ភ្នំពេញ៖ខេមរៈ សិរីមន្ដ ត្រូវភរិយាខ្លួនលោកស្រីគួយ ផល្លី ធ្វើខួបកំណើតគម្រប់អាយុ៣៩ឆ្នាំ កាលពីថ្ងៃទី៣ តុលា ហើយលោកថៃ ចេញសារថា«អរគុណប្រពន្ធសម្លាញ់ » ។ចំណែកអ្នកនាងផល្លី វិញបានបានថ្លែងសារថា«រីករាយថ្ងៃខួបកំណើត លោកប្ដីសម្លាញ់ » ។
នេះមិនមែនជាលើកទី១ទេប៉ុន្ដែសឹងជារៀងរាល់ឆ្នាំដែលអ្នកស្រីគួយ ផល្លី តែងតែធ្វើខួបកំណើតឲ្យប្ដីដែលឆ្នាំខ្លះរៀបចំនៅផ្ទះ ជួនកាលធ្វើនៅហាងកាខារ៉ាអូខេ ប៉ុន្ដែឆ្នាំនេះខួបសិរីមន្ដ ធ្វើនៅលើភ្នំព្រោះតារាGalaxy រូបនេះទៅបោះជុំរុំជាមួយសមាគមកាយឬទ្ធីនារីកម្ពុជាចំនួន៥០០នាក់។ការរៀបចំខួបកំណើតខុសពីឆ្នាំមុនៗបែប នេះបន្ទាប់ពីលោកប៊ុនថៃ បានរងការិះគន់ច្រើនជុំវិញការគ្រងឈុតព្រះបាទជ័យវរ្ម័នទី៧ ជាលើកទី២ ដោយខ្លះថាលោកមិនសាកសម ឬអ្នកខ្លះទៀតបន្ទោសទៅលើអ្នកដឹកនាំសិល្បៈថាដូចខ្វះតួជាដើម…។ប៉ុន្ដែសិរីមន្ដ មិនតតបទេ ដោយមានអ្នកគាំទ្រខ្លះថាលោកល្បីបានជាគេជ្រើសឲ្យធ្វើតួព្រះមហាក្សត្រ ។
គួររំលឹកថាខេមរៈ សិរីមន្ដ កើតនៅថ្ងៃទី៣ ខែ១១ ឆ្នាំ១៩៨៥ ហើយលោកបានភ្ជាប់ស្នេហាជាមួយអ្នកនាងគួយ ផល្លី ២០០៤ អំឡុងពេលដែលសិរីមន្ដ ច្រៀងនៅU2 ពេលនេះទទួលបានកូន៣នាក់គឺកូនទី១ប្រុសឈ្មោះខេមរៈ មន្ដស្នេហ៍ អាយុ១១ឆ្នាំ ,កូនទី២ស្រីឈ្មោះខេមរៈ ស្រ្ដី អាយុ៨ឆ្នាំ និងកូនទី៣ឈ្មោះខេមរៈ មន្ដរាជនី អាយុ៦ឆ្នាំ ។សិរីមន្ដ កំពុងបណ្ដុះកូនទី១ឲ្យដើរតាមគន្លងខ្លួន តែមិនទាន់ឲ្យចូលច្រៀងនៅផលិតកម្មណាទេ ព្រោះរងចាំឲ្យរូបគេមានវ័យធំជាងនេះបន្ដិចសិន ។សម្រាប់សិរីមន្ដ វិញមិនទាន់មានដំណឹងលោកត្រៀមយកកូនទី៤ឡើយ បើទោះជាចំណងស្នេហាលោកជាមួយភរិយារយៈពេល២០ឆ្នាំ នេះឃើញតែផ្អែមល្ហែម សរសើរគ្នាទៅវិញទៅមកក្ដី ។
មជ្ឈដ្ឋានមហាជនកត់សម្គាល់ថាខេមរៈ សិរីមន្ដ ក្នុងអាយុ៣៩ឆ្នាំមានទ្រព្យច្រើនគួរឲ្យកត់សម្គាល់ពិសេសក្រោយឡើងជាឧកញ៉ាកាលពីថ្ងៃទី១១ ខែកុម្ភៈ ឆ្នាំ២០២២ នោះមកលោកថៃ កាន់តែលេងម៉ូដរថយន្ដថ្លៃៗដូចជាពេលនេះជិះRolls Royce ,Lamborghini និងរថយន្ដទំនើបៗជាច្រើនគ្រឿងទៀត បើទោះជាលោកថៃ មិនធ្លាប់ប្រកាសថាខ្លួនមានទ្រព្យសម្បត្តិសរុបចំនួនប៉ុន្មាន ដូចព្រាប សុវត្ថិ ដែលត្រូវមនុស្សជំនិតលោកទម្លាយប្រាប់អ្នកកាសែតកាលពីខែកញ្ញា ឆ្នាំ២០២០ ថាលោកស្នាយ មានទ្រព្យសរុបខ្ទង់៣០លានដុល្លារក្ដី ។ ។ប៉ុន្ដែសម្រាប់ទីផ្សារចម្រៀងវិញសិរីមន្ដ ដែលអុកឡុកជាងគេនៅGalaxy នោះមិនសូវមានសន្ទុះខ្លាំងដូចមុនឡើយ ពិសេសលោកធ្វើអ្វីប្លែកៗបែជាផ្ទុះការិះគន់នៅលើបណ្ដាញសង្គមជាបន្ដបន្ទាប់ទៅវិញ ក្រោយលោកថៃ ចេញការពារថៅកែជាញឹកញាប់នោះ។តែសិរីមន្ដ ត្រូវថៅកែGalaxy ពេញចិត្តខ្លាំងរហូតតាមព័តមានថាលោកចង់ផលិតបទចម្រៀង និងMV បែបណាម្ចាស់ផលិតកម្មខាងលើតែងតែបំពេញតាមបំណងលោកទៀតផង។យ៉ាងណាការប៉ះគ្នាជាលើកទី២របស់សិរីមន្ដ ជាមួយលោកព្រាប សុវត្ថិ ធ្វើឲ្យថៅកែក៍ឈឺក្បាលមិនតិចដែរ ព្រោះបើលើកសិរីមន្ដ ជ្រុលក៍មិនអាចឲ្យលោកសុវត្ថិ នៅលេខ២ ដែរ ហេតុនេះទាល់តែឲ្យធ្វើតួឯកទាំងពីរទើបអាចទៅរួច ។
សូមបញ្ជាក់ថាខេមរៈ សិរីមន្ដ ក៍មិនខុសពីព្រាប សុវត្ថិ និងឆាយ វីរៈយុទ្ធ ដែរពោលគឺភរិយាលោកជាជំនួយការផង ទីប្រឹក្សាឲ្យប្ដីផង ហើយពេលខ្លះអ្នកនាងគួយ ផល្លី ថែមទាំងអាចដឹកនាំMV បទរបស់ស្វាមីទៀតផង។អ្នកនាងផល្លី ថាស្វាមីនាងមិនត្រឹមតែពូកែធ្វើឲ្យFan រីករាយតាមរយៈបទចម្រៀងនោះទេ ប៉ុន្ដែលោកក៍ចេះធ្វើឲ្យម្ដាយក្មេកសប្បាយចិត្តដែរ ពិសេសនៅពេលម្ដាយនាងមានជំងឺ។គេចាំមើលថាលោកថៃ វ័យ៣៩ឆ្នាំ នៅល្បីបានប៉ុន្មានឆ្នាំទៀត ហើយពេលណាទើបរុញកូនឲ្យស្នងតំណែងខ្លួន ដូចព្រាប សុវត្ថិ ?
