ភ្នំពេញ៖អតីតតារាតូច សម្ដែង និងពិធីការិនី បច្ចុប្បន្នជាប្រធានសមាគមសិល្បករខ្មែរ អ្នកឧកញ៉ាម៉ៅ សុចំ ណាន ហៅស្រីតូច ចំណាន ប្រារពខួបកំណើតគម្រប់អាយុ៤២ឆ្នាំ នៅថ្ងៃទី២១ ខែ២ ឆ្នាំ២០២៥ ដោយស្វាមីនាងអ្នកឧកញ៉ាគិត ម៉េង បានចាត់ទុកភរិយាលោកថាជា«ផ្កាយសំណាង » និងជាស្រី្ដដែលលោកស្នេហ៍លើសអ្វីៗទាំងអស់ ។
អ្នកឧកញ៉ាគិត ម៉េង ថ្លែងសារនៅថ្ងៃខួបកំណើតភរិយា លោកថា«រីករាយថ្ងៃខួបកំណើតអូន ចំណាន ភរិយា ដៃគូជីវិត និងជាផ្កាយសំណាងរបស់បង ការរៀបមង្គលការធ្វើជាស្វាមីអូនហាក់ដូចជាបានឈ្នះរង្វាន់ដ៏មហា សាលនៅក្នុងជីវិត។ រៀងរាល់ថ្ងៃ ក្រោកពីដំណេក អូនជាពិភពលោករបស់បងដែលផ្តល់នូវផាសុកដល់បង។អូនជាពន្លឺបំភ្លឺជីវិតបងគ្រប់ពេលវេលា។ អូនជាបេះដូងរបស់គ្រួសារយើង ជាពន្លឺដែលផ្តល់ក្តីសង្ឃឹមក្នុងជីវិតរស់នៅរបស់គ្រួសារយើង និងជាប្រភពដែលធ្វើឱ្យជីវិតបងរីករាយ និងមានន័យបំផុត។ក្នុងនាមជាម្តាយមួយរូប អូនប្រៀបដូចជាផ្ទះដែលជាទីកន្លែងផ្តល់នូវក្តីស្រទ្បាញ់ និងសុវត្ថិភាព។ អូនជាស្ត្រីទន់ភ្លន់ ប៉ុន្តែរឹងមាំ អត់ធ្មត់ និងពោរពេញដោយថាមពល។ អូនមើលថែគ្រួសារយើងប្រៀបដូចជាព្រះអាទិត្យជះចូលតាមបង្អួច ដែលផ្តល់ភាពកក់ក្តៅ និងពន្លឺដល់យើង។ក្នុងឋានៈជាអ្នកដឹកនាំ អូនជាមគ្គនាយិកាមួយរូបដែលរឹងមាំ ហើយផ្តល់ការគាំទ្រដោយឥតងាករេ ទោះបីក្នុងស្ថានភាពប្រឈមនានាក៏ដោយ។ អូនដឹកនាំសមាគមសិល្បករខ្មែរ និងមនុស្សជុំវិញខ្លួន ដោយប្រើវិធីសាស្រ្តដែលផ្តល់ភាពស្មើគ្នា ហើយមានក្តីសប្បុរស និងការគោរព។ អូនមិនត្រឹមតែដឹកនាំដោយប្រាជ្ញានោះទេ ប៉ុន្តែ ដោយបេះដូងផងដែរ។ ទង្វើទាំងនេះរបស់អូនធ្វើឱ្យមនុស្សគ្រប់រូបនៅជុំវិញអូនតែងតែស្ងើចសរសើរអូន។ថ្ងៃនេះប្រាថ្នាតែមួយគត់របស់បងគឺសូមឱ្យពិភពលោកនេះផ្តល់ឱ្យអូនដូចដែលអូនផ្តល់ដល់យើងទាំងអស់គ្នា នោះគឺក្ដីស្រឡាញ់ ភាពរីករាយ និងភាពភ្ញាក់ផ្អើលដែលធ្វើឱ្យអូនញញឹម