ភ្នំពេញ៖ខណៈដែលតារាហង្សមាសបានដើរចេញពីផលិតកម្មជាបន្ដបន្ទាប់នោះលោកឆន សុវណ្ណារាជ បែជានៅតែបង្ហាញភាពរីករាយជាមួយទ្រនុំនេះដដែលក្រោយជ្រកបាន១៧ឆ្នាំ(២០០៧-២០២៤) ។ប៉ុន្ដែលោកសុវណ្ណារាជ មិនសូវលេចធ្លោដូចអំឡុងឆ្នាំ២០០៧ ឡើយ បើទោះជាហង្សមាសលែងមានលោកព្រាប សុវត្ថិ និងខេមរៈ សិរីមន្ដ ជាគូប្រជែងធំក្ដី គឺពេលនេះបុរសរោមទ្រូងច្រើន ល្បីតែបទចាស់ៗជាងបទថ្មីៗ ហើយចុងក្រោយនេះលោកបានងាកទៅរកដៃគូចាស់របស់ខ្លួនវិញនោះគឺពេជ្រ សោភា បន្ទាប់ពីលែងហ៊ានស្និតស្នាលជាមួយឱក សុគន្ធកញ្ញា ដូចមុនទៀតហើយក្រោយពីកញ្ញា មានស្វាមីដែលមេរបស់លោករាជ ជាង៥ឆ្នាំមកនេះ ។
តាមប្រភពថាបើលោកឆន សុវណ្ណារាជ ចូលGalaxy នោះលោកក៍នឹងឡើងងារជាឧកញ៉ាដូចព្រាប សុវត្ថិ និងខេមរៈ សិរីមន្ដ ដែរ តែលោករាជ មិនរត់ចោលថៅកែហង្សមាសឡើយ ព្រោះទោះជាពេលនេះទោះជាលោកលែងសូវល្បីដូចមុនមែន ប៉ុន្ដែការរក្សារទុកលោកឲ្យកាន់តំណែងជាគូ្របង្វឹកThe Voice Cambodia ,Cambodian Idol និងBeat The Best ធ្វើឲ្យតារារូបនេះនៅតែមានទីផ្សារចម្រៀង ដែលភាគច្រើនចេញមុខតាមការប្រគុំតន្រ្ដីរបស់ហង្សមាស ។ប៉ុន្ដែបើលោកព្រមទៅជ្រកជាមួយព្រាប សុវត្ថិ និង ខេមរៈ សិរីមន្ដ នោះលោករាជ នឹងត្រូវគេហៅថាជា”ឧកញ៉ាឆន សុវណ្ណារា “ជាមិនខាន តែអាជីពចម្រៀងនឹងអាចប្រឈមភាពស្ងប់ស្ងាត់ជាងនេះទៅទៀត ព្រោះពិបាកទប់ទល់គូប្រជែងខ្លាំង។
ឆន សុវណ្ណារាជ អាយុ៣៩ឆ្នាំ ពោលគឺស្មើគ្នាជាមួយខេមរៈ សិរីមន្ដ ដែលមានកូន៣ តែលោករាជ គ្មានដំណឹងការប្រពន្ធនោះទេ ហើយក្រោយលោកធ្លាប់ចាប់ថើបនាងហេង ចន្ថា និងយកដៃប៉ះគូថនាងសុភ័ក្រ កុសុម៉ា កាលពីចុងឆ្នាំ២០២២ នោះលោកសុវណ្ណារាជ ដែលធ្វើឲ្យតារាស្រីល្បីៗលែងសូវទុកចិត្ត១ប្រាវនោះស្រាប់តែពេលនេះតារាស្រីៗភាគច្រើនបានងាកមកស្និតស្នាលជាមួយលោករាជ ធម្មតាវិញហើយដោយគ្មានបារម្ភខ្លាចលោកយកចំណេញលើស្រ្ដីភេទនោះទេ ដូចជាមាស សុខសោភា និងពេជ្រ សោភា ជាដើម ដែលទុកចិត្តលោកជាងគេ ។តែរឿងស្នេហាលោកជាមួយនិស្សិតស្រីនៅអាមេរិកកញ្ញាអរិយ៉ា