ខេត្តកណ្តាល ៖ បុរសជាអ្នករត់តាក់ស៊ីម្នាក់ ត្រូវបានជនជាតិចិន ១ក្រុម ជួលរថយន្តជិះចេញពីភូមិសាស្ត្រជ្រៃធំ ស្រុកកោះធំ ឆ្ពោះទៅខេត្តព្រះសីហនុ លុះពេលទៅទទួលក្រុមជនជាតិចិនទាំងនោះ មិនទាន់បានធ្វើដំណើរចេញមកផង ស្រាប់តែត្រូវក្រុមជនសង្ស័យដកកាំភ្លើងភ្ជង់ ក្បាលបុរសជាម្ចាស់រថយន្ត ប្លន់រថយន្ត បើករត់គេចតាំងពីជ្រៃធំ រហូតមកដល់ភូមិសាស្ត្រក្រុងតាខ្មៅ ត្រូវបានកម្លាំងជំនាញស្ទាក់បង្ក្រាបបាន ដោយឃាត់ខ្លួនក្រុមជនសង្ស័យជនជាតិចិនបានចំនួន៣នាក់ ខណៈបក្ខពួក ៤នាក់ទៀត កំពុងរត់គេចខ្លួន។
ករណីប្លន់រថយន្តតាក់ស៊ីនេះ បានកើតឡើងកាលពីវេលាម៉ោងប្រមាណជិត៤ទៀបភ្លឺ ថ្ងៃទី០៧ ខែមករា ឆ្នាំ២០២៥ នៅចំណុចភូមិសាស្ត្រជ្រៃធំ ស្រុកកោះធំ។ រហូតមកដល់វេលាម៉ោង៥ទៀបភ្លឺ ថ្ងៃដដែល ខណៈដែលក្រុមជន សង្ស័យបើករថយន្តរត់គេចមកដល់ភូមិសាស្ត្រក្រុងតាខ្មៅ ក៏ត្រូវបានកម្លាំងសមត្ថកិច្ចជំនាញស្ទាក់បង្ក្រាប ឃាត់ខ្លួនបានជនសង្ស័យចំនួន៣នាក់។
រថយន្តដែលត្រូវក្រុមជនជាតិចិន ប្លន់នោះ ម៉ាក TOYOTA ALPHARD ពណ៌ស ពាក់ស្លាកលេខ ភ្នំពេញ 2CC -0847 ជាកម្មសិទ្ធិរបស់ជនរងគ្រោះឈ្មោះយន់ សាវឿន ហៅពិទូ មុខរបរអ្នករត់តាក់ស៊ី ដឹកភ្ញៀវជនជាតិចិន។ ចំណែកជនសង្ស័យទាំង៣នាក់ ដែលត្រូវបានសមត្ថកិច្ចឃាត់ខ្លួន មិនទាន់ស្គាល់អត្តសញ្ញាណនៅឡើយ គ្រាន់ តែដឹងថា សុទ្ធតែជាជនជាតិចិន។ ដោយឡែក បក្ខពួក ៤នាក់ផ្សេងទៀត បានរត់គេចខ្លួនបាត់អស់ទៅហើយ។
តាមសម្តីបុរសរងគ្រោះ ឈ្មោះយន់ សាវឿន ហៅពិទូ ដែលជាម្ចាស់រថយន្ត បានរៀបរាប់ប្រាប់ថា មុនពេលកើតហេតុ កាលពីវេលារំលងអធ្រាត្រ ឈានចូលថ្ងៃទី០៧ ខែមករា ឆ្នាំ២០២៥ ខណៈដែលគាត់កំពុងដេកចាំដឹកភ្ញៀវនៅម្តុំជ្រៃធំ ដូចសព្វដងស្រាប់តែគាត់បានទទួលការកក់ពីគ្រុបតេឡេក្រាម ក្រុមអ្នករត់តាក់ស៊ីដូចគ្នា ថាមានជនជាតិចិន ១ក្រុម ជួលរថយន្តរបស់គាត់ជិះចេញពីជ្រៃធំ គោលដៅទៅខេត្តព្រះសីហនុ ទាំងយប់។ បន្ទាប់មក ក្រោយពីចរចាតម្លៃត្រូវរ៉ូវគ្នាអស់ហើយ នៅវេលាម៉ោងប្រមាណ ១រំលងអធ្រាត្រ ថ្ងៃដដែលនោះ គាត់បានបើករថយន្ត ម៉ាក TOYOTA ALPHARD ពណ៌ស ពាក់ស្លាកលេខ ភ្នំពេញ 2CC-0847 ចេញទៅគោលដៅជិតអគារ ១កន្លែង ម្តុំជ្រៃធំ លុះពេលទៅដល់ បានជួបនឹងជនជាតិចិន ចំនួន ៣នាក់ (ស្រី១) បន្ទាប់មក ពួកគេក៏បាននាំគ្នាឡើងជិះក្នុងរថយន្តរបស់គាត់ តែប្រាប់គាត់ថា កុំទាន់អាលចេញ ព្រោះអីពួកគេត្រូវនៅចាំមិត្តភក្តិម្នាក់ទៀត ទើបគាត់បានបញ្ឆេះរថយន្តចោល ដើម្បីអង្គុយចាំ។
