ភ្នំពេញ៖ប៉ាច គីមមួយ បណ្ដើរអនាគតស្វាមីលោកសយ រតនៈ ទៅចូលរួមពិធីមង្គលការរបស់អ្នកនាងសុភ័ក្រ្ត កុសុម៉ា កាលពីថ្ងៃទី៤ វិច្ឆិកា ហើយត្រូវមិត្តរួមអាជីពជម្រុញឲ្យគូស្នេហ៍ស្រីស្រស់ ប្រុសសង្ហារប្រញ៉ាប់ចូលរោងការដូចគេដែរទៅ និងឆាប់បានកូនបន្ដពូជ ។ប៉ុន្ដែគីមមួយ និងរតនៈ ហាក់នៅរារែកចិត្តហើយបានត្រឹមតែបង្ហាញកាយវិការ«ឃើញគេរៀបការ ចិត្តចង់តែរៀបការ » ដែរ តាមរយៈលោករតនៈ បំពាក់កម្រងផ្កាឲ្យគីមមួយ ដូចក្នុងពិធីហែជំនួន។ទោះជាយ៉ាងណាគីមមួយ-រតនៈ បានមានចិត្តស្រម៉ៃចង់រៀបការដូចសុភ័ក្រ្ដ កុសុម៉ា ប៉ុណ្ណោះ ប៉ុន្ដែមិនបានសន្យានៅចំពោះមុខមិត្តភក្ដិថាពេលណាទើបពួកគេព្រមរៀបការមែនទែនឡើយ ។
អ្នកយកព័តមានយើងទូរស័ព្ទទៅលោកសយ រតនៈ កាលពីរសៀលថ្ងៃទី៥ តុលា តែតេចូលជាច្រើនដងគ្មានអ្នកទទួលឡើយ ។ប៉ុន្ដែលោករតនៈ ធ្លាប់បានប្រាប់អ្នកយកព័តមានយើងថានឹងដឹកដៃអូនគីមមួយ រៀបការមិនឲ្យលើសពីឆ្នាំ២០២៤ នោះទេ តែពេលនេះនៅបាំងតែជាង១ខែទៀតប៉ុណ្ណោះ ឆ្លងឆ្នាំសាកលហើយបែជារតនៈ និយាយប្ដូរចិត្តថាមិនដែលសន្យារឿងរៀបការទៅវិញ តែសារភាពថារាល់ថ្ងៃលោកនិងគូដណ្ដឹងបានរស់នៅក្រោមដំបូលផ្ទះតែមួយទៅហើយ ខណៈដែលគីមមួយ ធ្លាប់ប្រាប់អ្នកយកព័តមានយើងថារៀបការថ្ងៃខែឆ្នាំណា នាងមិនអាចប្រាប់មុនបានទេ ព្រោះចង់ឲ្យFan របស់នាងSurprise ។
ប៉ាច គីមមួយ បានភ្ជាប់ពាក្យជាមួយលោកសយ រតនៈ កាលពីថ្ងៃទី១ ខែកក្កដា ឆ្នាំ២០២២ ក្រោយពិសោធន៍ស្នេហ៍ជាង៥ឆ្នាំ ក្រោមដំបូលហង្សមាស ហើយពេលនេះពួកគេប្រឹងរកស៊ីសន្សំលុយរួមគ្នា ដើម្បីរៀបការ។គូស្នេហ៍តារា១គូនេះសាកសមគ្នាខ្លាំងបើទោះជាគីមមួយ មានអាយុបងលោករតនៈ ក្ដី ប៉ុន្ដែអ្នកទាំងពីរតែងតែជួយគ្នាទៅវិញទៅមកពេលឡើងច្រៀងជាដៃគូ ហើយហង្សមាសក៍បានធ្វើបទចម្រៀងឲ្យអ្នកទាំងពីរច្រៀងឆ្លងឆ្លើយជាបន្ដបន្ទាប់ដែរ ក្រោយពីគីមមួយ បាត់បង់ដៃគូលោកឧកញ៉ាព្រាប សុវត្ថិ ដែលធ្លាប់តែសម្ដែងស៊ីចង្វាក់គ្នាតាមរយៈបទ«មាន់ស្រែ បន្លែស្រស់ » និងបទ«កាឌឹបៗដាក់ » ។
ប៉ាច គីមមួយ ជាអតីតបេក្ខភាពThe Voice Cambodia រដូវកាលទី១ ក្លាយជាគូស្នេហ៍លោកសយ រតនៈ បេក្ខភាពThe Voice Cambodia រដូវកាលទី២ ដោយក្រុមគ្រួសារទាំងសងខាងគាំទ្រដូចគ្នា ខណៈលោករតនៈ មិនគិតពីអតីតកាលរបស់គូស្នេហ៍ដែលធ្លាប់បរាជ័យស្នេហាម្ដងនោះឡើយ។លោករតនៈ ដែលជាមនុស្សអៀនច្រើនបានសម្របខ្លួនតាមគីមមួយ ដោយពេលខ្លះលោកចេញLive ជាមួយប្រពន្ធលក់ខោអាវតាមOnline ។លោករតនៈ ធ្លាប់បង្ហើបថាទោះជាពេលនេះលោកនិងគីមមួយ រស់នៅផ្ទះក្រោមដំបូលតែមួយក៍ដោយ តែលោកគ្មានគម្រោងយកកូនមុនរៀបការនោះទេ ពោលគឺចង់បានកូនក្រោយរៀបការរួច ។
ក្រៅពីប៉ាច គីមមួយ តារាដែលជ្រើសគូស្នេហ៍ជាតារាដូចគ្នាហើយរស់នៅជាមួយគ្នាអត់ដំណឹងរៀបការមានដូចជានាងទេព បូព្រឹក្ស -ងួន ចាន់ដេវីត និងម៉ា នីកា -ចន ជាដើម ។គេកត់សម្គាល់ថាគីមមួយ ក្រោយអត់ជំនួយពីលោកព្រាប សុវត្ថិ ជាង៤ឆ្នាំនេះ នាងមិនសូវលេចធ្លោនោះទេ ហើយពេលនេះស្រីស្រស់ចាប់ដៃគូជាមួយលោករតនៈ តែម្នាក់គត់ ដែលធ្វើឲ្យទីផ្សារចម្រៀងនាងហាក់នៅទ្រឹង។ប៉ុន្ដែតារាដែលអាចច្រៀងបាន៣ភាសារគឺខ្មែរ ចិន និងអង់គ្លេស រូបនេះប្រាប់ថានាងគ្មានគម្រោងដើរចេញពីហង្សមាសឆាប់ៗទេ បើទោះជារយៈពេលចុងក្រោយនេះគេឃើញតារាល្បីៗបានដើរចេញពីហង្សមាសជាបន្ដបន្ទាប់ក្ដី ៕