និងមានអារម្មណ៍ថាទទួលបានក្តីស្រឡាញ់ដែលគ្មានលក្ខខណ្ឌ។ អូនស័ក្តិសមនឹងទទួលបាននូវក្តីស្រទ្បាញ់និងសោមនស្សហើយបងនឹងចំណាយពេលពេញមួយជីវិតរបស់បង ដើម្បីឱ្យប្រាកដថាអូនទទួលអារម្មណ៍នៃក្តីស្នេហ៍ដ៏ពិតប្រាកដនិងមានន័យ។រីករាយថ្ងៃខួបកំណើតស្ត្រីដែលបងស្នេហ៍លើសពីអ្វីៗទាំងអស់។ រីករាយថ្ងៃខួបកំណើត អូន ចំណាន! »។
ចំណែកលោកជំទាវអ្នកឧកញ៉ាម៉ៅ ចំណាន បានថ្លែងសារថា«កើនអាយុមួយឆ្នាំទៀតហើយ!សម្រាប់នាងខ្ញុំ ថ្ងៃខួបកំណើតមិនត្រឹមតែជាការឆ្លងកាត់ដំណាក់កាលជីវិតពីមួយឆ្នាំទៅមួយឆ្នាំនោះទេ ពោលគឺវាជាឱកាសសម្រាប់ឱ្យនាងខ្ញុំបានដកឃ្លាបន្តិចដើម្បីឆ្លុះបញ្ចាំង និងគោរពទទួលស្គាល់ចំពោះបុគ្គល និងបទពិសោធនានាដែលជួយត្រួសត្រាយដំណើរជីវិតរបស់នាងខ្ញុំ។ចំពោះលោកពុក! ពាក្យទូន្មានគ្រប់ម៉ាត់ និងភាពរឹងមាំរបស់ពុក ជាត្រីវិស័យសម្រាប់កូន។ លោកពុកបានបង្រៀនកូនឱ្យប្រឹងឈររឹងមាំដើម្បីប្រឈមនឹងឧបសគ្គនានា ឱ្យចេះបន្ទាបខ្លួនក្នុងការដឹកនាំ និងព្យាយាមជានិច្ចដើម្បីសម្រេចបាននូវអ្វីដែលកាន់តែប្រសើរ។ គ្រប់ជំហាន កូនតែងចាំនូវមេរៀនដែលលោកពុកបានប្រៀនប្រដៅជានិច្ច។ចំពោះស្វាមីជាទីស្រឡាញ់! បងជាបង្អែកដ៏រឹងមាំ និងជាកន្លែងដែលផ្ដល់នូវសុវត្ថិភាពបំផុតសម្រាប់អូន។ មិនថាមានរឿងអ្វីក៏ដោយ ក្ដីស្រឡាញ់របស់បងចំពោះអូនមិនប្រែប្រួលឡើយ ហើយការគាំទ្ររបស់បងជាគ្រឹះដ៏រឹងមាំសម្រាប់អូន។ អរគុណដែលបងតែងតែជឿជាក់លើអូន សូម្បីតែពេលខ្លះអូនមិនមានទំនុកចិត្តលើខ្លួនឯងក៏ដោយ។
ចំពោះកូនៗជាទីស្រឡាញ់របស់ម៉ាក់! កូនជាភាពរីករាយ និងមោទនភាពដ៏ធំធេងរបស់ម៉ាក់។ ស្នាមញញឹមនិងសំណើចដ៏រីករាយរបស់កូនជាក្ដីសុខក្នុងជីវិតរបស់ម៉ាក់ហើយក្ដីសុបិនរបស់កូនៗជាក្ដីសង្ឃឹមរបស់ម៉ាក់ទៅអនាគត។ ឃើញកូនម៉ាក់ធំធាត់គ្រប់គ្នាពីមួយថ្ងៃទៅមួយថ្ងៃ ជាអំណោយដ៏ថ្លៃថ្លាបំផុតសម្រាប់ជីវិតម៉ាក់។ចំពោះសហសេវិកទាំងអស់! អ្នកទាំងអស់គ្នាជាចង្វាក់ដង្ហើមនៃទស្សនវិស័យរបស់នាងខ្ញុំ។ ការលះបង់ ភាពច្នៃប្រតិដ្ឋ និងការជឿជាក់របស់បងប្អូនចំពោះគោលបំណងរួមរបស់យើង តែងតែកម្លាំងចិត្តសម្រាប់នាងខ្ញុំជារៀងរាល់ថ្ងៃ។ រួមគ្នា យើងបានសម្រេចនូវសមិទ្ធផលដែលស្ទើរតែមិនគួរឱ្យជឿថាអាចទៅរួច ហើយនាងខ្ញុំពិតជាមានមោទ នភាពបំផុតចំពោះអ្នកទាំងអស់គ្នា។ថ្ងៃនេះនាងខ្ញុំពិតជារំភើប និងសូមអរគុណចំពោះរាល់បញ្ហាដែលបានដុស ខាត់ឱ្យនាងខ្ញុំមានថ្ងៃនេះ ភាពរីករាយដែលតែងលើកទឹកចិត្តខ្ញុំ និងអ្នកគ្រប់គ្នាដែលបានដើរផ្លូវរួមគ្នាជាមួយនាងខ្ញុំ។ អ្នកគ្រប់គ្នាបានផ្ដល់នូវចំណែកនៃក្ដីស្រឡាញ់ដើម្បីបំពេញន័យជីវិតរបស់ខ្ញុំ ហើយនាងខ្ញុំនឹងចងចាំទុកក្នុងចិត្តជានិច្ច។នេះគឺជាទំព័រថ្មី ដែលពោរពេញដោយគោលដៅ ក្ដីស្រឡាញ់ និងការដឹងគុណគ្មានទីបញ្ចប់។ អរគុណគ្រប់គ្នាដែលបានចូលមកក្នុងជីវិតរបស់នាងខ្ញុំ ហើយអ្នកទាំងអស់គ្នាគឺជាពរជ័យដ៏អស្ចារ្យបំផុតសម្រាប់ខ្ញុំ »។
សម្រាប់សមាគមសិល្បករខ្មែរ បានចេញសារជូនពរអ្នកឧកញ៉ាម់ៅ ចំណាន នៅថ្ងៃខួបនាងដែរថាសូមឲ្យមាន សុខភាពល្អបរិបូរណ៍ កម្លាំងពលំខ្លាំងក្លា ប្រាជ្ញាឈ្លាសវៃ អាយុយឺនយូ ដើម្បីបន្ដដឹកនាំសមាគមមួយនេះឲ្យឲ្យសម្រេចបានជោគជ័យថ្មីៗទៀត …។
គួររំលឹកថាអតីតតារាសម្ដែងស្រីតូច ចំណាន មានឈ្មោះពិតថាម៉ៅ សុចំណាន មានអាយុ៤២ឆ្នាំ កើតនៅថ្ងៃទី២១ ខែកុម្ភៈ ឆ្នាំ១៩៨៣ មានស្រុកកំណើតនៅខេត្តស្វាយរៀង ឪពុកឈ្មោះម៉ៅ នី អាយុ៧៥ឆ្នាំ មុខរបរជាមន្រ្ដីកងយោធពលខេមរភូមិន្ទ(ចូលនិវត្តន៍) ម្ដាយឈ្មោះគង់ សោម៉ា អាយុ៦៥ឆ្នាំ មុខរបរមេផ្ទះ ។អ្នកនាងស្រីតូច ចំណាន បានរៀបការជាមួយអ្នកឧកញ៉ាគិត ម៉េង នៅថ្ងៃទី២០ខែ៣ ឆ្នាំ២០១៥ ក្រោយមានកូន៤នាក់ (ស្រី២) ហើយនាងត្រូវបានសិល្បករបោះឆ្នោតឲ្យធ្វើជាប្រធានសមាគមសិល្បករខ្មែរ អាណត្តិទី៦ នៅថ្ងៃទី ២ ខែ៥ ឆ្នាំ២០២៤ ដែលនាងកាន់តួនាទីនេះដល់ឆ្នាំ២០២៩ ៕
