក្នុងនោះធ្ងន់២នាក់ (ឈ្មោះកឹង លន់ ភេទស្រី និងឈ្មោះយូ សារ៉េន ភេទស្រី) និងត្រូវបានមន្ត្រីជំនាញហៅរថយន្តសាមុយ ដឹកអ្នករងរបួសធ្ងន់យកទៅសង្គ្រោះនៅឯមន្ទីរពេទ្យបង្អែកខេត្តកំពង់ស្ពឺ។
ចំពោះវត្ថុតាងរថយន្ត និងម៉ូតូ ត្រូវបានសមត្ថកិច្ចជំនាញចុះធ្វើការវាស់វែង រួចអូសយកទៅរក្សាទុក រង់ចាំដោះស្រាយតាមនីតិវិធី៕
