បាងកក (ថៃ) ៖ ពាក់ព័ន្ធករណីឃាតកម្មលើលោកលិម គិមយ៉ា សមត្ថកិច្ចថៃ បានបញ្ជូនខ្មាន់កាំភ្លើងជាឃាតករ ចូលគុក និងបានសុំនិវេទន៍ក្រហម ចាប់អ្នកពាក់ព័ន្ធ ជាជនជាតិខ្មែរ ព្រមទាំងបានឃាត់ខ្លួនជនជាតិថៃម្នាក់ទៀត ដែលជាអ្នកបើករថយន្តដឹកឃាតកររត់គេចខ្លួនចូលមកប្រទេសកម្ពុជា ផងដែរ។
តាមប្រភពបណ្តាញព័ត៌មានថៃ បានរាយការណ៍នៅថ្ងៃទី១៤ ខែមករា ឆ្នាំ២០២៥ ថា ជនសង្ស័យជាឃាតករ ឯក លក្ខណ៍ ផែណយ ហៅចាអេម ត្រូវបានតុលាការពហ្មទណ្ឌ សម្រេចឲ្យឃុំខ្លួន ដាក់ពន្ធនាគារ ដោយមានការដាក់ពង្រាយកម្លាំងតម្រួតនគរបាល ដើម្បីឃ្លាំមើលសុវត្ថិភាពជនជាប់ចោទយ៉ាងយកចិត្តទុកដាក់ ដើម្បីការពារកុំឲ្យកើតមានរឿងនឹកស្មានមិនដល់។ ខណៈពេលដែលត្រូវបាននាំខ្លួនចេញពីបន្ទប់ត្រួតពិនិត្យ មន្ត្រីបានឲ្យជនត្រូវចោទឯកលក្ខណ៍ ផែណយ ពាក់អាវក្រោះការពារគ្រាប់កាំភ្លើង និងមួកដែក។
ជនត្រូវចោទ ឯកលក្ខណ៍ ផែណយ អាយុ ៤១ឆ្នាំ ជាអតីតមន្ត្រីកងទ័ពជើងទឹក ជាជនជាប់ចោទទី១ មានទោសពីបទសម្លាប់អ្នកដទៃ ដោយគិតទុកជាមុន, កាន់អាវុធចូលក្រុង ភូមិ ឬផ្លូវសាធារណៈដោយគ្មានមូលហេតុសម ហេតុផល, បាញ់កាំភ្លើងដោយដោយគ្មានមូលហេតុ បន្ទាប់ពីខ្មាន់កាំភ្លើងរូបនេះ បានបាញ់សម្លាប់លោក លិម គិមយ៉ា អាយុ ៧៣ឆ្នាំ អតីតសមាជិកសភាបក្សប្រឆាំងកម្ពុជា ពេលធ្វើដំណើរទៅប្រទេសថៃ ជាមួយភរិយាជន ជាតិបារាំង នៅកណ្តាលផ្លូវ ចំណុចមុខវត្តបួរនិវេទវិហារ សង្កាត់បាងឡាំភូន ខណ្ឌព្រះនគរ ក្រុងបាងកក ប្រ ទេសថៃ កាលពីវេលាម៉ោង ៦ល្ងាច ថ្ងៃទី៧ ខែមករា ឆ្នាំ២០២៥ ។
ប្រភពដដែល បន្តថា នៅពេលដែលជនរងគ្រោះ លិម គិមយ៉ា បានជិះរថយន្តក្រុង ពាក់ស្លាកលេខកម្ពុជា មកដល់ចំណុចកើតហេតុ ជនជាប់ចោទជាខ្មាន់កាំភ្លើង បានរង់ចាំនៅមាត់ទ្វារវត្ត បួរនិវេទវិហារ បន្ទាប់មកមានជនសង្ស័យទី២ ឈ្មោះពេជ្រ គឹមស៊្រិន ដែលកំពុងរត់គេចខ្លួន កាន់លិខិតឆ្លងដែនខ្មែរ បានដើរចេញពីឡានក្រុង ហើយដើរសំដៅទៅមុខជនជាប់ចោទទី១ (ចាអេម) បន្ទាប់មកពេជ្រ គឹមស៊្រិន បានធ្វើកាយវិការដែលផ្តល់សញ្ញាបង្ហាញមុខសញ្ញាដែលត្រុវបាញ់ប្រហារ ។
