ភ្នំពេញ៖ហាត់របាំបុរាណរយៈពេល១៥ឆ្នាំ នាដការីរូបស្រស់កញ្ញាដួង សុខជា ត្រូវបានចាងហ្វាងផលិតកម្មសាស្រ្ដាហ្វ្រីម យកប្រវត្តិរបស់នាងផលិតជាខ្សែភាពយន្ដឡើង ដែលសម្ពោធកាលពីថ្ងៃទី២០ ខែតុលា បូកជាមួយតួអង្គថ្លុក២រូបទៀតធ្វើឲ្យ«ភាពយន្ដជីវិត» នោះឆ្លុះបញ្ចាំងជីវិតពិតរបស់អ្នកសិល្បៈ៣រូបបញ្ចូលគ្នា ហើយដាក់បញ្ចាំងនៅប៉ុស្ដិ៍បាយ័ន ដែលនៅថ្ងៃពិសេសនោះ គេឃើញលោកជេមស៍ អ្នកតំណាងប៉ុស្ដិ៍បាយ័ន និងលោកស្រីប៊ុន ចាន់និមល ចាងហ្វាងផលិតកម្មសាស្រា្ដហ្វ្រីម រីករាយជាខ្លាំងក្រោយភាគីទាំងពីរផ្អាកផលិត«ភាពយន្ដជីវិត » រយៈពេល១ឆ្នាំ បន្ទាប់ពីបានចាប់ដៃគ្នាផលិតប្រភេទ«ភាពយន្តជីវិត » ៥ឆ្នាំផលិតបានភាពយន្ដល្បីៗដល់ទៅជាង៣០០ ចំណងជើង។
នាដការីដួង សុខជា បានប្រាប់ថានាងហាត់របាំបុរាណតាំងពីមានអាយុ៧ឆ្នាំ ពោលគឺពេលនេះហ្វឹកហាត់រយៈពេល១៥ឆ្នាំមកហើយ និងបច្ចុប្បន្នជានិស្សិតឆ្នាំទី២ នៅសាកលវិទ្យាល័យភូមិន្ទវិចិត្រសិល្បៈ ហើយរៀន២ឆ្នាំទៀតទើបបញ្ចប់។សុខជា ថាមូលហេតុដែលសាស្រា្ដហ្វ្រីម យកប្រវត្តិនាងទៅថតរឿងព្រោះតែនាងមានការតស៊ូខ្លាំងណាស់ទើបអាចឈានដល់តំណាក់កាលមួយនេះ។នាងរៀបរាប់ថាជារៀងរាល់ព្រឹកត្រូវក្រោកពីព្រឹកម៉ោង៤-៥ ព្រឹកដើម្បីជួយធ្វើការឪពុកម្ដាយ ទើបទៅរៀន ខណៈដែលឪពុកនាងជាអ្នករត់ម៉ូឌុប ហើយម្ដាយនាងលក់ទឹកអំពៅ ។នាដការីបន្ថែមថានាងមានស្រុកកំណើតនៅខេត្តតាកែវ ហើយមានបងប្អូន៦នាក់(ស្រី៣)ក្នុងនោះនាងជាកូនពៅ និងមានតែនាងម្នាក់ទេដែលចូលសិល្បៈ ព្រោះលោកយាយរបស់នាងជម្រុញតាំងពីនាងនៅតូចម្លេះ បើទោះជាសាច់ញាត្តិនាងមួយចំនួនមិនពេញចិត្ត ព្រោះគេគិតថានាងរៀនផ្នែករបាំបុរណបែបនេះចាយពេលច្រើនពេក អត់ពេលសម្រាកដូចអ្នករៀនផ្នែកផ្សេង ហើយអាចធ្វើឲ្យម្ដាយនាងមានវិបត្តិក្ដី ប៉ុន្ដែនាងមិនរាថយឡើយ ពោលគឺជិះកង់ទៅរៀនរយៈពេល៣០ទៅ៤០នាទីទើបដល់ ស្របពេលដែលកូនគេជីវភាពធូធាជិះម៉ូតូ…។
ឆ្លើយតបសំណួរថាតើ«ភាពយន្ដជីវិត » ឈុតត្រង់ណាដែលនាងគិតថាពិបាកបំផុតនោះសុខជា ថាគឺនៅពេល«យំ » នាងថាពេលនឹកដល់សាច់ញាត្តិគេមើលងាយ ឃើញនាងហាត់របាំនោះគឺពិបាកទប់អារម្មណ៍។យ៉ាងណានាងថា«ភាពយន្ដជីវិត » ដែលដាក់បញ្ចាំងនៅប៉ុស្ដិ៍បាយ័ន ជាការសហការណ៍ជាមួយផលិតកម្មសាស្រា្ដហ្វ្រីម នោះមានប្រវត្តិពិតរបស់នាងដល់ទៅ៨០ % ។
