ខេត្តព្រះសីហនុ ៖ ក្មេងទំនើង ១ក្រុម បាននាំគ្នាធ្វើដំណើរចេញពីរាជធានីភ្នំពេញ ទៅលេងនៅខេត្តព្រះសីហនុ អស់រយៈពេលជាង ១សប្តាហ៍មកហើយ លុះក្រោយមកបែកគំនិតបបួលគ្នាធ្វើសកម្មភាពបង្ហោះម៉ូតូលេងតាមដងផ្លូវ ត្រូវបានកម្លាំងសមត្ថកិច្ចចុះឃាត់ខ្លួនបានចំនួន ៦នាក់ និងដកហូតម៉ូតូបាន ៣គ្រឿង។
ករណីក្មេងទំនើងបង្ហោះម៉ូតូនេះ បានកើតឡើង កាលពីថ្ងៃទី០៨ ខែមករា ឆ្នាំ២០២៥ នៅចំណុចតាមផ្លូវមហាវិថីជំទាវម៉ៅ ស្ថិតភូមិគគី ឃុំបិតត្រាំង ស្រុកព្រៃនប់
ក្រុមក្មេងទំនើងដែលនាំគ្នាបង្ហោះម៉ូតូ និងត្រូវសមត្ថកិច្ចចាប់ឃាត់ខ្លួន រួមមាន ទី១-ឈ្មោះប៉ឺន សុខផៃ ភេទប្រុស អាយុ១៧ឆ្នាំ មុខរបរ មិនពិតប្រាកដ ស្នាក់នៅភូមិរំដេញ ឃុំឈើទាល ស្រុកស្វាយជ្រុំ ខេត្តស្វាយរៀង (ជាម្ចាស់ម៉ូតូស៊ុយស៊ូគី និច ពណ៌លឿង លាយខ្មៅ ពាក់ស្លាកលេខ ភ្នំពេញ 1JY-7198)។ ទី២-ឈ្មោះធន ម៉េងឃាង ភេទប្រុស អាយុ១៦ឆ្នាំ មុខរបរមិនពិតប្រាកដ ស្នាក់នៅភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ ទី៣-ឈ្មោះសុខ វណ្ឌី ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិរំដេញ ឃុំឈើទាល ស្រុកស្វាយជ្រំ ខេត្តស្វាយរៀង (ម្ចាស់ម៉ូតូហុងដាឌ្រីម សេ១២៥ ស៊េរីឆ្នាំ០២២ ពាក់ស្លាកលេខ ភ្នំពេញ 1JF-4285)។ ទី៤-ឈ្មោះទំ វណ្ណី ភេទប្រុស អាយុ១៥ឆ្នាំ មុខរបរបុគ្គលិកមីហឹល ស្នាក់នៅភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ទី៥-ឈ្មោះខុន ជីវ័ន្ត ភេទប្រុស អាយុ១៦ឆ្នាំ មុខរបរជាងកាត់សក់ ស្នាក់នៅភូមិស្ទឹងមានជ័យ សង្កាត់មានជ័យ ខណ្ឌមានជ័យ រាជធានីភ្នំពេញ (ជាម្ចាស់ម៉ូតូហុងដា ឌ្រីម សេ១២៥ ស៊េរីឆ្នាំ២០២២ ពាក់ស្លាកលេខ ភ្នំពេញ 1JW-2509 និងជាអ្នកបង្ហោះ)។ ទី៦-ឈ្មោះសាន់ សុវណ្ណរី ភេទប្រុស អាយុ១៥ឆ្នាំ មុខរបរជាងឡាន ស្នាក់នៅសង្កាត់ដង្កោ ខណ្ឌដង្កោ រាជធានីភ្នំពេញ។ ក្រុមក្មេងទំនើងទាំង៦នាក់នេះ បានចេញពីរាជធានីភ្នំពេញ មកលេងនៅខេត្តព្រះសីហនុ ចំនួន៨ថ្ងៃមកហើយ។
ចំពោះវត្តុតាងដកហូត រួមមាន ម៉ូតូ ចំនួន៣គ្រឿង ១-ម៉ាកស៊ុយស៊ូគី និច ពណ៌លឿងលាយខ្មៅ ពាក់ស្លាកលេខ ភ្នំពេញ 1JY-7198។ ២-ម៉ាកហុងដា ឌ្រីម សេ១២៥ ស៊េរីឆ្នាំ០២២ ពាក់ស្លាកលេខ ភ្នំពេញ 1JF-4285។ ៣-ម៉ាកហុងដា ឌ្រីម សេ១២៥ ស៊េរីឆ្នាំ២០២២ ពាក់ស្លាកលេខ ភ្នំពេញ 1JW-2509។
តាមប្រភពសមត្ថកិច្ច បានឱ្យដឹងថា កាលពីថ្ងៃទី០៨ ខែមករា ឆ្នាំ២០២៥ នៅចំណុចតាមផ្លូវមហាវិថីជំទាវម៉ៅ ស្ថិតភូមិគគីរ ឃុំបិតត្រាំង ស្រុកព្រៃនប់ មានករណីក្មេងទំនើង ១ក្រុម បានធ្វើសកម្មភាពបង្ហោះម៉ូតូ ចំនួន៣ គ្រឿង (ម៉ូតូ១ ជិះគ្នា២នាក់) ដោយបង្ហោះតាមបណ្តោយផ្លូវចំណុចស្ពានត្រជាក់ចិត្ត ដើរឈើចាំស្នេហ៍ រង្វង់មូលព្រះថោងនាងនាគ។
ប្រភពដដែល បន្តថា បន្ទាប់ពីទទួលបានព័ត៌មានខាងលើ សមត្ថកិច្ចជំនាញ សហការជាមួយសមត្ថកិច្ចមូលដ្ឋាន បានចុះអន្តរាគមន៍ដល់ទីទាំងកើតហេតុ និងឈានដល់ការឃាត់ខ្លួនក្រុមក្មេងទំនើង ចំនួន៦នាក់ ព្រមទាំងដកហូតម៉ូតូ បានចំនួន៣គ្រឿង។
ដោយអនុវត្តតាមគោលការណ៍ និងបទបញ្ជាប្រសាសន៍ដ៏ខ្ពង់ខ្ពស់របស់រាជរដ្ឋាភិបាល និងអនុវត្តតាមមតិដឹកនាំរបស់លោកឧត្តម សេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ វត្តុតាងម៉ូតូ ត្រូវបានដកហូតយកមករក្សាទុកនៅប៉ុស្តិ៍នគរបាលរដ្ឋបាលបិតត្រាំង។ ចំណែកក្រុមក្មេងទំនើងទាំង៦នាក់ ត្រូវបានប្រគល់ឱ្យអាណាព្យាបាល ដោយដាក់ឲ្យស្ថិតក្រោមការត្រួតពិនិត្យរបស់ប៉ុស្តិ៍រដ្ឋបាលក្នុងមូលដ្ឋាន រយៈពេល ៣ខែ៕