ក្នុងពេលសួរចម្លើយ ជនជាប់ចោទ បានសារភាពថាខ្លួនពិតជាបានប្រព្រឹត្តដូចការចោទប្រកាន់ទាំងអស់ និងបានអះអាងថា ខ្លួនព្រមទទួលយកការជួលធ្វើឃាតជនរងគ្រោះ (លិម គិមយ៉ា) ដោយសារតបគុណចំពោះអ្នកមានគុណរបស់ខ្លួន (អ្នកជួល) ដែលបានជួលខ្លួនក្នុងតម្លៃ ៦ម៉ឺនបាត (ប្រមាណ ២០០០ដុល្លារ) ។ ជនជាប់ ចោទ ចាអេម ត្រូវបានសមត្ថកិច្ចនាំយកទៅឃុំខ្លួននៅពន្ធនាគារពិសេសក្រុងបាងកក។
ប្រភពខាងលើ បន្តថា ពាក់ព័ន្ធករណីឃាតកម្មខាងលើនេះ សមត្ថកិច្ចជំនាញ កំពុងបន្តការស៊ើបអង្កេតដើម្បីវិភាគពីការទាក់ទងគ្នា ដើម្បីមើលថាមានមនុស្សណាខ្លះជាប់ពាក់ព័ន្ធ ក្នុងនោះ សមត្ថកិច្ចថៃ បានកំណត់អត្ត សញ្ញាណជនសង្ស័យ ២នាក់ ជាជានជាតិខ្មែរ ទី១ឈ្មោះពេជ្រ គឹមស៊្រិន ជាអ្នកចង្អុលបង្ហាញជនរងគ្រោះឲ្យឃាតករបាញ់សម្លាប់ និងទី២ ជាមនុស្សដែលខ្មាន់កាំភ្លើងថាជាអ្នកមានគុណរបស់ខ្លួន ដែលបានជួលឃាតករឲ្យបាញ់សម្លាប់ជនរងគ្រោះ គឺជាជនជាតិខ្មែរ ឈ្មោះ វ៉ាំង ឬ លី ហើយបានប្រើឈ្មោះថៃ “ស៊ុមវ៉ាំង” ប៉ុន្តែនៅពេលដែលត្រូវបាននាំខ្លួនមកសាកសួរនៅប៉ុស្តិ៍នគរបាលឈ្នះសង្គ្រាម ខ្មាន់កាំភ្លើងឈ្មោះឯកលក្ខណ៍ ផែណយ ហៅចាអេម បានបដិសេធប្រាប់ពីអត្តសញ្ញាណអ្នកជួលដែលខ្លួនចាត់ទុកជាអ្នកមានគុណនោះ។
ប្រភពដដែល បន្តទៀតថា ចំពោះជនសង្ស័យឈ្មោះ ពេជ្រ គឹមស៊្រិន ជាជនជាតិខ្មែរ ជាមុខសញ្ញាពាក់ព័ន្ធឃាត កម្មលើលោកលិម គិមយ៉ា នោះ សមត្ថកិច្ចថៃ នឹងចេញនិវេទន៍ក្រហម ទៅប៉ូលិសអាំងទែរប៉ូល ឲ្យប៉ូលិសកម្ពុជា ចាប់ខ្លួន បញ្ជូនទៅប្រទេសថៃ ដើម្បីចាត់ការតាមនីតិវិធី។
ប្រភពបណ្តាញព័ត៌មានថៃ ក៏បានរាយការណ៍នៅថ្ងៃទី១៤ ខែមករា ឆ្នាំ២០២៥ ថា កាលពីថ្ងៃទិ១៣ ខែមករា ឆ្នាំ២០២៥ សមត្ថកិច្ចថៃ ក៏បានឃាត់ខ្លួនជនសង្ស័យម្នាក់ទៀត ជាជនជាតិថៃ ឈ្មោះ ឆាគិត បួរព្លី ហៅឆាំណាន អាយុ៤៧ឆ្នាំ ជាអ្នកស្រុកច័ន្ទបុរី ដែលជាអ្នកបើករថយន្ត ភិកអាប់ ម៉ាកតូយ៉ូតា ហ៊ីលុច ពណ៌ប្រផេះ ដឹកជន សង្ស័យជាឃាតករ រត់គេចខ្លួនមកប្រទេសកម្ពុជា ក្រោយពេលបាញ់សម្លាប់ជនរងគ្រោះ លិម គិមយ៉ា ផងដែរ៕
