ខេត្តកំពង់ស្ពឺ ៖ ក្មេងទំនើង ចំនួន២ក្រុម មានគ្នាប្រមាណជាង១០នាក់ ប្រដាប់ដោយដាវ កាំបិត និងដុំថ្ម ស្ទើរគ្រប់ដៃ បានធ្វើសកម្មភាពដេញវាយ កាប់ចាក់គ្នាយ៉ាងប្រសាច បណ្តាលឱ្យរងរបួសរៀងខ្លួន និងខូចខាតម៉ូតូ ចំនួន២គ្រឿង បន្ទាប់មកបាននាំគ្នារត់គេចខ្លួនបាត់អស់ លុះក្រោយមកត្រូវបានសមត្ថកិច្ចជំនាញស្រាវជ្រាវឃាត់ ខ្លួនបានសរុបចំនួន៨នាក់ នាំយកមកចាត់ការតាមច្បាប់ ខណៈបក្ខពួកផ្សេងទៀត បានរត់គេចខ្លួនបាត់អស់។ករណីអំពើហិង្សានេះ បានកើតឡើង កាលពីវេលាម៉ោង១១យប់ ថ្ងៃទី០៥ ខែមករា ឆ្នាំ២០២៥ នៅចំណុចផ្លូវលំមួយកន្លែង ស្ថិតក្នុងភូមិសាលាគ្រួស ឃុំព្រះនិព្វាន ស្រុកគងពិសី។
លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ បានបញ្ជាក់កាលពីរសៀលថ្ងៃទី០៧ ខែ មករា ឆ្នាំ២០២៥ថា កម្លាំងសមត្ថកិច្ចជំនាញ បានអនុវត្តវិធានការបង្ក្រាបក្រុមក្មេងទំនើង ក្នុងខេត្តកំពង់ស្ពឺ មិនដកដៃនោះឡើយ ខណៈក្មេងទំនើងប្រើហឹង្សាគប់ដុំថ្ម ដាវ កាំបិត ដេញកាប់គ្នាផ្អើលអស់អ្នកស្រុក និងវាយកម្ទេចម៉ូតូ ត្រូវបានឃាត់ខ្លួនមួយចំនួនគេចខ្លួន។
លោកស្នងការខេត្ត បានឱ្យដឹងទៀតថា ជាក់ស្តែងកាលពីវេលាម៉ោង១១យប់ ថ្ងៃទី០៥ ខែមករា ឆ្នាំ២០២៥ នៅចំណុចផ្លូវលំ ស្ថិតនៅភូមិសាលាគ្រួស ឃុំព្រះនិព្វាន ស្រុកគងពិសី មានមក្មេងទំនើងចំនួន២ក្រុម បានបើកឆាកប្រយុទ្ធគ្នាទៅវិញទៅមក រួចបានរត់គេចខ្លួនបាត់អស់ បន្សល់ទុកនូវកាំបិតប៉័ងតោ១ កាំបិតកែច្នៃ១ ដុំថ្មជាច្រើនដុំ និងម៉ូតូ ចំនួន២គ្រឿង ខូចខាតធ្ងន់ (១-ម៉ូតូម៉ាកហុងដា ឌ្រីម សេ១២ ស៊េរីឆ្នាំ២០២៥ ពណ៌ខ្មៅ ស្លាកលេខ ភ្នំពេញ 1LB-1134 និង២-ម៉ូតូម៉ាកហុងដា ឌ្រីម សេ១២៥ ស៊េរីឆ្នាំ២០២៤ ពណ៌ឈាមជ្រូក ស្លាកលេខ ភ្នំពេញ 1KL-9860)។
លោកវរសេនីយ៍ឯក យ៉ាង សុខលី អធិការនគរបាលស្រុកគងពិសី បានបញ្ជាក់ឱ្យដឹងថា បន្ទាប់ពីកើតមានករណីហិង្សាខាងលើរួមក ដោយមានបទបញ្ជាពីលោកស្នងការខេត្ត លោកបានដឹកនាំសហការស្រាវជ្រាវ រហូតដល់ថ្ងៃទី០៦ ខែមករា ឆ្នាំ២០២៥ សមត្ថកិច្ចកំណត់បាន មុខសញ្ញាក្មេងទំនើង ទាំង២ក្រុម និងឈានទៅធ្វើការឃាត់ខ្លួន សរុបបានចំនួន៨នាក់ រួមមាន ៖ ក្រុមទី១ (មានគ្នា៧នាក់) ទី១-ឈ្មោះជឿន ចាន់រ៉ាវី ភេទប្រុស អាយុ២៦ឆ្នាំ មានលំនៅ ភូមិព្រៃខ្លា ឃុំព្រះនិព្វាន