ភ្នំពេញ៖ខេមរៈ សិរីមន្ដ ផ្អាកទៅច្រៀងសម្ដែងនៅប៉ែកអ៊ឺរ៉ុបតាំងពីឡើងជាឧកញ៉ាកាលពីដើមឆ្នាំ២០២២ គឺចេញទៅតែនៅប៉ែកអាស៊ីដូចជាថៃ និងកូរ៉េ ប៉ុណ្ណោះ ព្រោះថាទោះជាមិនចាំបាច់ឡើងឆាកក៍លុយចាយមិនចេះអស់ឡើយ ដោយថ្មីៗនេះស្ងាត់ទើបតែទិញរថយន្ដម៉ាកLamborghini តម្លៃរាប់សែនដុល្លារទៀតផង។ប៉ុន្ដែនៅចុងខែ៩ ឆ្នាំ២០២៤ នេះសិរីមន្ដ នឹង ទៅច្រៀងសម្ដែងក្នុងព្រឹត្តិការណ៍ពិព័ណ Cambodia Today ផលិតផលខ្មែរនៅUnion Square នៅរដ្ឋSan Francisco ,Ca ។គេនៅមិនទាន់ដឹងថាសិរីមន្ដ អាចជួបរឿងដូចព្រាប សុវត្ថិ ដែលចេញទៅច្រៀងសម្ដែងនៅអូស្រា្ដលី ត្រូវពលរដ្ឋខ្មែរនៅទីនោះព្រមានធ្វើពហិការ កាលពីចុងខែ១០ ឆ្នាំ២០២២ ដែរ ឬអត់នោះទេ ខណៈដែលនៅក្នុងស្រុកវិញ រាល់ពេលដែលសិរីមន្ដ ចេញគាំទ្រសារមន្រ្ដីធំៗ និងថៅកែរបស់ខ្លួននោះការរិះគន់លើលោកស្រោចតែម្ដងដែលខ្លះថែមទាំងហៅលោកថាជាតារាពូកែអែបអប គួសខ្វែងលើរូបថតលោក និងមួយចំនួនទៀតប្រកាសថាលែងស្ដាប់ចម្រៀងលោកដូចគ្នាទៅនិងអ្នកគាំទ្រព្រាប សុវត្ថិ ដែលខកចិត្តលើIdol របស់ខ្លួនធ្វើអ្វីមួយដែលពួកគេមិនពេញចិត្តដែរ ។តែសិរីមន្ដ មិនដែលក្វាយក្វល់លើការខមិនរិះគន់ចំៗនៅលើផេករបស់លោកនោះទេ គឺលោកប៊ុនថៃ មានតែបង្ហាញភាពហ៊ឺហាជិះរថយន្ដទំនើបៗដូចជាពេលនេះពេលទៅណាម្ដងៗលោកថៃ ជិះរថយន្ដទំនើបម៉ាក Lamborghini និងRoll Royce អមដោយរថយន្ដបើកពីក្រោយជាក្បួនមានដូចជា Volkswagen ,Range Rover Defender និងJeep Rubicon ជាដើម ។
គួរបញ្ជាក់ថាខេមរៈ សិរីមន្ដ ធ្លាប់ទទួលបានការគាំទ្រខ្លាំងនៅអាមេរិក អំឡុងពេលលោកច្រៀងនៅសាន់ដេមុនឆ្នាំ២០១៧ ហើយក្រោយជ្រកនៅហង្សមាស៥ឆ្នាំ និងពេលនេះទើនៅGalaxy សិរីមន្ដ ធ្លាប់និយាយថាច្រៀងត្រឹម៦បទបានតម្លៃខ្លួនដល់ទៅ១ម៉ឺនដុល្លារ ។បញ្ហានេះហើយធ្វើឲ្យលោកថៃ កម្រនិងចេញមុខច្រៀងតាមបណ្ដារកម្មវិធីជប់លៀងមង្គលការដូចមុនៗ ព្រោះតែម្ចាស់កម្មវិធីសាញថាថ្លៃពេក ឬជួលសិរីមន្ដ ម្នាក់ស្មើតារាល្បីល្មមៗដល់ទៅ១០នាក់ឯណ្ណោះ ខណៈដែលអ្នករៀបចំConcerts តាមទូរទស្សន៍លែងមានលទ្ធភាពជួលតារាកូន៣រូបនេះច្រៀងតែម្ដង លើកលែងតែខាងSponsor តម្រូវ ។
