ភ្នំពេញ៖ស្រីតូច ចំណាន បានឡើងជាប្រធានសិល្បករខ្មែរអាណត្តិទី៦ ជាង២សប្ដាហ៍មកហើយ នឹងបានបើកកិច្ចប្រជុំជាបន្ដបន្ទាប់ជាមួយសិល្បករអាជីព និងអ្នកជំនាញសិល្បៈដើម្បីរិះរកមតិរួមពង្រឹងសិល្បករឲ្យមានគុណភាព ធ្វើជាគំរូរបស់មហាជន។ទោះជាយ៉ាងណាអ្វីដែលជាការទន្ទឹងរងចាំរបស់សិល្បករ និងទស្សនិកជននា ពេលនេះគេចាំមើលថាតើលោកជំទាវអ្នកឧកញ៉ាម៉ៅ ចំណាន នឹងមានការដឹកនាំសមាគមសិល្បករអាណត្តិថ្មីនេះបានល្អជាងអ្នកនាងចន ច័ន្ទលក្ខិណា ដែលបញ្ចប់អាណត្តិចាស់ ឬយ៉ាងណា?
បើយោងតាមតារាដែលត្រូវបានស្រីតូច ចំណាន កោះប្រជុំកាលពីពេលថ្មីៗនេះពួកគេបង្ហើបថាពេលនេះរចនា សម្ព័ន្ធថ្មីរបស់សមាគមសិល្បករខ្មែរអាណត្តិទី៦ នៅមិនទាន់បានរៀបចំរួចរាល់នៅឡើយទេ ហើយការប្រជុំកាល ពីពេលថ្មីៗនេះគ្រាន់តែលោកជំទាវឧកញ៉ាចំណាន ស្ដាប់មតិសិល្បករដែលចូលរួមបញ្ចេញជាយោបល់ជុំវិញការ កំណត់អត្តសញ្ញាណថាបុគ្គលសិល្បករបែបណាគួរតែនឹងក្លាយទៅជាសមាជិករបស់សមាគមមួយនេះដែលមានកាតជាសម្គាល់ និងសិល្បករបែបណាមិនគួរត្រូវបានផ្ដល់ជាសមាជិករបស់សមាគម។ប្រភពបានឲ្យដឹងថានៅក្នុងកិច្ចប្រជុំនោះក៍មានក៍មានការលើកឡើងថាតារាTik Tok ខ្លះក៍មិនគួរណាក្លាយទៅជាសមាជិករបស់សមា គមដែរ ។
លោកអ៊ូ ប៊ុណ្ណារ៉ាត់ ហៅនាយក្រឹម ដែលបានចូលរួមប្រជុំជាមួយសិល្បករមួយចំនួនទៀតក្រោមការដឹកនាំរបស់លោកជំទាវឧកញ៉ាស្រីតូច ចំណាន កាលពីពេលថ្មីៗនេះបានប្រាប់”នគរធំ” តាមទូរស័ព្ទកាលពីរសៀលថ្ងៃទី១៦ ឧសភា ថាពេលនេះសមាគមសិល្បករអាណត្តិថ្មី កំពុងរៀបចំរចនាសម្ព័ន្ធថ្មីមិនទាន់រួចរាល់នោះទេ ហើយលោកពេញចិត្តក្នុងការចូលរួមផ្ដល់យោបល់ពិភាក្សាគ្នាដើម្បីឲ្យសិល្បៈខ្មែររីកចម្រើនទៅមុខ។នាយក្រឹម បន្ថែមថាលោកបានផ្ដល់យោបល់ដល់លោកជំទាវចំណាន ថាឲ្យសមាជិកក្នុងសមាគមសិល្បករខ្មែរទាំងអស់បង់លុយប្រចាំឆ្នាំមកសមាគម ដើម្បីឲ្យសមាគមមានចំណូលឬប្រាក់តំកល់ តែលោកសូមឲ្យលោកជំទាវ ប្រធានសមាគមយកតម្លៃទាប ដើម្បីឲ្យសិល្បករចូលក្នុងសមាគមបានច្រើន។លោកប៊ុណ្ណារ៉ាត់ ថាចំណុចនេះលោកជំទាវចំណាន បានស្ដាប់យោលបល់លោកដែរ ហើយលោកក៍បាននិយាយចង់ឲ្យសិល្បៈមានការររួបរួមគ្នា។លោកថាករណីតារាTik Tok បើគាត់មានក្រមសីលធ័មល្អ តាមគំនិតរបស់លោកក៍អាចក្លាយទៅជាសមាជិករបស់សមា គមបានដែរ ព្រោះគេក៍មានការគាំទ្រច្រើន មានViews ច្រើនដែរ តែសំខាន់បំផុតលើក្រមសីលធ័ម ។
