ភ្នំពេញ៖ថ្មីៗនេះនៅលើបណ្ដាញសង្គមមានការលើកឡើងថាតារាចម្រៀងស្រគត់ស្រគុំសុគន្ធ និសា បានដើរចេញពីហង្សមាសស្ងាត់ៗទៅហើយ បន្ទាប់ពីអត់បទថ្មីច្រៀងរយៈពេលជាច្រើនខែ ។ការលេចឭដំណឹងថានិសា បានចាកចេញពីហង្សមាសជាលើកទី២នេះបន្ទាប់ពីកាលពីថ្ងៃទី១៦ សីហា តារាចម្រៀងលេងសម្រស់រ៉េត ស៊ូហ្សាណា បានសម្រេចចិត្តបាយ បាយ ពីហង្សមាស ទៅជ្រកនៅទ្រនុំនៅផលិតកម្មបារមីទៅហើយ ក្រោយជ្រកនៅទ្រនុំធំមួយនេះអស់រយៈពេលជាង៨ឆ្នាំ ទើបបានFan របស់និសា ខមិនថាអ្នកបន្ទាប់គឺជាសុគន្ធ និសា នេះឯង ព្រោះនិសា នៅទ្រឹង ពោលគឺស្ងាត់ជាងស៊ូហ្សាណា ទៅទៀត ។
“នគរធំ “មិនទាន់អាចទាក់ទងសុគន្ធ និសា បានទេកាលពីពេលថ្មីៗនេះព្រោះនាងបាននាំសា្វមីចេញទៅកម្សាន្ដនៅអាមេរិកតាំងពីថ្ងៃទីថ្ងៃទី៦ សីហា និងពេលនេះអត់ទាន់វិលមកខ្មែរវិញ។ប៉ុន្ដែលោកកៅ សីហា អ្នកដឹកនាំសម្ដែងនៅហង្សមាសបានទាត់ចោលចំពោះដំណឹងនេះតែម្ដងនៅពេលដែលត្រូវសួររឿងរ៉ាវនិសា ចេញពីហង្សមាសដូចស៊ូហ្សាណា នោះ។
លោកកៅ សីហា បញ្ជាក់ថា”និសា មានទៅណា ?គាត់នៅតែច្រៀងឲ្យហង្សមាសតើ តែពេលនេះអត់ឃើញគាត់ដោយសារតែគាត់ទៅអាមេរិក មិនទាន់មកវិញទេ ។ខ្ញុំដឹងថាក្រោយឃើញហ្សាណា ចេញ ចេះតែលេចឭថានិសា ចេញដែរអីចឹងហើយ នោះគ្រាន់តែជាខមិន តែការពិតគាត់នៅតែច្រៀងឲ្យហង្សមាសដដែលហ្នឹង”។
ថ្វីត្បិតតែលោកកៅ សីហា ព្យាយាមលាក់បាំងរឿងនិសា ចេញពីហង្សមាសក្ដី ប៉ុន្ដែនៅពេលដែលអ្នកយកព័តមានយើងបានសាកសួរទៅDirector ហង្សមាសផ្សេងទៀតនោះពួកគាត់បែជានិយាយក្នុងល័ក្ខខណ្ឌសុំមិនឲ្យដាក់ឈ្មោះនិងបង្ហើបថានិសា មានភាគរយខ្ពស់ចេញពីហង្សមាសដូចការលេចឭមែន ។ប្រភពបានឲ្យដឹងបើនិសា ចេញមែននោះរឿងសំខាន់មានតែម្យាងគត់គឺនាងលែងមានបទល្បីៗចេញនោះតែម្ដង ដែលបញ្ហានេះធ្វើឲ្យនិសា ពិបាកប្រឈម ព្រោះថាជាអ្នកចម្រៀងអាជីពប្រសិនបើលែងមានបទល្បីៗច្រៀងគឺប្រឈមហានិភ័យជាមិនខាន មិនអាចទប់មិនឲ្យធ្លាក់ចុះ ឬរក្សារតំណែងតារាស្រីលំដាប់ជូរមុខរបស់ហង្សមាសបានតទៅទៀតទេ ។សម្រាប់និសា