បុរសរងគ្រោះ បានបន្តថា លុះក្រោយមក គាត់បានអង្គុយចាំបក្ខពួករបស់ជនជាតិចិននោះរហូតដល់ម៉ោងជាង៣ទៀបភ្លឺទៅហើយ នៅតែមិនទាន់ឃើញមានអ្នកមកសោះ ទើបគាត់ចាប់ផ្តើមសង្ស័យថា ដូចជាមិនសូវស្រួល និងបានទាក់ទងផ្តល់ដំណឹងទៅគ្រុបតេឡេក្រាមក្រុមអ្នករត់តាក់ស៊ីវិញថា ភ្ញៀវទាំងនេះ ដូចជាមិនសូវស្រួលសោះ ចាំរាប់ម៉ោងហើយ នៅតែមិនទាន់បានចេញទៅទៀត ហើយគាត់ទំនងជាលែងទទួលភ្ញៀវនេះហើយ។ បន្ទាប់មក គាត់ក៏បានដើរចុះពីរថយន្ត ទៅបត់ជើងតូច នៅខាងក្រោយរថយន្ត ស្រាប់តែរំពេចនោះ លេចមុខជនជាតិចិនចំនួន៤នាក់ទៀត បានផ្លោះរបងចេញពីអគារខាងលើ រួចនាំគ្នាស្ទុះរត់ចូលទៅក្នុងរថយន្តរបស់គាត់ ឃើញបែបនេះ គាត់ដឹងថាសភាពការណ៍ដូចជាមិនស្រួល ទើបគាត់ប្រញាប់ស្ទុះរត់ទៅបើកទ្វាររថយន្ត បម្រុងពន្លត់រថយន្ត តែត្រូវជនជាតិចិនម្នាក់ ក្នុងចំណោមបក្ខពួកគេ ៧នាក់នោះ បានដកកាំភ្លើងភ្ជង់ក្បាលគាត់ មិនឱ្យពន្លត់រថយន្ត ឬបើករថយន្តចេញដាច់ខាត រួចច្រានគាត់ទម្លាក់ពីលើរថយន្ត ហើយក្រុមជនសង្ស័យជាជនជាតិចិនទាំងនោះ បានឡើងបើករថយន្តរបស់គាត់ចេញ ឆ្ពោះចូលទៅរាជធានីភ្នំពេញ តែម្តង។
បុរសរងគ្រោះ បានឱ្យដឹងថា ភ្លាមនោះ ដោយសារតែទូរស័ព្ទរបស់គាត់ នៅក្នុងរថយន្តដែលក្រុមជនសង្ស័យប្លន់យកទៅបាត់ហើយនោះ ទើបគាត់គ្មានអ្វីទាក់ទងទៅមិត្តភក្តិ ក្រុមគ្រួសារ ឬប្តឹងសមត្ថកិច្ចបានឡើយ ទើបគាត់បានរត់សំដៅមកផ្លូវធំ និងសុំឱ្យប្រជាពលរដ្ឋក្បែរនោះ ជួយដឹកគាត់តាមម៉ូតូ សំដៅទៅបេនរថយន្តតាក់ស៊ី ដែលជាចំណតពួកគាត់ឈប់ចាំភ្ញៀវ ដើម្បីហៅឱ្យប្អូនរបស់គាត់ ដែលជាអ្នករត់តាក់ស៊ីដូចគ្នា ជួយ។ លុះទៅដល់ គាត់ប្រាប់រឿងរ៉ាវឱ្យប្អូនបានដឹង និងបានឡើងជិះរថយន្តដឹកគ្នាដេញតាមរថយន្តរបស់គាត់បណ្តើរ និងទូរស័ព្ទទៅប្រាប់ប្រពន្ធនៅផ្ទះ ឯរាជធានីភ្នំពេញ ឆែកមើល GPS រថយន្ត តាមប្រព័ន្ធ iCloud ទូរស័ព្ទដែលនៅក្នុងរថយន្តនោះស្រាប់ ទើបដឹងពីទីតាំងរថយន្ត ហើយក៏បានបន្តរាយការណ៍ចូលគ្រុបអ្នកសារព័ត៌មាន ស្នើសុំឱ្យប្តឹងសមត្ថកិច្ចខេត្តកណ្តាល ជួយដេញស្ទាក់។
បុរសរងគ្រោះ បានបញ្ជាក់ថា រហូតមកដល់វេលាម៉ោង៥ទៀបភ្លឺ ថ្ងៃដដែល កម្លាំងសមត្ថកិច្ចក្រុងតាខ្មៅ បានចេញស្ទាក់ឃាត់បានរថយន្តរបស់គាត់ និងឈានដល់ការឃាត់ខ្លួនជនសង្ស័យជាជនជាតិចិន បានចំនួន៣នាក់ទៀតផង។ ចំណែកបក្ខ ៤នាក់ទៀត បានរត់គេចបាត់ អស់ទៅហើយ។
ក្រោយកើតហេតុ ក្រុមជនសង្ស័យជាជនជាតិចិន ទាំង៣នាក់ ត្រូវបានសមត្ថកិច្ចជំនាញក្រុងតាខ្មៅ ឃាត់ខ្លួនបញ្ជូនទៅសាកសួរ។ ចំណែកជនរងគ្រោះជាម្ចាស់រថយន្ត បានទៅដាក់ពាក្យបណ្តឹង ដើម្បីឱ្យសមត្ថកិច្ចចាត់ការក្រុមជនសង្ស័យ តាមច្បាប់៕