តារាល្បីៗ ច្រៀងអបអរបុណ្យចូលឆ្នាំថ្មី ប្រពៃណីជាតិ

ភ្នំពេញ ៖ តារាជាច្រើនដួង បានជួបជុំគ្នាថត ច្រៀង សម្ដែងឲ្យសមាគមទូរទស្សន៍កម្ពុជា សម្រាប់អបអរពិធី បុណ្យចូលឆ្នាំថ្មី ប្រពៃណីជាតិ ឆ្នាំម្សាញ់ ២០២៥ ដែលធ្វើនៅស្ទូឌីយោបាយ័ន ស្ទឹងមានជ័យ កាលពីថ្ងៃទី២ ខែមេសា ឆ្នាំ២០២៥  ។

តារាដែលចូលរួមច្រៀង និងថតសម្តែងសម្រាប់អបអរពិធីបុណ្យចូលឆ្នាំថ្មី នៅស្ទូឌីយោបាយ័ន ស្ទឹងមានជ័យ រួមមាន តារាស្រី ៖ ហ៊ឹម ស៊ីវន, ម៉េង កែវ ពេជ្ជតា, ឆោម និមល, លីន សោម៉ា, លឹម សេរីហាន់នីកា, ហ៊ិន លីដា, អឿន ស្រីមុំ, យ៉ាន លីនដា, វឿន ពិសី, ឆេង សូរិយា ….។ ចំណែកតារាប្រុស មាន ៖ លោកហេង ហ៊ុនលាភ, ឈឿន ឧត្តម, ញ៉ែម សុគន្ធ, គី សាវីន, ភឿន សុភាព, ជុំ លីណូ, រាជ ប្រាជ្ញា, សាល បាទី, ស៊ឹម ច័ន្ទពន្លឺ, សួរ វិចិត្រ និងលោកយ៉ែម សំអូន ជាដើម  ។

 លោកស្រី រី អ្នកដឹកនាំតារាថតកម្មវិធីអបអរសាទរបុណ្យចូលឆ្នាំខ្មែរ ២០២៥ បានឲ្យដឹងថា ឆ្នាំនេះ លោកស្រីបានសម្រិតសម្រាំងយកតែចម្រៀង ចំនួន៣០បទប៉ុណ្ណោះ មកឲ្យតារាចម្រៀងច្រៀង ដែលបទទាំងនោះ ជាបទប្រពៃណីខ្មែរ ។ លោកស្រី រី បន្ថែមថា ចំពោះតារាសម្ដែងដែលរាំអមតារា ឬនៅមុខឆាក មិនអាចកំណត់បានទេ ព្រោះនៅលើភាពជាក់ស្ដែងខ្លះមក ខ្លះអត់មក ។

តារាចម្រៀងភឿន សុភាព

ចំណែកលោក ភក្ដី ជំនួយការអ្នកដឹកនាំសម្តែង បានឲ្យដឹងថា តារាចម្រៀងទាំងអស់ដែលព្រាងនៅក្នុងក្រដាស មានចំនួនច្រើននាក់ តែសភាពជាក់ស្ដែង ខ្លះមក ខ្លះមិនមក ដូច្នេះមិនអាចនិយាយថា ទាំងអស់មានចំនួនប៉ុន្មាននាក់ មុនថតចប់នោះទេ  ។

  លោកយ៉ែម សំអូន និងអ្នកនាងយ៉ាន លីនដា

តារាចម្រៀង ឆោម និមល បានឲ្យដឹងថា នាងសប្បាយចិត្តណាស់ដែលបានចូលរួមច្រៀងសម្ដែង ថតអប អរសាទរពិធីបុណ្យចូលថ្មី ប្រពៃណីជាតិ ជាពិសេសគឺជួបជុំសិល្បកររួមជំនាន់ ហើយនាងមានចម្រៀង ៣បទ ជាចង្វាក់រាំវង់ សារាវ៉ាន់ និងឡាំលាវ ។ នាងថា សម្រាប់ពិធីបុណ្យចូលឆ្នាំខ្មែរ ខាងមុខនេះ នាងជាប់ច្រៀងសម្ដែងនៅសៀមរាប ទាំង៣ថ្ងៃ ដែលនេះជាលើកទី១ សម្រាប់នាង ក្នុងការបានទៅចូលរួមពិធីបុណ្យអង្គរសង្រ្កាន្ត នៅខេត្តសៀមរាប។      