នាងក៍ធ្លាប់បង្ហាញការព្រួយបារម្ភចំពោះការខ្សត់ចម្រៀងចេញនេះដែរ បើទោះជានាងបានតាំងចិត្តផ្អាកពីការថតភាពយន្ដទាំងស្រុង ហើយវិលមកពង្រឹងទីផ្សារចម្រៀងឡើងវិញក្ដី តែផែនការណ៍នេះជាប់គាំង ព្រោះថាបច្ចុប្បន្នតារាហង្សមាសជាន់ជើងគ្នាហេតុនេះហើយបើតារាចម្រៀងផ្ទាល់មិនធ្វើបទខ្លួនឯងទេ គឺមានតែចាំវិលជុំយូៗទើបធ្លាក់បទថ្មីដល់ដៃម្ដង។
សុគន្ធ និសា បានចូលហង្សមាសជាលើកទី១កាលពីឆ្នាំ២០០៧ និងចាកចេញទៅថោន៣ឆ្នាំ(២០១២-២០១៥) ហើយវិលមកចូលហង្សមាសជាលើកទី២នៅឆ្នាំ២០១៦ ពោលគឺជ្រកនៅហង្សមាសចុងក្រោយជាង៨ឆ្នាំនេះនាងសាងស្នាដៃក្នុងភាពយន្ដជាតួឯក៤រឿងគឺ”សិសិរដូវក្នុងបេះដូង “,”រាជនីយភូមិគ្រឹះ” ,”ព្រះវេស្សន្ដជាតក” និងរឿង”ចំណតថ្មី នៃសុភមង្គល” ហើយនាងក៍ត្រូវថៅកែហង្សមាសឲ្យកាន់តួនាទីធំជាគ្រូបង្វឹកThe Voice Kids Cambodia រដូវកាលទី១ និងទី៣ រួមទាំងការធ្វើជាគណៈកម្មការCambodian Idol Junior រដូវកាលទី២ផងដែរ ប៉ុន្ដែគ្មានដំណឹងនាងវិលមកថតកុនម្ដងទៀតទេ ។
លោកកៅ សីហា បន្ថែមថាមូលហេតុដែលនិសា អត់ដែលឃើញថតរឿងថ្មីៗទៀត ព្រោះតែការថតភាពយន្ដត្រូវការពេលវេលារឿងមួយថតចប់ប្រើពេលពីចន្លោះ៣ទៅ៦ខែ ហេតុនេះនិសា រវល់មិនទាន់អាចថតបានទេ ។តែលោកថា និសា នៅតែមានសម្ថភាពគ្រប់គ្រាន់ក្នុងការធ្វើតួឯក។
សុគន្ធ និសា បានរៀបការស្វាមីអាណិកជនខ្មែរមកពីរដ្ឋBoston សហរដ្ឋអាមេរិកលោកចៅ សម្បត្តិ ជិត៧ឆ្នាំហើយ តែមិនទាន់មានកូន១គ្រាប់ទេ បើទោះជានាងរៀបគម្រោងយកកូនតាំងពីឆ្នាំ២០២១ ក្ដី ។ប្រភពបានឲ្យដឹងថាការដែលនិសា នាំប្ដីទៅអាមេរិកលើកនេះគឺដើម្បីរៀបចំឯកសារបំពេញយកGreen Card ដើម្បីងាយស្រួលចេញចូលពីខ្មែរទៅអាមេរិក ខណៈដែលFan វិញបានជូនពរនាងឲ្យឆាប់បានកូនងាបីប្រលែងដូចគេដូចបំណង។
គេចាំមើលថាតើថៅកែហង្សមាសអាចនឹងរកវិធីទប់ស្កាត់សុគន្ធ និសា មិនឲ្យដើរចេញពីហង្សមាសម្ដងទៀតបានដែរឬទេ ព្រោះតាមព័តមានថានឹងមានតារាល្បីៗជាច្រើនទៀតបន្ដចេញពីផលិតកម្មមួយនេះនាពេលខាងមុខ គ្រាន់តែពួកគេមិនប្រកាសឲ្យដឹងមុនប៉ុណ្ណោះ៕
