ភ្នំពេញ៖តារាចម្រៀងលោកសុខ មេសា ហៅនាយចឺម បានឲ្យដឹងថាលោកកំពុងតែបង្កាត់បង្រៀនប្អូនជីដូនមួយកញ្ញាង៉ា ស្រីណាន ហៅណានណាន ដែលជាកូនស្រីរបស់អ្នកនាងស្រីអ៊ីត ឲ្យធ្វើជាតារាចម្រៀងអាជីពនាពេលខាងមុខនេះហើយ ។លោកថាណានណាន មានសម្ថភាពអាចធ្វើជាតារាចម្រៀងបាន ព្រោះសម្លេងថ្មី សម្លេងខុសគេ។
នាយចឺម ថ្លែងថា«ណានណាន ខ្ញុំជាគ្រូគាត់ បង្វឹកគាត់ឲ្យចេះច្រៀង និងណែនាំគាត់ថាកុំថតតែVlog ច្រើនពេករៀនច្រៀងខ្លះទៅ ។ខ្ញុំចង់ឲ្យគាត់ធ្វើជាតារាចម្រៀងដូចខ្ញុំដែរ ហើយនាពេលខាងមុខនេះខ្ញុំនឹងឲ្យគាត់ចេញច្រៀងដែរហើយ គ្រាន់តែថាពេលនេះមិនទាន់ដល់ពេលប៉ុណ្ណោះ »។
ឆ្លើយតបសំណួរថាតើនាយចឺម អាចអន្ដរាគមន៍យកនាងណានណាន ចូលសាន់ដេច្រៀងជាមួយនាយដែរ ឬយ៉ាងណានោះលោកមេសា ថាបើពេលនេះលោកយកប្អូនជីដូនមួយចូលសាន់ដេ គឺប្រាកដជាបាន ប៉ុន្ដែលោកមិនទាន់ចង់ឲ្យនាងចេញមុខនាពេលនេះទេ ព្រោះអត់ទាន់ដល់ពេលត្រូវឲ្យគាត់ចេញ។តែនាយថាកន្លងមកក៍ធ្លាប់ហៅណានណាន ឲ្យថតMVបទចម្រៀងរបស់លោកបាន២ទៅ៣បទហើយដែរ និងមើលឃើញថានាងមានសម្ថភាពអាចធ្វើជាតារាចម្រៀងអាជីពម្នាក់បាននាពេលអនាគត។
នាយចឺម ថានាយក៍មានផែនការណ៍ឲ្យណានណាន ចាប់ដៃជាមួយនាយ នៅពេលដែលនាងដល់ពេលវេលាច្រៀង ដើម្បីឲ្យគេឆាប់ចាប់អារម្មណ៍ ប៉ុន្ដែនាយថាសព្វថ្ងៃណានណាន ស្ថិតនៅក្នុងតំណាក់កាលនាយត្រូវបង្វឹកពីបច្ចេកទេសច្រៀងនៅឡើយ ។
សូមបញ្ជាក់ថានាយចឺម ធ្លាប់ជួយជ្រោមជ្រែងតារាសម្ដែងស្រីស្អាតជាច្រើននាក់មកហើយឲ្យល្បីឈ្មោះដោយថតMV របស់ខ្លួនរហូតមានពេលខ្លះស្រីស្រស់ទាំងនោះជាប់អន្ទាក់ស្នេហ៍នាយទៀតផងក្នុងនោះមានដូចជានាងហ្វា ហ្វា ហៅស្រីយី និងសេង សុខឃីម ជាដើម។ប៉ុន្ដែពេលនាយចឺម កំពុងតែផ្អែមល្ហែមស្នេហ៍ក៍ត្រូវបញ្ចប់ស្នេហាកណ្ដាលទីហើយត្រឹមវ័យ២៩ឆ្នាំនាយរបូតសង្សារអស់៤នាក់ទៅហើយគឺនាងអៀ ម៉េងលិ ហៅអូនម៉ី ,ពុធ ស្រីខួច ,ហ្វាហ្វា ហៅស្រីយី និងនាងសេងសុឃីម នោះទើបធ្វើឲ្យនាយចង់បាក់ស្បាតលែងចង់គិតរឿងលើកស្ទួយស្រីស្អាតទៀត ដោយងាកមកឡង់សេប្អូនជីដូនមួយវិញម្ដង។
នាយចឺម បន្ថែមថាពេលនេះនាយមិនទាន់មានសង្សារថ្មីទេ តែបើចង់រកក៍មិនពិបាកដែរ គ្រាន់តែនាយចង់នៅម្នាក់ឯងសិន ។នាយថា ដោយសារតែបែកបាក់ច្រើនដងនេះហើយទើបអ្នកខ្លះហៅនាយថា«ព្រាននារី » ទៀតផង តែនាយមិនក្វល់ឡើយចង់អ្នកណាថាម៉េចក៍តាមចិត្តទៅចុះ ។
ក្រៅពីអះអាងថាគ្មានសង្សារថ្មីនាយចឺម ក៍បានឲ្យដឹងថានៅចុងឆ្នាំ២០២៤ នេះនាយបានសម្រេចចិត្តមិនចេញទៅច្រៀងសម្ដែងនៅបរទេសទេបើទោះជាមានគេទាក់ទងមកឲ្យទៅច្រៀងនៅខែធ្លាក់ភ្លៀងនេះក្ដី។នាយថាការទៅបរទេសអ្វីដែលនាយធុញគឺជិះយន្ដហោះរាប់ម៉ោងហើយដូចដឹងថាហើយថាជើងអត់ជាប់ដីហេតុនេះនាយចេះតែបារម្ភពេលជួបព្យុះ បើ ទោះជានាយគ្មានបញ្ហាសុខភាពក្ដី។នាយថាសុខចិត្តរកលុយតិតក់ៗនៅក្នុងស្រុកសិនអត់ទាន់ចង់ទៅរកលុយនៅបរទេសឆាប់ៗទេបន្ទាប់ពីនាយធ្លាប់បានចេញទៅច្រៀងសម្ដែងនៅអាមេរិករយៈពេល១ខែកាលពីឆ្នាំ២០២០។
គេចាំមើលថាតើនាយចឺម អាចជួយប្អូនជីដូនមួយនាងណានណាន ដែលជាតារាកំប្លែងនិងបង្ហាញម៉ូតឲ្យល្បីដូចអតីតសង្សារដែរឬទេ?