បែជាស្ងាត់ជាង១០ឆ្នាំ គ្មានដំណឹងរៀបការឡើយ ទើបមានដំណឹងថាលោករាជ មានប្រុសៗតាមស្នេហាច្រើនជាងស្រ្ដីភេទ ។Fan ចង់ឲ្យលោករាជ ក្លាហានព្រមបង្ហាញគូស្នេហាពិតដោយបើកចំហ ដើម្បីលាងជម្រះពាក្យចចាមអារ៉ាមទាំងឡាយ ព្រោះបើនៅតែពន្យាពេលយកប្រពន្ធនិងលាក់គូស្នេហ៍បែបនេះទៀត នោះលោករាជ ច្បាស់ជាកាន់តែពិបាកប្រឈមរឿងគេចោទថាលោកគ្មានអារម្មណ៍ជាមួយស្រី្ដភេទនោះជាមិនខាន ។
គួរបញ្ជាក់ថាឆន សុវណ្ណារាជ ជាតារាមានដៃគូច្រើនជាងគេនៅហង្សមាសពោលគឺលោកអាចចាប់ដៃជាមួយឱក សុគន្ធកញ្ញា ,ពេជ្រ សោភា និងសុគន្ធ និសា ក៍បានដែរ ហើយអតីតតារាU2 រូបនេះក៍ត្រូវថៅកែលើកឲ្យធ្វើជាតួឯកក្នុងភាពយន្ដជាបន្ដបន្ទាប់ផងដែរ ។ប៉ុន្ដែFan ចង់ឃើញលោករាជ មានបទចម្រៀងបទថ្មីៗល្បីឡើងវិញ ទើបអាចរក្សារតំណែងបាន បើនៅតែទ្រឹងបែបនេះទៀត ច្បាស់ជា”រលកក្រោយ ច្រានរលកមុន “ជាមិនខាន ។ដោយឡែកមហាជនវិញឆ្ងល់ថាលោកសុវណ្ណារាជ ដែលច្រៀងដោយអត់ព្រាប សុវត្ថិ រួមទ្រនុំ៤ឆ្នាំចុងក្រោយនេះ ហេតុអីលោកនៅតែមិនអាចធ្វើជាតួឯកបាន ?
អតីតតារាចម្រៀងហង្សមាសលោកនូ ស៊ឹប បានប្រាប់”នគរធំ”តាមទូរស័ព្ទថាបច្ចេកទេសច្រៀងរបស់ឆន សុវណ្ណារាជ មិនអាចប្រៀបធៀបជាមួយព្រាប សុវត្ថិ បានទេ ហេតុនេះហើយទោះជាសុវត្ថិ ចេញពីហង្សមាសក៍សុវណ្ណារាជ នៅតែមិនសូវលេចធ្លោ ព្រោះតែសម្ថភាពមិនដូចគ្នា ។លោកថាបច្ចុប្បន្នក្រោយហង្សមាសអត់ពីព្រាប សុវត្ថិ ទៅតារាចម្រៀងប្រុសដែលច្រៀងត្រូវតាមបច្ចេកទេសល្អ ហើយរូបសម្បត្តិក៍សមរម្យនោះគឺនី រតនា តែរឿងល្បីឬមិនល្បីសំខាន់នៅលើផលិតកម្មលើកបានល្បីកើត។
ឆន សុវណ្ណារាជ អាយុប្អូនព្រាប សុវត្ថិ ១០ឆ្នាំ ហេតុនេះលោកនៅមានពេលវេលាច្រើនទៀត ដើម្បីបង្ហាញពីភាពលេចធ្លោជាថ្មីនៅផលិតកម្មនេះ ។លោកនូ ស៊ឹប បន្ថែមថាឆន សុវណ្ណារាជ ធ្វើឲ្យគេស្គាល់ថាជាតារាហង្សមាសបាន ប៉ុន្ដែបើប្រជែងតំណែងឬជំនួសតារាកំពូលដូចព្រាប សុវត្ថិ នៅមិនទាន់អាចធ្វើបានទេ ព្រោះសុវត្ថិ ជាតារាមានសម្ថភាពខ្លាំងជាងគេ ទោះជាពេលនេះប្ដូរផលិតកម្មទៅលែងសូវមានបទល្បីៗដូចមុនក៍ដោយ ៕
