ខេត្តស្វាយរៀង ៖ រថយន្តទំនើប ចំនួន៤គ្រឿង រួមនិងម៉ូតូ ១គ្រឿង បានបុកបន្តកន្ទុយគ្នា បណ្តាលឱ្យអ្នកបើកម៉ូតូ រងរបួស និងបង្កឱ្យខូចខាតរថយន្តទាំង៤គ្រឿង។
ហេតុការណ៍គ្រោះថ្នាក់ចរាចរណ៍បុកបន្តកន្ទុយគ្នាខាងលើនេះ បានកើតឡើងកាលពីវេលាម៉ោង១២និង២៥នាទីថ្ងៃត្រង់ ថ្ងៃទី២០ ខែធ្នូ ឆ្នាំ២០២៤ នៅលើកំណាត់ផ្លូវជាតិលេខ១ នៅខាងមុខកាស៊ីណូពិភពថ្មី ស្ថិតនៅភូមិបាវិតកណ្តាល សង្កាត់បាវិត ក្រុងបាវិត។
តាមប្រភពពីកន្លែងកើតហេតុ បានឱ្យដឹងថា មូលហេតុដែលនាំឱ្យកើតមានករណីគ្រោះថ្នាក់ចរាចរណ៍បុកបន្តកន្ទុយគ្នាខាងលើនេះ គឺមុនកើតហេតុ មានរថយន្ត ១គ្រឿង បានបើកបុកម៉ូតូ រួចបានចាប់ហ្វ្រាំង ហើយភ្លាមនោះ មានជនជាតិចិនម្នាក់ បើកបររថយន្តម៉ាក Lexus ពណ៌ស ពាក់ស្លាកលេខ ភ្នំពេញ 2BX-6880 បើកបរក្នុងល្បឿនលឿន ជ្រុលទៅបុកពីក្រោយបន្ថែមពេញទំហឹង និងបន្តបុករះរថយន្ត ចំនួន ២គ្រឿងផ្សេងទៀត ដែលធ្វើដំណើស្របទិសគ្នា គឺបុកបន្តកន្ទុយគ្នាតែម្តង។
ក្រោយកើតហេតុ សមត្ថកិច្ចជំនាញចរាចរណ៍នៃអធិការដ្ឋាននគរបាលក្រុងបាវិត បានចុះអន្តរាគមន៍ និងធ្វើការវាស់វែង រួចស្ទូចរថយន្ត ទាំង៤គ្រឿង និងម៉ូតូ ១គ្រឿង យកទៅអធិការដ្ឋាននគរបាលក្រុងបាវិត ដើម្បីដោះ ស្រាយតាមនីតិវិធី។ ចំណែកអ្នករបួស ត្រូវបានដឹកបញ្ជូនទៅព្យាបាលនៅមណ្ឌលសុខភាពបាវិត៕