ភ្នំពេញ៖តារាចម្រៀងលោកប៉ុន សុណារិន ហោខេម បានចេញមុខសរសើរភរិយាលោកអ្នកនាងស្រីកា ថាជានារីម្នាក់ដែលធ្វើឲ្យលោកកក់ក្ដៅខ្លាំងណាស់ តាំងពីចាប់ដៃគ្នាជាង១០ឆ្នាំមក តែលោកមិនអាចកំណត់ថានឹងត្រូវរៀបការនៅពេលណាឡើយ ។
លោកខេម ថ្លែងថា«គាត់(ស្រីកា)ទៅរស់នៅបារាំងតាំងពីតូច តែចិត្តគាត់នៅតែដក់ជាប់នូវការស្រលាញ់អរិយ ធ័មវប្បធ័មរបស់ខ្មែរជានិច្ច ។ខ្ញុំធ្លាប់សួរគាត់ថាអូនឯងស្រលាញ់បង មករស់នៅខ្មែរជាមួយបងបានអត់?គាត់ថាមានអីស្រុកខ្មែរក៍ជាស្រុករបស់គាត់ដែរតើ។ទោះជាគាត់រស់នៅប្រទេសស៊ីវីល័យមែន តែគាត់ស្រលាញ់ស្រុកខ្មែរណាស់ នេះហើយដែលធ្វើឲ្យខ្ញុំកក់ក្ដៅមែនទែន តាំងពីខ្ញុំនិងគាត់ ចាប់ដៃគ្នាជាង១០ឆ្នាំមកនេះ ។ប៉ុន្ដែទាក់ ទងរឿងថាខ្ញុំនិងគាត់រៀបការនាពេលណា អាហ្នឹងខ្ញុំមិនអាចប្រាប់ថ្ងៃខែឆ្នាំបានទេ តែពេលដល់ពិធីនោះកើតឡើង ខ្ញុំនិងអញ្ជើញអ្នកកាសែតឲ្យចូលរួមផងដែរ»។
ថ្វីត្បិតតែលោកខេម ព្យាយាមលាក់ថ្ងៃមង្គលការរបស់ខ្លួនមែន តែលោកបង្ហើបថាអាចនឹងធ្វើឡើងក្នុងពេលឆាប់ៗខាងមុខនេះហើយ ព្រោះលោកក៍មិនខ្លាចថារៀបការទៅប៉ះពាល់ដល់អាជីពសិល្បៈខ្លួនដែរ។លោកថាបច្ចុប្បន្នភរិយាកំពុងរស់នៅស្រុកខ្មែរជាមួយលោក ហើយជាទម្លាប់ក្នុង១ឆ្នាំលោកត្រូវនាំភរិយាទៅដើរកម្សាន្ដនៅបរទេសម្ដង ដើម្បីលំហែអារម្មណ៍ពីការងារ ប៉ុន្ដែមិនមែនទៅតែបរទេសនោះទេ ក្នុងស្រុកក៍លោកតែងតែនាំអ្នកនាងស្រីកា ដើរលេងតាមបំបន់រម្យនីយ៍ដ្ឋានជាញឹកញាប់ផងដែរ ។
ទាក់ទងគម្រោងចេញទៅច្រៀងសម្ដែងនៅបរទេសនារដូវធ្លាក់ភ្លៀងនេះវិញលោកខេម ថាដោយសារតែចាប់ពីខែ១០ ទៅលោកចាប់ផ្ដើមរវល់ចេញច្រៀងសម្ដែងក្នុងស្រុកឡើងវិញ ហេតុនេះលោកមិនមានផែនការណ៍ទៅ ច្រៀងនៅស្រុកគេនៅចុងឆ្នាំ២០២៤ នេះទេ ។លោកបន្ថែមថាសូម្បីតែនៅរដូវភ្ជុំបិណ្ឌនេះប៉ុន្មានថ្ងៃមុនលោកក៍ទើបតែចប់ការចេញច្រៀងសម្ដែងកម្មវិធីមួយចំនួនជាហូរហែផងដែរ។
គួរបញ្ជាក់ថាខេម បានភ្ជាប់ស្នេហាជាមួយនារីអាណិកជនខ្មែរមកពីបារាំងអ្នកនាងស្រី កា កាលពីឆ្នាំ២០១៥ ហើយពួកគេបានទិញផ្ទះវីឡាររស់នៅខ្មែរជាមួយគ្នា និងជិះរថយន្ដ ទំនើបម៉ាកRange Rover ទិញបានមានដីធ្លីមួយចំនួនទៀតផងដែរ ។ប្រភពបានឲ្យដឹងថាដោយសារតែលោកខេម កាន់គ្រីស្ទាន តាំងពីតូចហើយភរិយាលោករស់នៅប្រទេសអ៊ឺរ៉ុប ហេតុនេះមង្គលការរបស់ពួកគេនាពេលខាងមុខបើកើតឡើងមែនគឺនឹងធ្វើទៅតាមប្រពៃណីខ្មែរលាយគ្រីស្ទានជាមិនខាន។ប៉ុន្ដែពេលនេះខេម បានត្រឹមចេញមុខសរសើរពីគុណសម្បត្តិប្រពន្ធ តែលោកនៅតែមិនហ៊ានកំណត់ថ្ងៃមង្គលការរបស់ខ្លួនឲ្យជាក់លាក់ដដែល ។
មជ្ឈដ្ឋានមហាជនសង្កេតឃើញថាអាជីពចម្រៀងរបស់ខេម នារយៈពេល៤ឆ្នាំចុងក្រោយនេះគឺហាក់នៅទ្រឹង ព្រោះការមកដល់របស់ព្រាប សុវត្ថិ និងខេមរៈ សិរីមន្ដ ធ្វើឲ្យលោកសុណារិន ពិបាករក្សារតំណែងតារាប្រុសឈានមុខគេនៅGalaxy តទៅទៀត បើទោះជាលោកនៅតែស្ថិតក្នុងចំណោមតារាដែលថៅកែឡង់សេក្ដី ។ចំណែកប្រភពខ្លះថាខេម ជាប្រធានក្រុមបាល់ទាត់ តារាកម្ពុជា រូបនេះនឹងឡើងជាឧកញ៉ានាពេលខាងមុខជាមិនខាន ពោលគឺដូចគ្នាទៅនិងព្រាប សុវត្ថិ និងខេមរៈ សិរីមន្ដ ដែរ ដែលពេលនោះគេគ្រប់គ្នានឹងហៅលោកថា«ឧកញ៉ាខេម » ៕