នាដការីដួង សុខជា បានឲ្យដឹងដែរថា«ភាពយន្ដជីវិត » មិនមែនជាស្នាដៃទី១របស់នាងទេ ដោយសារតែកន្លងមកនាងធ្លាប់ថតរឿងមួយចំនួនឲ្យផលិតកម្មផ្សេងៗទៀតដែរ ហើយនៅថ្ងៃអនាគតនាងចង់ចាប់អាជីពជាតារាសម្ដែង៥០% និងផ្នែករបាំ៥០% ខណៈដែលបំណងធំ របស់នាងនោះគឺនាងចង់ធ្វើជាគ្រូបង្ហាត់ផ្នែករបាំបុរាណនៅសាលាវិចិត្រសិល្បៈ។សុខជា បានឲ្យដឹងទៀតថាកន្លងមកនាងធ្លាប់ចេញទៅបរទេសខ្ទង់២០ប្រទេសហើយ តាមរយៈការក្រសួងទេសចរណ៍និងកម្មវិធីផ្សេងទៀតដើម្បីសម្ដែងរបាំដូចជាប្រទេសអាឡឺម៉ង់ ,ជប៉ុន និងឌូបៃ ជាដើម ។នាងបង្ហើបថាដើម្បីចាប់អាជីពជានាដការីម្នាក់បានទាមទារឲ្យយើងចរិយាសម្បត្តិល្អពីធម្មជាតិ ហើយមុននឹងរៀនបានក៍មានការធ្វើតេស្ដផ្ទាល់ផងដែរ បើជាប់ចូលរៀនបានហើយ។ដោយឡែកសម្រាប់ការថតរឿងថ្មីៗនៅចុងឆ្នាំ២០២៤ នេះនាងថាអត់ទាន់ទទួលទេ ព្រោះនាងក៍មមាញឹកជាមួយការសិក្សារផងដែរ ។
លោកស្រីប៊ុន ចាន់និមល ចាងហ្វាងផលិតកម្មសាស្រ្ដាហ្វ្រីម បានឲ្យដឹងថាខាងបាយ័នតែងតែឲ្យឱកាស និងជម្រុញការលើកស្ទួយម៉ោងល្អៗសម្រាប់ការចាក់បញ្ចាំងភាពយន្ដខ្មែរ ដែលក្នុងនោះយើងបានផលិតរឿងភាគខ្ទង់៣០០ភាគ ហើយសម្រាប់«ភាពយន្ដជីវិត»នេះយើងផលិតក្នុង១ឆ្នាំជាង៥០រឿង។យើងសហការណ៍គ្នាឡើងវិញ ក្នុងការចាក់បញ្ចាំង«ភាពយន្ដជីវិត»ដែលចាក់១រឿងចប់តែម្ដង ជារឿងឆ្លុះបង្ហាញពីសង្គមបច្ចុប្បន្ន ដែលបញ្ចាំងរៀងរាល់ថ្ងៃច័ន្ទពីម៉ោង៩ដល់១០យប់ ។លោកស្រីនិមល បន្ថែមថា បច្ចុប្បន្នភាគីទាំងសងខាងដាក់ចិត្តទាំង២នាក់ តែពួកយើងមិនទាន់មានប្រាក់ចំណេញទេ ហើយនាងយល់ថាកម្មវិធីនេះល្អ មានប្រយោជន៍ទៅដល់សង្គម ទើបសាស្រ្ដាហ្រ្វីម និងបាយ័នធ្វើយ៉ាងណាផលិតមាតិកា ទៅឲ្យទស្សនិកជនដែលមានគុណតម្លៃ។បាយ័នមានការជឿជាក់ និងទុកចិត្តហើយឲ្យតម្លៃ ទៅលើការផលិតរបស់យើង។យើងបានផ្អាក«ភាពយន្ដជីវិត»នេះរយៈពេល១ឆ្នាំ ព្រោះយើងមិនទាន់មានអ្នកឧបត្ថម្ភ ប៉ុន្ដែបើយើងចាំថាទាល់តែមានអ្នកឧបត្ថម្ភទើបយើងផលិតប្រហែលជាយើងអត់មានឱកាសធ្វើជាមាតិកាល្អៗបានទេ អីចឹងយើងក៍សម្រេចចិត្តក្នុងការវិនិយោគផលិតសិនទៅ ទោះជាមិនទាន់មានSponsor ក្ដី។រឿងរបស់យើងប្រៀបបានដូចជាសៀវភៅ១ក្បាលដែលយើងបានអាន ហេតុនេះយើយមិនគួរបញ្ឈប់ទេ យើងត្រូវតែទៅមុខដើម្បីឲ្យអ្នកទស្សនារឿងយើងឃើញតម្លៃរឿង និងមានមោទនភាពចំពោះភាពយន្ដខ្មែរព្រោះយើងផលិតរឿងនិយាយពីជីវិតពិតរបស់តួអង្គ សង្គមជាក់ស្ដែងដូចជារឿង«ភាពយន្ដជីវិត» នេះមានសាច់រឿងជីវិតពិតរបស់នាដការីម្នាក់ និងតួអង្គថ្លុកក្នុងរឿងនេះ២នាក់ទៀត។
ទាក់ទងការសហការណ៍រវាងបាយ័ននិងសាស្ដ្រាហ្វ្រីម នេះដែរកញ្ញាដួង សុខជា យល់ថានឹងធ្វើឲ្យ«ភាពយន្ដជីវិត» កាន់តែកក្រើកជាងមុនថែមទៀតជាមិនខាន។ប៉ុន្ដែចំពោះរឿងគូជីវិតវិញនាដការីរូបនេះវាចាថានាងមិនទាន់មានម្ចាស់ចិត្តទេ ព្រោះចង់សម្រេចគោលដៅសិន ជាពិសេសចង់ជួយក្រុមគ្រួសារឲ្យបានធូធាជាងនេះទើបគិតរឿងសេ្នហាតាមក្រោយ ៕