ខេមរៈ សិរីមន្ដ ទើបជ្រកនៅGalaxy បានជាង១ឆ្នាំ ប៉ុណ្ណោះ តែលោកថៃ កំពុងធ្វើឲ្យតារាប្រុសទាំងឡាយនៅផលិតកម្មនេះពិបាកទប់ទល់ ព្រោះតែសិរីមន្ដ អុកឡុកទីផ្សារចម្រៀងជាងគេដោយសារតែមានបងប្រុសខ្លួនជាអ្នកនិពន្ធបទចម្រៀងឲ្យច្រៀងតែម្ដង ។តែបទចម្រៀងរបស់សិរីមន្ដ មិនសូវមានសន្ទុះខ្លាំងដូចមុនឡើយ ដែលបញ្ហានេះអាចមកពីលោកចេញមុខការពារថៅកែ និងមន្រ្ដីធំមួយចំនួនជាបន្ដបន្ទាប់ទើបមានបញ្ហាចម្រូងចម្រាសជាមួយFan បែបនេះ ។
មជ្ឈដ្ឋានមហាជនបានលើកឡើងថាប្រសិនបើខេមរៈ សិរីមន្ដ នៅតែបុកទីផ្សារចម្រៀងរបស់ខ្លួននៅGalaxy បែបនេះទៀតនោះនឹងធ្វើឲ្យពិបាកបែងចែករវាងលោកនិងព្រាប សុវត្ថិ ថា១ណាជាតួឯកនៅផលិតកម្មថ្មីនេះម្ដងទៀតជាមិនខាន ដូចអំឡុងពេលដែលតារាទាំងពីរជ្រកនៅហង្សមាសបុកគ្នា៣ឆ្នាំ (២០១៧-២០២០)ភ្នំ១ខ្លា២ នាំឲ្យមានរឿងធំ ។ប៉ុន្ដែអតីតតារាចម្រៀងហង្សមាសលោកនូ ស៊ឹប បានអះអាងថារវាងខេមរៈ សិរីមន្ដ និងព្រាប សុវត្ថិ ពួកគេអាចច្រៀងនៅផលិតកម្មរួមគ្នា បានឬមិនបាន គឺសំខាន់នៅលើអ្នកគ្រប់គ្រងផលិតកម្ម។
គេកត់សម្គាល់ថាខេមរៈ សិរីមន្ដ អាយុ៣៩ឆ្នាំ ប្អូនព្រាប សុវត្ថិ ១០ឆ្នាំ មិនទាន់ប្រកាសពីទ្រព្យសម្បត្តិដូចលោកសុវត្ថិ កាលពីខែកញ្ញា ឆ្នាំ២០២០ ដែលត្រូវមនុស្សជំនិតលោកទម្លាយថាលោកស្នាយ សល់ទ្រព្យខ្ទង់៣០លានដុល្លារនោះទេ តែតាមប្រភពថាលោកថៃ ក៍មានលុយចូលលានដុល្លារដែរ ព្រោះគ្រាន់តែលេងម៉ូដឡានទំនើបៗមួយប្រាវចុងក្រោយនេះក៍ចំណាយលុយដល់ទៅរាប់សែនដុល្លារដែរ ។យ៉ាងណាគេចាំមើលថាអតីតតារាU2 ដែលធ្លាប់ច្រៀងនៅក្លិប១យប់បានតែ៣ដុល្លារ ឬ១ខែ៩០ដុល្លារនោះពេលណាទើបហ៊ានដឹកដៃភរិយាអ្នកនាងគួយ ផល្លី រៀបការជាចំហទៅ ព្រោះការអះអាងរបស់លោកថៃ ថាបានរៀបការតាំងពីឆ្នាំ២០០៩ នោះFan ខ្លះអត់ទាន់ជឿរជាក់ទាំងស្រុងឡើយ ៕
