ភ្នំពេញ៖ស្រីស្រស់ធ្មេញចំពើសនាងរ៉េត ស៊ូហ្សាណា ត្រូវបានគេមើលឃើញថានាងលេចធ្លោជាងគេនៅផលិតកម្មហង្សមាសក្នុងចំណោមតារាស្រីវ័យក្មេងៗពោលគឺតារាខ្លះជាម្ចាស់ពានផងក៍មិនអាចត្រូវប៉ាន់ដូចនាងដែរព្រោះក្នុង១ឆ្នាំៗអាចរកលុយបានជាច្រើនម៉ឺនដុល្លារពីអាជីពចម្រៀងនិងស្ពតពាណិជ្ជកម្ម ។ទោះជាយ៉ាងណាស៊ូហ្សាណា ហាក់នៅដើរផ្លូវឆ្ងាយក្នុងការឈានទៅប្រជែងតំណែងតារាស្រីលំដាប់ជូរមុខហង្សមាស បើទោះជាឱក សុគន្ធកញ្ញា ,សុគន្ធ និសា ,ពេជ្រ សោភា និងសួស វីសា ជាដើមហាក់មិនសូវមានសកម្មភាពលេចធ្លោដូចមុនក្ដី ប៉ុន្ដែថៅកែមិនទាន់ផ្ដល់ទំនុកចិត្តឲ្យហ្សាណា ឈរជាតារាស្រីGrade A របស់ផលិតកម្មធំនេះឡើយ ។ក្រៅពីនេះនាងហ្សាណា ក៍មិនទាន់ត្រូវបានម្ចាស់ផលិតកម្មធំនេះឲ្យតំណែងសំខាន់ៗតាមរយៈការឲ្យកាន់តួនាទីជាគណៈកម្មការប្រលងចម្រៀងធំៗនោះទេ បើទោះជាកន្លងមកម្ចាស់ផលិតកម្មមួយនេះធ្លាប់ឲ្យអតីតតារាខ្លួននាងសុខ ស្រីនាង ដែលមានការលេចធ្លោមធ្យមរ៉ាប់រងការងារទាំងនោះដូចរៀមច្បងក្ដី ។
គេនៅមិនទាន់ដឹងតើថាតើមានកត្តាអ្វីខ្លះនៅក្រោយខ្នងនាងស៊ូហ្សាណា ជុំវិញការមិនទាន់ឈានទៅចំណុចកំពូលនេះទេ ប៉ុន្ដែតាមអ្នកជំនាញសិល្បៈធ្លាប់ប្រាប់អ្នកយកព័តមានយើងថាហ្សាណា លេចធ្លោខ្លាំងលើរូបសម្រស់និងការច្រៀងបទជាភាសារអង់គ្លេសប៉ុណ្ណោះ តែការច្រៀងបទភាសាខ្មែរនៅមានកម្រិត ហើយនាងត្រូវការពេលវេលាច្រើនទៀត បើចង់ឈានទៅជំនួសតារាស្រីជូរមុខរបស់ហង្សមាសដែលពេលនេះពួកគេមានវ័យកាន់តែជ្រេទៅហើយនោះ។តែFan របស់ហ្សាណា ធ្លាប់លើកឡើងថាបទ”ឈប់ “ និងបទ”សង្ស័យ “អាចបញ្ជាក់ថាហ្សាណា មានសម្ថភាពគ្រប់គ្រាន់ក្នុងការត្រៀមខ្លួនទៅជំនួសតារាដែលមានប្ដីនិងកូនហើយនៅហង្សមាសដែលច្រៀងលែងទៅមុខនោះ។
រ៉េត ស៊ូហ្សាណា បានជ្រកនៅហង្សមាសជាង៨ឆ្នាំមកហើយ និងមិនធ្លាប់ប៉ះរឿងអាស្រូវស្នេហានោះទេ ព្រោះមានឪពុកម្ដាយតាមការពារជាគ្រប់វិនាទី ហើយនៅក្នុងពិភពសិល្បៈតារាដែលអាចបណ្ដើរនាងតែ២នាក់ បានដោយត្រូវឪពុកម្ដាយទុកចិត្តមានតែកូនលោកឧកញ៉ាព្រាប សុវត្ថិ គឺលោកសុវត្ថិ មុនីនាគ ម្នាក់ប៉ុណ្ណោះ រហូតដល់គេសង្ស័យថាពួកគេបង្កាត់ភ្លើងស្នេហាជាមួយគ្នាទៀតផង។ប៉ុន្ដែគួរឲ្យស្ដាយនៅឆ្នាំ២០២២ លោកជំទាវឡុង ស្រីមុំ ប្រពន្ធលោកសុវត្ថិ បានចេញមុខមកបញ្ជាក់ច្បាស់ៗថាមុនីនាគ គ្មានទំនាក់ទំនងស្នេហាស៊ីជម្រៅជាមួយហ្សាណា ឡើយ ទើបធ្វើឲ្យស្រីស្អាតមានត្រេមុខស្រដៀងកូនកាត់ជប៉ុនរូបនេះបានឃ្លាតពីមុនីនាគ បន្ដិចម្ដងៗ រហូតដល់ចុងក្រោយពួកគេលែងបណ្ដើរគ្នាទាំងស្រុងទៅហើយ ។ហ្សាណា បាត់បង់ទាំងដៃគូចម្រៀង និងអ្នកយល់ចិត្តហើយពេលនេះនាងមិនដែលបង្ហាញសកម្មភាពស្និតស្នេហ៍ជាមួយប្រុសណាទេ និងជាញឹកញាប់គេឃើញនាងចេញទៅដើរកម្សាន្ដនៅក្រៅស្រុកតែម្នាក់ឯងជាញឹកញាប់ផងដែរ ។
គួរបញ្ជាក់ថាតារា២៣ឆ្នាំ នាងរ៉េត ស៊ូហ្សាណា មានសម្រស់ត្រដែតជាងគេនៅហង្សមាស បើទោះជាមិនធ្លាប់លេចឭថានាងបានកែសម្រស់ផ្នែកណាមួយក្រៅពីពត់ធ្មេញក៍ដោយ។តែនៅឆ្នាំ២០២៤ នាងហ្សាណា មានគូប្រជែងសម្រស់ថ្មីនោះគឺនាងSk សង្សារលោកStepទើបធ្វើឲ្យភ្នំ១មានខ្លា២ ហើយ។គេចាំមើលថានៅឆ្នាំ២០២៤ នេះនាងហ្សាណា អាចនឹងមានចេញបទស្លូវបន្ថែមទៀត ដើម្បីបន្សាបរឿងគេថានាងលេងសម្រស់ជាងសម្លេងនោះដែរឬទេ ព្រោះថាបើចេញសម្រុកបទខ្មែរច្រើនជាងបទបរទេសលើទីផ្សារនោះ គេអាចមើលឃើញច្បាស់ថាតើនាងអាច ឬមិនអាចក្នុងការទៅស្នងតារាស្រីឈានមុខគេនៅហង្សមាសនាពេលបច្ចុប្បន្ននេះជាមិនខាន ៕
