ភ្នំពេញ៖ហ៊ិន ច័ន្ទនីរ័ត្ន ឡើងគីឡូជាងមុនបន្ដិច ដែលអ្នកខ្លះថានាងចាប់ផ្ដើមបែកសាច់ ក្រោយមានស្វាមីជាង១៣ខែ ។ប៉ុន្ដែសម្រស់នាងនៅតែគួរឲ្យក្នក់ក្នាញ់ដដែល តាមរយៈការធ្វើMC ជាមួយលោកជា សុវណ្ណារិទ្ធ របស់ក្រុមហ៊ុនAgency មួយចំនួនកាលពីពេលថ្មីៗនេះ បើទោះជាមានព្រលឹងជាងមុនក្ដី ។អ្វីដែលគួរឲ្យកត់សម្គាល់នោះច័ន្ទនីរ័ត្ន បង្ហាញពីក្ដីសុខក្នុងជីវិតខ្លាំងណាស់ បន្ទាប់ពីក្លាយទៅជាភរិយាស្របច្បាប់របស់លោកឌី ពេជ្រ ជាង១ឆ្នាំនេះ ។ប៉ុន្ដែគម្រោងដែលនាងចង់បានកូនដំបូងនៅឆ្នាំរោងនោះបានបរាជ័យ ព្រោះនីរ័ត្ន មិនទាន់បំពេញបំណងប្ដីតាមរយៈការពពោះកូនទី១បានទេ ។
ហ៊ិន ច័ន្ទនីរ័ត្ន មិនអាចទាក់ទងបានទេកាលពីរសៀលថ្ងៃ២៤ ខែ១ ព្រោះលេខធ្លាប់ប្រើតេលែងចូល។តែគេកត់សម្គាល់ថាសកម្មភាពសិល្បៈរបស់នាងគឺដូចមានការព្យាករណ៍ពីមុនមែន ព្រោះពេលនេះនាងនៅបន្ដតែអាជីពពិធីការិនីតែមួយច្រក ប៉ុណ្ណោះ ពោលគឺតាំងពីមានប្ដីមកនីរ័ត្ន មិនបានបង្ហាញសកម្មភាពថតរឿងនិងMV ថ្មីឡើយ ដែលអាចនឹងឈានទៅបញ្ចប់អាជីពចាស់ទៀតផង បើទោះជាគ្មានដំណឹងពីការហួងហែងរបស់ប្ដីនាងក្ដី ។
សូមរំលឹកថាហ៊ិន ច័ន្ទនីរ័ត្ន ទើបបានធ្វើខួបអាពាហ៍ ពិពាហ៍ គម្រប់១ឆ្នាំកាលពីថ្ងៃទី២២ ខែ១២ ឆ្នាំ២០២៤ ខណៈដែលបច្ចុប្បន្ននាងទៅកម្មវិធីអ្នកសិល្បៈតារាភាគច្រើនហៅនាងថាជា«ជំទាវ » និងចាត់ទុករូបនាងថាជានារីមានសំណាងម្នាក់ទៀតផង។តែនីរ័ត្ន មិនទាន់បញ្ចេញការបើកអាជីវកម្មផ្ទាល់ខ្លួនទ្រង់ទ្រាយធំដូចតារាមានប្រពន្ធជាអ្នកធំមួយចំនួនឡើយ គឺនាងលក់តែអ៊ឺវ៉ាន់តាមOnline ធម្មតា បើទោះជាប្ដីនាងជាបុរសមានទ្រព្យស្ដុក អាចបំពេញបំណងនាងគ្រប់បែបយ៉ាងក៍ដោយ ។
ហ៊ិន ច័ន្ទនីរ័ត្ន ក្រោយបិទបញ្ចប់រឿងគេថានាងជាតារាមិនសមប្រកបរឿងស្នេហាជាង១ឆ្នាំនេះ នាងនៅតែបន្ដអាជីពMC នៅប៉ុស្ដិ៍បាយ័នធម្មតា ដោយថែមទាំងមានការគាំទ្រពីស្វាមីនាងទៀតផង ។ប៉ុន្ដែច័ន្ទនីរ័ត្ន ខុសពីពេលនៅលីវ ពោលគឺគេជឿថាការថតភាពយន្ដដែលមានឈុតស្នេហាជាមួយតារាប្រុសនាងនឹងត្រូវបញ្ចប់បើទោះជាបានតម្លៃប៉ុន្មានក៍ដោយ ពោលគឺអាចនៅបន្ដតែការថតរឿងបែបប្រវត្តិសាស្រ្ដប៉ុណ្ណោះ។
ប្រភពបានឲ្យដឹងថានៅឆ្នាំ២០២៥ នេះហ៊ិន ច័ន្ទនីរ័ត្ន ក្រៅពីសម្លឹងមើលអាជីវកម្មក្រៅសិល្បៈនោះផែនការណ៍ធំដែលនាងប៉ងគឺការយកកូនង៉ាទី១ ឲ្យខាងតែបាន ដើម្បីឲ្យចំណងស្នេហាកាន់តែរឹងមាំ បើទោះជានាងបានចាត់ទុកកូនស្រីប្ដីដូចជាកូននាងបង្កើតក្ដី តែមិត្តភក្ដិនាងសឹងគ្រប់គ្នាជម្រុញឲ្យតែនាងយកកូនតាំងពីក្រោយរៀបការម្លេះ ខណៈដែលនីរ័ត្ន ផ្ទាល់ក៍ធ្លាប់ក៍បង្ហាញសញ្ញាចង់បានកូនដល់ទៅ៣ តាមរយៈការធ្វើតេស្ដឧបករណ៍អេឡិចត្រូនិកនៅថ្ងៃដែលនាងនិងស្វាមីបានទៅចុះអេតាស៊ីវិល កាលពីខែ១ឆ្នាំ២០២៤ ។តែមិនមែនតែច័ន្ទនីរ័ត្ន ម្នាក់ទេដែលបរាជ័យយកកូននៅឆ្នាំ២០២៤ ពោលគឺលី ម៉ារីណា ,គង់ សុជាតិ ,នៅ សុនិតា និងសុវត្ថិឌី ធារិកា ជាដើមសុទ្ធតែខកចិត្តរឿងមិនអាចពពោះនេះដូចគ្នា ។
Fan លើកឡើងថាហ៊ិន ច័ន្ទនីរ័ត្ន បើហ៊ានតែបណ្ដោយឲ្យឡើងគីឡូជាងនេះទៀតនោះច្បាស់ពិបាករក្សារតំណែងក្នុងអាជីពសិល្បៈជាមិនខាន ហេតុនេះគេជឿថាដើម្បីចងជើងប្ដី កុំឲ្យប្រែប្រួលចិត្ត និងមានលំនឹងក្នុងសិល្បៈនីរ័ត្ន នឹងមិនបណ្ដោយឲ្យឡើងទម្ងន់ជ្រុល រហូតខូចរាងរៅអស់ទេ ពោលគឺនឹងថែរាងឲ្យនៅស្វែលដូចតារាមួយចំនួនទៀតដែលមានស្វាមីហើយតែសម្រស់មិនសូវប្រែប្រួលមានពេជ្រ សូលីកា ,សុគន្ធ និសា និងសារ៉ាយ សក្ខណា ជាដើមនោះមិនខាន៕