ឆ្លើយតបសំណួរថាតើលោកអ៊ូ ប៊ុណ្ណារ៉ាត់ មានជំនឿរចិត្តថាលោកជំទាវអ្នកឧកញ៉ាស្រីតូច ចំណាន អាចដឹកនាំសមាគមសិល្បករខ្មែរអាណត្តិទី៦ បានល្អជាងលោកជំទាវចន ច័ន្ទលក្ខិណា ដែរ ឬអត់នោះនាយក្រឹមថា បែជាថាសំណួរនេះមិនគួរសួរទៅវិញ តែថាអ្វីដែលលោកក៍ដូចជាសិល្បករផ្សេងទៀតមានភាពកក់ក្ដៅនោះគឺលោកជំ ទាវឧកញ៉ាម៉ៅ ចំណាន មានទ្រព្យធនអីចឹងរឿងបញ្ហាហិរញ្ញវត្ថុលុយកាក់មួយគឺអត់ភ័យទេ ។លោកប៊ុណ្ណារ៉ាត់ ថាមនុស្សដើរហាលភ្លៀង តែងតែទទឹកភ្លៀងហើយ និងថាអ្នកនាងចន ច័ន្ទ ក៍ជាអ្នករងគ្រោះម្នាក់ដែរ។លោកប៊ុណ្ណារ៉ាត់ បន្ថែមថាលោកសប្បាយចិត្តដែលប្រធានសិល្បករខ្មែរអាណត្តិថ្មីមានការកោះប្រជុំស្ដាប់មតិសិល្បកររៀមច្បងចាស់ៗ ដែលនេះជាចំណុចល្អមួយ ហើយពីមុនមកលោកមិនដែលឃើញ។លោកថាថ្ងៃក្រោយបើមានការតែងតែងរូបលោកជាផ្នែកណាមួយក្នុងសមាគមសិល្បករខ្មែរអាណត្តិថ្មីនៅក្នុងរចនាសម្ព័ន្ធនោះលោកពេញចិត្តនឹងទទួលធ្វើការងារនោះដោយស្ម័គ្រចិត្តជានិច្ច។
សូមបញ្ជាក់ថាអំឡុងពេលដែលអ្នកនាងចន ច័ន្ទលក្ខិណា នៅជាប្រធានសិល្បករខ្មែរអាណិត្តិទី៥ នោះបញ្ហាដែលចម្រូងចម្រាសខ្លាំងគឺមានសិល្បករខ្មែរល្បីៗខ្លះបានឈ្លោះគ្នាតាមបណ្ដាញសង្គមដែលធ្វើឲ្យសិល្បៈធ្លាក់តម្លៃ ព្រោះទស្សនិកជនមិននឹកស្មានថាតារាល្បីៗពូកែជេរប្រទេចគ្នានៅលើហ្វេសបុកខ្លាំងជាងពលរដ្ឋធម្មតា ទៅទៀត។ចំណែកលោកជំទាវម៉ៅ ចំណាន វិញនៅថ្ងៃជាប់ឆ្នោតជាប្រធានភ្លាមៗនោះលោកជំទាវបានឆ្លើយទៅអ្នកកាសែតថានឹងយកបញ្ហានេះមកដោះស្រាយផងដែរ ព្រោះលោកជំទាវក៍មានក្រុមមេធាវីស្ម័គ្រចិត្តរបស់សមាគមចាំប្រឹក្សាលើបញ្ហានេះដែរ ។
ចំពោះនាយក្រឹម វិញយល់ថាការឈ្លោះគ្នាលើបណ្ដាញសង្គមនោះជារឿងបុគ្គល ហើយបើគិតតែពីតាមដានរឿងគេជេរគ្នានោះនាយថាមិនចាំបាច់រកស៊ី ធ្វើការអីកើតទេ ។លោកថាកុំថាឡើយសមាគម សូម្បីតែថ្នាក់ដឹក នាំក៍អីចឹងដែរមានពេលឯណាទៅតាមដានគេឈ្លោះគ្នាលើហ្វេសបុក?
អ្នកជំនាញសិល្បៈបានលើកឡើងថាគេអាចវាយតម្លៃពីស្នាដៃការដឹកនាំរបស់លោកជំទាវអ្នកឧកញ៉ាម៉ៅ ចំណាន បានក្រោយពេលប្រធានសមាគមសិល្បករខ្មែរអាណត្តិទី៦ នេះដឹកនាំបាន១០ខែដំបូង ថាតើលោកជំទាវបានកែប្រែប្រព័ន្ធគ្រប់គ្រង នឹងពង្រឹងគុណភាពអ្វីខ្លះទៅលើសមាគមមួយនេះ ខណៈដែល១អាណត្តិរបស់លោកជំទាវមានពេល៥ឆ្នាំពោលគឺដល់ឆ្នាំ២០២៩ ឯណ្ណោះ ៕