ស្រុកគងពិសី។ ទី២-ឈ្មោះចាន់ថា សម្បត្តិ ភេទប្រុស អាយុ១៨ឆ្នាំ ស្នាក់នៅផ្ទះជួលភូមិទួលធ្នង់ ឃុំព្រះនិព្វាន ស្រុកគងពិសី។ ទី៣-ឈ្មោះផុម សុភក្ត្រា ភេទប្រុស អាយុ១៨ឆ្នាំ រស់នៅភូមិព្រៃខ្លា ឃុំព្រះនិព្វាន ស្រុកគងពិសី។ ទី៤-ឈ្មោះនី វណ្ណា ភេទប្រុស អាយុ២១ឆ្នាំ រស់នៅភូមិសាលាគ្រួស ឃុំព្រះនិព្វាន ស្រុកគងពិសី។ ទី៥-ឈ្មោះយាន សុខហេង ភេទប្រុស អាយុ២០ឆ្នាំ រស់នៅភូមិព្រៃខ្លា ឃុំព្រះនិព្វាន ស្រុកគងពិសី។ ទី៦-ឈ្មោះផាន់ សៀវហ្វុង ភេទប្រុស អាយុ១៧ឆ្នាំ រស់នៅភូមិទួលធ្នង់ ឃុំព្រះនិព្វាន ស្រុកគងពិសី និងទី៧-ឈ្មោះផល់ រក្សា ភេទប្រុស អាយុ២២ឆ្នាំ រស់នៅភូមិទួលធ្នង់ ឃុំព្រះនិព្វាន ស្រុកគងពិសី។ ចំណែក៣នាក់ទៀត ១-ឈ្មោះ ស.ដ ហៅខូវ ភេទប្រុស អាយុ២៥ឆ្នាំ (គេចខ្លួន)។ ២-ឈ្មោះ ដ ហៅម៉ុច ភេទប្រុស អាយុ២៥ឆ្នាំ (គេចខ្លួន)។ ៣-ឈ្មោះសេក ភេទប្រុស អាយុ២៥ឆ្នាំ (គេចខ្លួន)។
ដោយឡែក ក្រុមទី២ ជាក្រុមប្រើហិង្សាវាយកម្ទេចម៉ូតូក្រុមទី១ ឃាត់ខ្លួនបាន ១នាក់ ឈ្មោះប៊ុន នីសារៈ ភេទប្រុស អាយុ១៧ឆ្នាំ ស្នាក់នៅបន្ទប់ជួលភូមិកំណប់ ឃុំអង្គពពេល។ ចំណែកឈ្មោះ យ.អ.ផ ភេទប្រុស រស់នៅផ្ទះជួលភូមិកំណតប់ ឃុំអង្គពពេល (គេចខ្លួន)។ ឈ្មោះ ផ ភេទប្រុស អាយុ១៨ឆ្នាំ ស្នាក់នៅបន្ទប់ជួលភូមិទួលធ្នង់ (គេចខ្លួន) និងឈ្មោះ វ ភេទប្រុស រស់នៅភូមិកំណប់ ឃុំអង្គពពេល (គេចខ្លួន)។
ក្នុងកិច្ចប្រតិបត្តិការស្រាវជ្រាវនេះ សមត្ថកិច្ចបានដកកហូតវត្ថុតាង រួមមាន ម៉ូតូ ចំនួន៤គ្រឿង (១-ម៉ូតូម៉ាកហុងដា ឌ្រីម សេ១២៥ ពណ៍ខ្មៅ ពាក់ស្លាកលេខ ភ្នំពេញ 1LB-1134 (ខូចខាត) ២-ម៉ូតូម៉ាកហុងដា ឌ្រីម សេ១២៥ ពណ៌ឈាមជ្រូក ពាក់ស្លាកលេខ ភ្នំពេញ 1KL-9860 (ខូចខាត) ៣-ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1LA-6969 ៤-ម៉ូតូម៉ាកហុងដាឌ្រីម សេ១២៥ ពណ៌ខៀវ ពាក់ស្លាកលេខ កំពង់ស្ពឺ 1E-1850)។ ដាវ ចំនួន២ដើម។ កាំបិតប៉័ងតោ ចំនួន១ដើម និងដុំថ្ម ចំនួន២ដុំ។
នៅចំពោះមុខសមត្ថកិច្ច ក្រុមក្មេងទំនើងខាងលើ បានឆ្លើយសារភាពថា ពួកគេពិតជាបានបង្កហិង្សាដេញវាយកាប់ចាក់គ្នា ប្រាកដមែន។
ក្រុមក្មេងទំនើងទាំង៨នាក់ខាងលើ រួមនិងវត្ថុតាង ត្រូវបានសមត្ថកិច្ចជំនាញរៀបចំកសាងសំណុំរឿង បញ្ជូនទៅចាត់ការបន្តតាមនីតិវិធី៕