ខេត្តបាត់ដំបង ៖ បុរសម្នាក់ រកស៊ីរត់ម៉ូតូកង់បី មិនសូវកាក់កប ក៏បែកគំនិតទិញថ្នាំញៀន យកមកលក់ ទីបំផុតត្រូវកម្លាំងមូលដ្ឋានកងរាជអាវុធហត្ថស្រុកភ្នំព្រឹក ស្រាវជ្រាវឃាត់ខ្លួនបាន នាំយកទៅសាកសួរ និងឈានដល់ការឃាត់ខ្លួនជនសង្ស័យជាមេខ្លោងថែមម្នាក់ទៀត សរុប២នាក់ នាំយកមកចាត់ការតាមច្បាប់។
តាមប្រភពមន្ត្រីជំនាញអាវុធហត្ថ បានឱ្យដឹងថា ប្រតិបត្តិការខាងលើ ជំហានដំបូងធ្វើឡើងនៅម៉ោង១០ព្រឹក ថ្ងៃទី០៥ ខែវិច្ឆិកា ឆ្នាំ២០២៤ នៅត្រង់ចំណុចផ្លូវជាតិលេខ 59B ស្ថិតក្នុងភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ដោយបានឃាត់ខ្លួនជនសង្ស័យម្នាក់ ឈ្មោះហឿត រ៉ីន ភេទប្រុស អាយុ៤០ឆ្នាំ មុខរបរកម្មករ រស់នៅភូមិថ្មី ឃុំត្រាង ស្រុកកំរៀង ខេត្តបាត់ដំបង ព្រមទាំងដកហូតវត្ថុតាង រួមមាន គ្រឿងញៀនម្សៅក្រាមពណ៌សថ្លា (ice) ចំនួន១កញ្ចប់ ទម្ងន់ ១០២,១៦ក្រាម (ថ្លឹងទាំងសំបក) ទូរស័ព្ទដៃ ចំនួន២គ្រឿង និងម៉ូតូកង់បី ១គ្រឿង។
ប្រភពដដែល បន្តថា បន្ទាប់ពីឃាត់ខ្លួនជនសង្ស័យខាងលើ និងសាកសួរយកចម្លើយរួចមក នៅវេលាម៉ោង១២និង១០នាទីថ្ងៃត្រង់ ថ្ងៃដដែល កម្លាំងជំនាញបានបន្តទៅឃាត់ខ្លួនជនសង្ស័យជាមេខ្លោងម្នាក់ទៀត ឈ្មោះសំ ថេង ភេទប្រុស អាយុ៥១ឆ្នាំ មុខរបរកម្មករ មានលំនៅភូមិដូង ឃុំបឹងរាំង ស្រុកកំរៀង ខេត្តបាត់ដំបង ព្រមទាំងដកហូតវត្ថុតាង ម៉ូតូម៉ាក PCX ចំនួន១គ្រឿង។
ជនសង្ស័យទាំង២នាក់ រួមនិងវត្ថុតាង ត្រូវបានបញ្ជូនបន្តទៅកាន់ការិយាល័យជំនាញអាវុធហត្ថខេត្ត ដើម្បីចាត់ការតាមនីតិវិធី៕