ភ្នំពេញ៖ដួង វីរៈសិទ្ធ ដែលធ្លាប់ច្រៀងតាមហាង ,Pub ជាច្រើនឆ្នាំ នាពេលរាត្រីនោះពេលនេះលោកបានវិវត្តន៍ខ្លួនទៅជាម្ចាស់វង្សភ្លេងផ្ទាល់ខ្លួនមានឈ្មោះថា”ដួង វីរៈសិទ្ធ តន្រ្ដី “ដើម្បីបម្រើដល់សេវាកម្មកម្សាន្ដទូទាំងខេត្តក្រុងដែលលោកនឹងរៀបចំអ្នកចម្រៀងទៅតាមប្រភេទម្ចាស់កម្មវិធីកុម្មង់។នេះជាការឈានមួយជំហានទៀតរបស់អតីតតារាចម្រៀងផលិតកម្មមហាហង្ស និងហង្សមាស ដែលកែប្រែជីវិតពីច្រៀងឲ្យគេទៅជាធ្វើថៅកែខ្លួនឯង បើទោះជាលោកនៅតែចេញច្រៀងតាមបណ្ដារកម្មវិធីរបស់ក្រុមហ៊ុនAgency ផ្សេងៗទៀតដូចជាលោកយ៉ែម សំអូន និងអាឡិច ចាន់ត្រា ជាធម្មតា ក្ដី ។ប្រភពបានឲ្យដឹងថាវីរៈសិទ្ធ ចង់រកប្រាក់ចំណូលបន្ថែមទើបលោកខិតខំសន្សំលុយដើម្បីមានមុខរបរផ្ទាល់ខ្លួន ហើយឆាកតន្រ្ដីខ្នាតតូចនោះភាគច្រើនគេជួលថៅកែក្មេងនេះទៅច្រៀងតែម្ដង អមដោយតារាមួយចំនួនទៀតមិនសូវល្បីហេតុនេះហើយបានលោកសិទ្ធ អាចរកបានលុយមូល ឬអត់បែកលុយ។
ក្រៅពីលោកដួង វីរៈសិទ្ធ តារាដែលបើកវង្សតន្រ្ដីផ្ទាល់ខ្លួនមានដូចជាលោកសុខ រក្សារ,ជុំ លីណូ ចាប់ដៃមាស សាលី ,អាឡិច ចាន់ត្រា ,យ៉ែម សំអូន និងសុភ័ក្រ កុសុម៉ា ជាដើម ។តាមដំណឹងថាលោកវីរៈសិទ្ធ មើលឃើញថាក្រុមហ៊ុនកម្សាន្ដមានតម្រូវការគ្រប់ទីកន្លែង ហេតុនេះហើយបានជាលោកចំណាយលុយបោះទុនលើមុខរបរមួយនេះដោយគ្មានការស្ទាក់ស្ទើ ព្រោះថាមានរៀមច្បងដែលដើរផ្លូវនេះមុនលោកពួកគេក៍ទទួលបានជោគជ័យសល់ផ្ទះនិងរថយន្ដទំនើបៗជិះគ្រប់គ្នាទើបលោកមិនអាចមើលរំលងពីមុខរបរដែលខ្លួនបានដឹងនិងយល់ច្បាស់ជាយូឆ្នាំមកហើយនេះបានទេ ។
ដួង វីរៈសិទ្ធ ជាអ្នកចម្រៀងដែលមានសម្ថភាពមិនធម្មតាឡើយ ព្រោះអាចធ្វើភ្លេង ,និពន្ធទំនុកច្រៀង ,Mix និងលេងហ្គីតា បានដោយខ្លួនឯង ដែលតារាផ្សេងៗទៀតពិបាកធ្វើបានដូចលោក។ម្ចាស់ពានI Am A Singer Cambodia រដូវកាលទី១ រូបនេះមានបងប្រុសរបស់លោកឈ្មោះម៉ម សំនៀង ជាតារាចម្រៀង និងចេះលេងឧបករណ៍តន្រ្ដីទាំងបុរាណ និងសម័យផងដែរ ខណៈដែលប្អូនប្រុសលោកម្នាក់ទៀតក៍ជាតារាចម្រៀងដែរឈ្មោះម៉ម ពេជ្ជរិទ្ធ ម្ចាស់បទ”មិនអាចឃាត់ទេ” ដែលអាចលេងឧបករណ៍តន្រ្ដីបានដូចលោកដែរ ព្រមទាំងជាសមាជិកក្នុងក្រុមចម្រៀងSmall World Small Band ស្របពេលដែលម្ដាយលោកវីរៈរិទ្ធ ក៍ជាតារាចម្រៀងផ្នែកបុរាណប្រចាំខេត្តកំពង់ស្ពឺ ដែរ។
គួររំលឹកថាដូង វីរៈសិទ្ធ មានឈ្មោះដើមថាម៉ម វាសនា បានដើរចេញពីហង្សមាសទៅជ្រកនៅរាម ជាមួយមាស សុខសោភា បាន២ឆ្នាំ។បើទោះជាពេលនេះសុខសោភា បានចាកចេញពីរាម ទៅហើយ ក្ដី ក៍លោកវីរៈសិទ្ធ នៅតែបន្ដច្រៀងឲ្យផលិតកម្មនេះដដែល ដោយគ្មានគម្រោងវិលទៅហង្សមាសវិញ ឬចូលGalaxy ឡើយ។លោកវីរៈសិទ្ធ ធ្លាប់ប្រាប់អ្នកយកព័តមានយើងថាលោកមិនមានការព្រួយបារម្ភរឿងប្ដូរផលិតកម្មច្រៀងទេ ព្រោះទោះជាទៅដល់ណាក៍ទីផ្សារលោកនៅតែប៉ុណ្ណឹង ហើយច្រៀងនៅផលិតកម្មណាក៍លោកនៅតែធ្វើបទចម្រៀងដោយខ្លួនឯងដដែល ។ដោយឡែកមាស សុខសោភា វិញថ្មីៗនេះនាងបង្ហើបថានឹងមានបទចម្រៀងថ្មីជាមួយលោកវីរៈសិទ្ធ ដែលបញ្ជាក់ថាទោះជាពេលនេះពួកគេលែងច្រៀងនៅផលិតកម្មតែមួយមែន តែទំនាក់ទំនងនិងការរាប់អានគ្នាគឺនៅដដែល ព្រោះសុខសោភា ធ្លាប់សរសើរវីរៈសិទ្ធ ថាជាតារាមានសម្ថភាពល្អម្នាក់។
គេចាំមើលថាតើមុខរបស់ថ្មីរបស់លោកដួង វីរៈសិទ្ធ អាចកាក់កបដូចរៀមច្បងដែលបានរកស៊ីមុនលោកដែរឬយ៉ាងណា ?