កញ្ញាឆោម និមល

តារាចម្រៀង ឆេង សុរិយា និយាយថា នាងរីករាយចិត្តដែលបានមកជួបសិល្បករជាច្រើននាក់ជួបជុំគ្នាច្រៀងបទប្រពៃណីខ្មែរ។ នាងថា បានថត ៣បទ ជាចង្វាក់សារាវ៉ាន់ និងម៉ាឌីហ្សុន គឺបទ «ឆ្នាំថ្មីមកដល់ហើយ», «សារាវ៉ាន់ឆ្នាំថ្មី», និងបទ «ក្រមុំទាំង៣»។ សុរិយា និយាយថា ការច្រៀងបទប្រពៃណីខ្មែរ អបអរឆ្នាំថ្មី គឺឆ្លុះបញ្ចាំងឲ្យឃើញថា យើងមិនបោះបង់ប្រពៃណីខ្មែរទេ គឺសិល្បៈនៅតែប្រារព្ធទៅបាន។

 អ្នកនាងឆេង សុរិយ៉ា និងឆោម និមល

កញ្ញាលីន សោម៉ា ម្ចាស់ពាន Beat The Best រដូវកាលទី២ បានឲ្យដឹងថា នាងសប្បាយចិត្តដែលបានថតបទប្រពៃណីខ្មែរ ក្នុងឱកាសឆ្នាំថ្មីនេះ។ នាងថា មានបទចម្រៀង ២បទ គឺបទទោល «Single មិនទើសអ្នកណា» និងបទចម្រៀងជាមួយលោកសួរ វិចិត្រ «កុំជឿប្រុសៗ» ។ សោម៉ា និយាយថា ការមកច្រៀងជួបជុំគ្នាបែបនេះល្អ ព្រោះពេលចាច់ផ្សាយនៅថ្ងៃបុណ្យចូលឆ្នាំទៅ បងប្អូននៅតាមខេត្ត ចូលចិត្តណាស់ ជាពិសេសឪពុកម្ដាយរបស់នាងតែម្ដង។ សោម៉ា ឲ្យដឹងថា សម្រាប់ពិធីបុណ្យចូលឆ្នាំ ៣ថ្ងៃខាងមុខនេះ នាងច្រៀងសម្ដែងនៅខេត្តកំពង់ស្ពឺ, ពោធិ៍សាត់ និងប៉ោយប៉ែត ខេត្តបន្ទាយមានជ័យ រួមទាំងកម្មវិធីមួយចំនួនទៀត នៅរាជធានីភ្នំពេញ។

 កញ្ញាលីន សោម៉ា និងលោកគី សាវីន

លោក គី សាវីន ម្ចាស់ពាន Cambodian Idol រដូវកាលទី៥ បានឲ្យដឹងថា លោកមានអារម្មណ៍សប្បាយរីករាយ ព្រោះជាលើកទី១ ដែលបានថតអបអរឆ្នាំថ្មី ហើយលោកមាន ២បទគឺ «ចូលឆ្នាំទៅស្រុក» និងបទច្រៀងរួមគ្នាជាមួយសិល្បកររៀមច្បង។ លោកសាវីន ថាការរៀបចំកម្មវិធីនេះឡើង ល្អណាស់ ព្រោះធ្វើឲ្យបងប្អូនបានស្គាល់ចង្វាក់ប្រពៃណី រាំវង់ រាំក្បាច់ សារាវ៉ាន់ ឡាំលាវ និងសិល្បករជួបជុំរាំលេងសប្បាយផងដែរ ។ តារារូបនេះប្រាប់ថា សម្រាប់បុណ្យចូលឆ្នាំខ្មែរ ខាងមុខនេះ លោកត្រៀមច្រៀងសម្ដែងនៅខេត្តពោធិ៍សាត់, ប៉ោយប៉ែត (បន្ទាយមានជ័យ)  និងខេត្តឧត្តរមានជ័យ ។           ចំណែកលោកហេង ប៊ុនលាភ បានឲ្យដឹងថា កម្មវិធីអប អរឆ្នាំថ្មី ២០២៥ លោកច្រៀង ៣បទ គឺចង្វាក់សារាវ៉ាន់, ម៉ាឌីហ្សុន និងចង្វាក់ធ្វីស ដែលមានបទ «រាំម៉ាឌីហ្សុន», «សូមអញ្ជើញមករាំនឹងខ្ញុំ» និងបទ «សារាវ៉ាន់ឆ្នាំថ្មី»។ លោកប៊ុនលាភ ឲ្យដឹងថា នៅថ្ងៃបុណ្យចូលឆ្នាំខ្មែរ ទាំង៣ថ្ងៃ លោកទៅខេត្តសៀមរាប ដើម្បីលេងល្បែងប្រជាប្រិយប្រពៃណីខ្មែរ ជាមួយបងប្អូននៅទីនោះ ៕

លោកញ៉ែម សុគន្ធ និងអឿន ស្រីមុំ

លោកហេង ប៊ុនលាភ ,ឈឿន ឧត្តម ,ឆោម និមល និងលោកញ៉ែម សុគន្ធ

លោកសារ៉ា

លោកឈឿន ឧត្តម និងអ្នកនាងឆេង សុរិយ៉ា

កញ្ញារស្មី និងលោកកូកូ