ខេត្តកណ្តាល ៖ ស្រីក្មេងរូបស្រស់ម្នាក់ បានធ្វើសកម្មភាពឆបោកយកគ្រឿងអលង្ការ ពីចាស់ៗនៅតាមភូមិ បានសម្រេចជាច្រើនករណី ដោយសរុបជាមាស ដែលឆបោកបាន ប្រមាណជិត៤តម្លឹង ទីបំផុតត្រូវបានសមត្ថកិច្ចជំនាញចុះស្រាវជ្រាវ ឃាត់ខ្លួនបាន នាំយកមកចាត់ការតាមច្បាប់។
ករណីឆបោកយកគ្រឿងអលង្ការនេះ បានកើតឡីង កាលពីវេលាម៉ោង ៦និង៤០នាទីព្រឹក ថ្ងៃទី១៦ ខែធ្នូ ឆ្នាំ២០២៤ នៅចំណុចភូមិល្វាទោង ឃុំកំពង់កុង ស្រុកកោះធំ។
ជនរងគ្រោះ សរុបមានចំនួន៩នាក់ រួមមាន ទី១-ឈ្មោះអន ផន ភេទស្រី អាយុ៧៤ឆ្នាំ មុខរបរកសិករ មានលំនៅ ភូមិល្វាទោង ឃុំកំពង់កុង ស្រុកកោះធំ (បាត់បង់ខ្សែកមាស និងបណ្តោងមាស ទម្ងន់ ៦ជី)។ ទី២-ឈ្មោះកំ វ៉ាន់ឌី ភេទស្រី អាយុ៧៥ឆ្នាំ មុខរបរកសិករ មានលំនៅ ភូមិព្រែកផ្អាវ ឃុំកំពង់កុង ស្រុកកោះធំ (បាត់បង់ចិញ្ចៀនមាស ១វង់ ទម្ងន់៥ជី)។ ទី៣-ឈ្មោះជួប ភី ភេទប្រុស អាយុ៨៧ឆ្នាំ មុខរបរអាចារ្យវត្ត មានលំនៅ ភូមិព្រែកតា ហង់ ឃុំកំពង់កុង ស្រុកកោះធំ (បាត់បង់ចិញ្ចៀនមាស ១វង់ ទម្ងន់៥ជី៣ហ៊ុន)។ ទី៤-ឈ្មោះឆែ វិម៉លី ភេទស្រី អាយុ៦៦ឆ្នាំ មុខរបរលក់ដូរ មានលំនៅ ភូមិលើកដែក ឃុំលើកដែក ស្រុកកោះធំ (បាត់បង់ចិញ្ចៀនមាស ១វង់ ទម្ងន់៣ជី)។ ទី៥-ឈ្មោះ អេង តាំងអោ ភេទស្រី អាយុ៥៨ឆ្នាំ មុខរបរលក់ដូរ មានលំនៅ ភូមិពោធិរាមា សង្កាត់ព្រែកស្តី ក្រុងសំពៅពូន (បាត់បង់ក្រវិលប្លាទីន ១គូ ទម្ងន់១ជី)។ ទី៦-ឈ្មោះជាប់ យ៉ុម ភេទស្រី អាយុ៦៥ឆ្នាំ មុខរបរកសិករ មានលំនៅ ភូមិខ្ពប សង្កាត់សំពៅពូន ក្រុងសំពៅពូន (បាត់បង់ខ្សែកមាស ១ខ្សែ ទម្ងន់៥ជី)។ ទី៧-ឈ្មោះកៅ ស៊្រីវ ភេទប្រុស អាយុ៦៤ឆ្នាំ មុខរបរកសិករ មានលំនៅ ភូមិព្រែកស៊ឹង សង្កាត់សំពៅពូន ក្រុងសំពៅពូន (បាត់បង់ចិញ្ចៀនមាស ១វង់ ទម្ងន់៥ជី)។ ទី៨-ឈ្មោះយុន ខៃ ភេទស្រី អាយុ៥៨ឆ្នាំ មុខរបរកសិករ មានលំនៅ ភូមិព្រែកសែម សង្កាត់សំពៅពូន ក្រុងសំពៅពូន (បាត់បង់ខ្សែកមាស ១ខ្សែ មានទម្ងន់២ជី និងប្រាក់ ចំនួន៧ម៉ឺនរៀល) និងទី៩-ឈ្មោះស៊ិន ឆាយ ភេទប្រុស អាយុ៧៥ឆ្នាំ មុខរបរកសិករ មានលំនៅ ភូមិក្បាលកោះទៀវ សង្កាត់សំពៅពូន ក្រុងសំពៅពូន (បាត់បង់ចិញ្ចៀនមាស ១វង់ ទម្ងន់៥ជី)។
