ភ្នំពេញ៖តារាសម្ដែងកូនខ្មែរកាត់ថៃនាងនែប ព្រំរិទ្ធិកា វាចាថាក្រោយពីដៃគូរបស់នាងគឺលោកDj ផាន់រ៉ុង បានភ្ជាប់ពាក្យទៅការសម្ដែងរបស់នាងជាមួយឌីជេ រូបនេះគឺនៅតែបន្ដដូចមុនដដែល ពោលគឺគូដណ្ដឹងរបស់លោកមិនប្រចណ្ឌនាងនោះទេ ទោះជានាងនិងលោកលេងស្និតស្នាលគ្នាយ៉ាងណាក៍ដោយ។ស្រីស្រស់សម្រស់គួរឲ្យក្នាក់ក្នាញ់រូបនេះថាតាមពិតនាងបានស្គាល់ម្ចាស់ស្នេហ៍របស់លោកផាន់រ៉ុង តាំងពីមុនពួកគេភ្ជាប់ពាក្យម្លេះ ។
នែប ព្រំរិទ្ធិកា ប្រាប់”នគរធំ”នារសៀលថ្ងៃទី១៤ មិថុនា ថា”ខ្ញុំនិងឌីជេ ផាន់រ៉ុង នៅតែធ្វើការជាមួយគ្នា ថតរឿងជាមួយគ្នាធម្មតាដូចមុន។គូដណ្ដឹងគាត់មិនប្រចណ្ឌខ្ញុំទេ ព្រោះអីពួកយើងបានស្គាល់គ្នាតាំងពីមុនគាត់ទាំងពីរភ្ជាប់ពាក្យម្លេះ “។
ស្រីស្អាតនែប ព្រំរិទ្ធិកា បានថតរឿងខ្លីជាមួយDJ ផាន់រ៉ុង ជាច្រើនរឿង ដោយអ្នកទាំងពីរលេងស៊ីចង្វាក់គ្នាយ៉ាងល្អ រហូតមានការសង្ស័យថាពួកគេគឺជាគូសង្សារនិងគ្នាទៀតផង ។ប៉ុន្ដែកាលពីថ្ងៃទី១៤ ខែមករា ឆ្នាំ២០២៤ លោកផាន់រ៉ុង បានភ្ជាប់ពាក្យជាមួយនាងម៉ាលីកា ទើបធ្វើឲ្យពាក្យខ្សឹបខ្សៀវថានាងរិទ្ធិកា និងផាន់រ៉ុង មានទំនាក់ទំនងពិសេសជាមួយគ្នាបានរសាយទៅវិញ ។
ឆ្លើយតបសំណួរថាតើកញ្ញារិទ្ធិកា មានគម្រោងភ្ជាប់ពាក្យនិងបើកស្នេហាជាចំហដូចDj ផាន់រ៉ុង នៅពេលណានោះស្រីស្រស់ថានាងបានបែកបាក់សង្សារចាសទៅហើយ និងពេលនេះអត់ទាន់មានអ្នកថ្មីទេ ។ នាងថាចិត្តចង់ផ្ដោតលើការងារសិល្បៈជាងស្នេហា ហេតុនេះមិនអាចនិយាយថាពេលណាទើបអាចមានគូដូចគេបានឡើយ ។
ទោះជាស្រីស្រស់តូចតន់ព្រំរិទ្ធិកា ថាបេះដូងនៅទំនេរក្ដី ប៉ុន្ដែគេជឿរថានាងអាចលាក់បាំងរឿងគូស្នេហាថ្មីច្រើនជាង ព្រោះស្រស់ស្អាតដូចនាងមិនខ្វះបុរសតាមប្រម៉ាញ់បេះដូងឡើយ ហេតុនេះប្រាកដជាមិនអាចនៅទំនេរបានយូនោះទេ។ប្រភពថារិទ្ធិកា ស្នេហាតែប្រុសក្មេងរូបសង្ហារទេ បើប្រុសវ័យចំណាស់ទោះជាមានទ្រព្យប៉ុណ្ណាក៍នាងមិនបេតីដែរ ។
នែប ព្រំរិទ្ធិកា ថានៅឆ្នាំ២០២៤ នេះនាងទទួលបានការងារសិល្បៈច្រើនជាងឆ្នាំមុនៗដូចជាទើបថតបញ្ចប់រឿង”កុំស្លាប់”ឲ្យផលិតកម្មមួយ ហើយនាងបានក្លាយទៅជាBA របស់ភេសជ្ជៈសាម៉ូរ៉ៃ(Samurai )ដែលមានការកុងត្រារយៈពេល២ឆ្នាំ ខណៈដែលថ្មីៗនេះនាងក៍បានក្លាយទៅជាពិធីការនីរបស់CTN កម្មវិធី”Shadow Chef “ផងដែរ ។
តារាសម្ដែងរិទ្ធិកា បន្ថែមថា”ឆ្នាំហ្នឹងខ្ញុំបានការងារថ្មីល្អៗច្រើន។អាជីពMC គឺជាបំណងរបស់ខ្ញុំ ឥឡូវខ្ញុំសប្បាយចិត្តដែលអាចធ្វើបាន។ ខ្ញុំនឹងចាប់អាជីពសម្ដែងនិងពិធីការិនីឲ្យដើរព្រមគ្នាតែម្ដង ។តែបើអាជីពចម្រៀងខ្ញុំអាចច្រៀងបានត្រឹមជាតារាកិត្តិយសប៉ុណ្ណោះ មិនអាចធ្វើតារាអាជីពបានទេ “។
នែប ព្រំរិទ្ធិកា លេចធ្លោខ្លាំងពេលថតMV បទរបស់លោកខេមរៈ សិរីមន្ដ “ពេលអូនមានលុយ អូនផ្ទុយគ្រប់យ៉ាង “ ហើយថ្មីៗនេះនាងទើបានបានថតបទថ្មីរបស់លោកឆាយ វីរៈយុទ្ធ ផងដែរ ។នាងថានៅឆ្នាំនេះនាងចាប់ផ្ដើមទទួលថតរឿងដុំ និងរឿងភាគ ព្រោះគិតថាជាតារាសម្ដែងម្នាក់ ត្រូវតែប្រឡូកវិស័យភាពយន្ដឲ្យបានច្រើន ខណៈដែលកាលពីឆ្នាំមុនៗនាងមិនទទួលថតរឿងព្រោះតែគ្មានពេលគ្រប់គ្រាន់ ប៉ុន្ដែចាប់ពីពេលនេះតទៅនាងចង់ធ្វើការងារនេះទៅតាមសភាពជាក់ស្ដែង ។
គេចាំមើលថាអាជីពថ្មីជាMC របស់នាងនែប ព្រំរិទ្ធិកា អាចជោគជ័យដូចអាជីពសម្ដែងដែរ ឬអត់ ស្របពេលដែលនាងថាមុនចូលCtn នាងក៍ធ្លាប់ធ្វើជាពិធីការិនីតាមកម្មវិធីស្ដង់តូចៗមួយចំនួនដែរ ។ក្រៅពីនែប ព្រំរិទ្ធិកា តារាដែលវិត្តន៍ខ្លួនពីសម្ដែងទៅជាពិធីការិនីមានដូចជានាងហេង ផាន់ណា ,ហ៊ិន ច័ន្ទនីរ័ត្ន ,ណា សាឌី ,ស៊ីន យូប៊ីន ,ស៊ឹម សូលិកា ,ជីជី,និងឌួង ហ្សូរីដា ជាដើម ៕