ចំណែកជនសង្ស័យដែលត្រូវសមត្ថកិច្ចចាប់ឃាត់ខ្លួន មានឈ្មោះ ជន ណាវី ភេទស្រី អាយុ១៧ឆ្នាំ មុខរបរមិនពិតប្រាកដ មានលំនៅ ភូមិព្រែកតាសេក សង្កាត់ជ្រោយតាកែវ ក្រុងសំពៅពូន។ ចំពោះវត្ថុតាងដកហូតបាន រួមមាន ១-ទូរស័ព្ទដៃ ម៉ាក iPhone 13 ពណ៌ផ្កាឈូក ចំនួន១គ្រឿង។ ២-ម៉ូតូម៉ាកហុងដា ស្កុបពី ពណ៌ស ពាក់ស្លាកលេខ ភ្នំពេញ 1GQ-2304 ចំនួន១គ្រឿង (ជាសម្ភារៈនិងមធ្យោបាយរបស់ជនសង្ស័យជិះធ្វើសកម្មភាពឆបោកយកគ្រឿងអលង្ការរបស់ជនរងគ្រោះ រយៈកាលកន្លងមក)។
តាមប្រភពសមត្ថកិច្ច បានឱ្យដឹងថា មុនពេលកើតហេតុ កាលពីព្រឹកថ្ងៃទី១៦ ខែធ្នូ ឆ្នាំ២០២៤ ជនរងគ្រោះឈ្មោះ អន ផន បានទៅចូលរួមកម្មវិធីភ្ជាប់ពាក្យចៅ ដែលមានលំនៅ ផ្ទះក្បែរគ្នា ស្រាប់តែពេលនោះឃើញជនសង្ស័យឈ្មោះ ជន ណាវី ភេទស្រី អាយុ១៧ឆ្នាំ បានដើរចូលមកនិយាយប្រាប់ជនរងគ្រោះថា “យាយៗ អាវរបស់យាយឯងប្រឡាក់ដីហើយ មកកន្លែងនេះតិច មកខ្ញុំជួយលាងសម្អាតអាវឱ្យយាយឯង” នៅពេលនោះជនរងគ្រោះបានដើរទៅតាមក្រោយជនសង្ស័យ នៅពេលដើរទៅដល់កន្លែងស្ងាត់ ជនសង្ស័យបានយកក្រមាមករុំលើករបស់ជនរងគ្រោះ ហើយបានធ្វើសកម្មភាពដោះយកខ្សែកមាស ១ខ្សែ រួមទាំងបណ្តោងមាស ចំនួន១ដែលមានទម្ងន់សរុប ៦ជីមាស។ ក្រោយពេលធ្វើសកម្មភាពរួច ជនសង្ស័យឈ្មោះ ជន ណាវី បានរត់ឡើងជិះម៉ូតូម៉ាកហុងដា ស្កុបពី ពណ៌ស រត់គេចខ្លួនចេញទៅបាត់។
លុះព្រឹកឡើងថ្ងៃទី១៧ ខែធ្នូ ឆ្នាំ២០២៤ ជនរងគ្រោះគាត់បានរាយការណ៍ និងបានដាក់ពាក្យបណ្តឹងនៅអធិការ ដ្ឋាននគរបាលស្រុកកោះធំ ដើម្បីឱ្យសមត្ថកិច្ចនគរបាល ជួយធ្វើការស្រាវជ្រាវស្វែងរកអត្តសញ្ញាណជនសង្ស័យដែលបានប្រព្រឹត្តសកម្មភាពឆបោកយកគ្រឿងអលង្ការរបស់ពួកគាត់ យកមកអនុវត្តទៅតាមច្បាប់។
ក្រោយពេលទទួលបានព័ត៌មានភ្លាម កម្លាំងជំនាញស្រុកកោះធំ បានសហការជាមួយនិងប៉ុស្តិ៍នគរបាលរដ្ឋបាលកំពង់កុង និងប៉ុស្តិ៍នគរបាលរដ្ឋបាលសំពៅពូន នៃអធិការរដ្ឋាននគរបាលក្រុងសំពៅពូន បានធ្វើការស្រាវជ្រាវរហូតឃាត់ខ្លួនបានជនសង្ស័យ ឈ្មោះជន ណាវី រួមទាំង មធ្យោបាយមានម៉ូតូហុងដា ស្កុបពី ពណ៌ស ពាក់ស្លាក លេខ ភ្នំពេញ 1GQ-2304 ដែលជនសង្ស័យតែងតែជិះធ្វើសកម្មភាពឆបោកយកគ្រឿងអលង្ការរបស់ជនរង គ្រោះ រយៈពេលកន្លងមក។
ក្រោយមក សមត្ថកិច្ចបានប្រកាសព័ត៌មានដល់បណ្តាប៉ុស្តិ៍នគរបាលរដ្ឋបាលទាំង៦ ទូទាំងស្រុកកោះធំ និងប៉ុស្តិ៍នគរបាលរដ្ឋបាលសំពៅពូន នៃអធិការរដ្ឋាននគរបាក្រុងសំពៅពូន បើមានប្រជាពលរដ្ឋណាដែលបានចាញ់ បោកជនសង្ស័យខាងលើនេះ ឱ្យពួកគាត់មកដាក់ពាក្យបណ្តឹងនៅអធិការរដ្ឋានគរបាលស្រុកកោះធំ ដើម្បីកសាងសំណុំរឿងចាត់ការតាមនីតិវិធី៕